ਓਟਵਾ, 7 ਜੁਲਾਈ (ਪੋੋਸਟ ਬਿਊਰੋ) : ਮਹਾਂਮਾਰੀ ਦੇ ਸ਼ੁਰੂ ਹੋਣ ਤੋਂ ਲੈ ਕੇ ਹੁਣ ਤੱਕ ਬੰਦ ਪਏ ਕਈ ਸਰਵਿਸ ਕੈਨੇਡਾ ਸੈਂਟਰ ਨੂੰ ਖੋਲ੍ਹਿਆ ਜਾਵੇਗਾ। ਇਹ ਖੁਲਾਸਾ ਸਰਵਿਸ ਕੈਨੇਡਾ ਸੈਂਟਰ ਦੇ ਵਰਕਰਜ਼ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਵੱਲੋਂ ਕੀਤਾ ਗਿਆ।

ਯੂਨੀਅਨ ਨੇ ਆਖਿਆ ਕਿ ਕੁੱਝ ਸਰਵਿਸ ਕੈਨੇਡਾ ਸੈਂਟਰ ਖੋਲ੍ਹੇ ਜਾਣਗੇ ਤਾਂ ਕਿ ਲੋਕ ਸੀਈਆਰਬੀ ਜਾਂ ਓਏਐਸ ਵਰਗੇ ਫੈਡਰਲ ਬੈਨੇਫਿਟਸ ਲਈ ਨਿਜੀ ਤੌਰ ਉੱਤੇ ਅਪਲਾਈ ਕਰ ਸਕਣ। ਆਉਣ ਵਾਲੇ ਇੱਕ ਦੋ ਦਿਨਾਂ ਵਿੱਚ ਅਜਿਹਾ ਕੀਤਾ ਜਾਵੇਗਾ। ਕੈਨੇਡਾ ਇੰਪਲੌਇਮੈਂਟ ਐਂਡ ਇਮੀਗ੍ਰੇਸ਼ਨ ਯੂਨੀਅਨ ਦੇ ਨੈਸ਼ਨਲ ਐਗਜ਼ੈਕਟਿਵ ਵਾਈਸ ਪ੍ਰੈਜ਼ੀਡੈਂਟ ਕ੍ਰਿਸਟਲ ਵਾਰਨਰ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਇਹ ਆਫਿਸ ਇਸ ਹਫਤੇ ਵਿੱਚ ਮੁੜ ਖੁੱਲ੍ਹਣ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਹਰੇਕ ਪ੍ਰੋਵਿੰਸ ਵਿੱਚ ਅਜਿਹੇ ਪੰਜ ਆਫਿਸ ਖੋਲ੍ਹਣ ਦਾ ਟੀਚਾ ਮਿਥਿਆ ਗਿਆ ਹੈ।

ਵਾਰਨਰ ਨੇ ਆਖਿਆ ਕਿ ਇਨ੍ਹਾਂ ਆਫਿਸਿਜ਼ ਰਾਹੀਂ ਜਨਤਾ ਨੂੰ ਵਿਅਕਤੀਗਤ ਤੌਰ ਉੱਤੇ ਮੁਹੱਈਆ ਕਰਵਾਉਣ ਵਾਲੀਆਂ ਸਾਰੀਆਂ ਸੇਵਾਵਾਂ ਹੀ ਇਨ੍ਹਾਂ ਆਫਿਸਿਜ਼ ਰਾਹੀਂ ਨਹੀਂ ਦਿੱਤੀਆਂ ਜਾਣਗੀਆਂ ਸਗੋਂ ਜਿੱਥੇ ਸੰਭਵ ਹੋਵੇਗਾ ਲੋਕਾਂ ਨੂੰ ਆਨਲਾਈਨ ਹੀ ਕੰਮ ਕਰਨ ਲਈ ਆਖਿਆ ਜਾਵੇਗਾ।