ਕਿਊਬਿਕ, 9 ਜੁਲਾਈ (ਪੋਸਟ ਬਿਊਰੋ) : ਕਿਊਬਿਕ ਦੇ ਦੱਖਣ ਵਿੱਚ ਸਥਿਤ ਸਿਟੀ ਲੈਵਿਸ ਵਿੱਚ ਇੱਕ ਕਾਰ ਹਾਦਸੇ ਤੋਂ ਬਾਅਦ ਲਾਪਤਾ ਹੋਈਆਂ ਦੋ ਬੱਚੀਆਂ ਦੇ ਸਬੰਧ ਵਿੱਚ ਐਂਬਰ ਐਲਰਟ ਜਾਰੀ ਕੀਤਾ ਗਿਆ। ਹਾਈਵੇਅ 20 ਉੱਤੇ ਹਾਦਸੇ ਤੋਂ ਬਾਅਦ ਦੋਵੇਂ ਬੱਚੀਆਂ ਆਪਣੇ ਪਿਤਾ ਸਮੇਤ ਲਾਪਤਾ ਦੱਸੀਆਂ ਜਾ ਰਹੀਆਂ ਹਨ।

6 ਸਾਲਾ ਰੋਮੀ ਕਾਰਪੇਂਟਰ ਤੇ 11 ਸਾਲਾ ਨੋਰਾਹ ਕਾਰਪੇਂਟਰ ਲਾਪਤਾ ਹਨ ਜਦਕਿ ਉਨ੍ਹਾਂ ਦੇ 44 ਸਾਲਾ ਪਿਤਾ ਮਾਰਟਿਨ ਕਾਰਪੇਂਟਰ ਦੀ ਵੀ ਪੁਲਿਸ ਭਾਲ ਕਰ ਰਹੀ ਹੈ। ਕਿਊਬਿਕ ਦੀ ਪ੍ਰੋਵਿੰਸ਼ੀਅਲ ਪੁਲਿਸ ਨੇ ਦੱਸਿਆ ਕਿ ਇਨ੍ਹਾਂ ਤਿੰਨਾਂ ਨੂੰ ਆਖਰੀ ਵਾਰੀ ਬੱੁਧਵਾਰ ਨੂੰ ਰਾਤੀਂ 8:30 ਵਜੇ ਲੇਵਿਸ ਦੇ ਸੇਂਟ ਨਿਕੋਲਸ ਇਲਾਕੇ ਵਿੱਚ ਇੱਕ ਸਟੋਰ ਦੇ ਲਾਗੇ ਵੇਖਿਆ ਗਿਆ ਸੀ। 9:30 ਵਜੇ ਉਹ ਪੀ 75 ਪੀਐਕਸਵੀ ਲਾਇਸੰਸ ਪਲੇਟ ਵਾਲੀ 2008 ਮਾਡਲ ਦੀ ਵੋਕਸਵੈਗਨ ਪਸਾਟ ਵਿੱਚ ਸਵਾਰ ਸਨ। ਪੁਲਿਸ ਨੇ ਦੱਸਿਆ ਕਿ ਸੇਂਟ ਐਪੋਲਿਨੇਅਰ ਨੇੜੇ ਹਾਈਵੇਅ 20 ਈਸਟ ਉਤੇ ਹੋਏ ਹਾਦਸੇ ਵਿੱਚ ਵੀ ਉਹ ਸ਼ਾਮਲ ਸਨ। ਜਦੋਂ ਐਮਰਜੰਸੀ ਅਮਲਾ ਪਹੁੰਚਿਆ ਤਾਂ ਗੱਡੀ ਖਾਲੀ ਸੀ ਤੇ ਤਿੰਨੇ ਲਾਪਤਾ ਸਨ।

ਉਨ੍ਹਾਂ ਦੇ ਘਰਦਿਆਂ ਨੂੰ ਉਨ੍ਹਾਂ ਦੀ ਸਿਹਤ ਤੇ ਸੇਫਟੀ ਨੂੰ ਲੈ ਕੇ ਚਿੰਤਾ ਹੋ ਰਹੀ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਪਰਿਵਾਰ ਨੂੰ ਉਨ੍ਹਾਂ ਦੇ ਲਾਪਤਾ ਹੋਣ ਦਾ ਕਾਰਨ ਨਹੀਂ ਪਤਾ। ਅਧਿਕਾਰੀਆਂ ਵੱਲੋਂ ਚਸ਼ਮਦੀਦਾਂ ਤੇ ਪਰਿਵਾਰਕ ਮੈਂਬਰਾਂ ਨਾਲ ਗੱਲਬਾਤ ਕੀਤੀ ਜਾ ਰਹੀ ਹੈ। ਪੁਲਿਸ ਅਧਿਕਾਰੀ ਤੇ ਵਾਲੰਟੀਅਰਜ਼ ਵੱਲੋਂ ਬੱੁਧਵਾਰ ਰਾਤ ਤੋਂ ਹੀ ਨੇੜਲੇ ਇਲਾਕੇ ਦੀ ਪੁਣਛਾਣ ਕੀਤੀ ਜਾ ਰਹੀ ਹੈ। ਜੰਗਲ ਵਾਲੇ ਇਲਾਕੇ ਦੀ ਭਾਲ ਲਈ ਇੱਕ ਹੈਲੀਕਾਪਟਰ ਵੀ ਲਾਇਆ ਗਿਆ ਹੈ।