ਲੁਧਿਆਣਾ, 23 ਮਈ (ਪੋਸਟ ਬਿਊਰੋ)- ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਵੱਲੋਂ ਕਾਂਗਰਸ ਛੱਡ ਕੇ ਭਾਜਪਾ ਵਿੱਚ ਸ਼ਾਮਲ ਹੋਣ ਪਿੱਛੋਂ ਪੰਜਾਬ ਵਿੱਚ ਇੱਕ ਦਰਜਨ ਦੇ ਕਰੀਬ ਵੱਡੇ ਨੇਤਾ ਭਾਜਪਾ ਵਿੱਚ ਜਾਣ ਦੇ ਇਛੁੱਕ ਦੱਸੇ ਜਾਂਦੇ ਹਨ। ਇਨ੍ਹਾਂ ਵਿੱਚੋਂ ਤਿੰਨ ਨੇਤਾ ਸੁਨੀਲ ਜਾਖੜ ਦੇ ਨਜ਼ਦੀਕੀ ਹਨ।
ਭਾਵੇਂ ਚੋਣਾਂ ਮੌਕੇ ਅਕਾਲੀ ਦਲ ਅਤੇ ਕਾਂਗਰਸ ਵਿੱਚੋਂ ਵੱਡੇ ਕਦ ਦੇ ਦਰਜਨ ਦੇ ਕਰੀਬ ਨੇਤਾ ਭਾਜਪਾ ਵਿੱਚ ਚਲੇ ਗਏ ਸਨ, ਪਰ ਹਾਲੇ ਤਕ ਉਨ੍ਹਾਂ ਨੂੰ ਭਾਜਪਾ ਨੇ ‘ਸੁੱਚੇ ਮੂੰਹ' ਰੱਖਿਆ ਹੈ ਅਤੇਚੇਅਰਮੈਨੀ, ਮੈਂਬਰਸ਼ਿਪ ਜਾਂ ਡਾਇਰੈਕਟਰੀ ਨਹੀਂ ਦਿੱਤੀ। ਇੱਥੋਂ ਤਕ ਕਿ ਕੈਪਟਨ ਅਮਰਿੰਦਰ ਵੱਲੋਂ ਕਾਂਗਰਸ ਛੱਡਣ ਪਿੱਛੋਂ ਰੌਲਾ ਪਿਆ ਸੀ ਕਿ ਭਾਜਪਾ ਵਿੱਚ ਜਾਣ ਉੱਤੇ ਉਨ੍ਹਾਂ ਨੂੰ ਗਵਰਨਰ ਬਣਾਇਆ ਜਾ ਰਿਹਾ ਹੈ, ਪਰ ਅਜਿਹਾ ਕੁਝ ਨਹੀਂ ਹੋਇਆ। ਇਸ ਮੌਕੇ 4-5 ਅਜਿਹੇ ਸਿੱਖ ਚਿਹਰੇ ਹਨ, ਜੋ ਲੰਬੇ ਸਮੇਂ ਤੋਂ ਭਾਜਪਾ ਵਿੱਚ ਹਨ। ਉਨ੍ਹਾਂ ਦੇ ਹੱਥ ਵੀ ਕੁਝ ਨਹੀਂ ਲੱਗਾ ਪਰ ਉਨ੍ਹਾਂ ਦੀ ਸਰਕਾਰੇ-ਦਰਬਾਰੇ ਅਤੇ ਦਿੱਲੀ ਵਿੱਚ ਪਹੁੰਚ ਜ਼ਰੂਰ ਦੱਸੀ ਜਾਂਦੀ ਹੈ। ਸ਼ਾਇਦ ਇਸੇ ਕਾਰਨ ਕਾਂਗਰਸੀ ਨੇਤਾ ਆਪਣੀ ਪਹੁੰਚ ਅਤੇ ਸਰਕਾਰੇ-ਦਰਬਾਰੇ ਗੱਲਬਾਤ ਵਧਾਉਣ ਲਈ ਆ ਰਹੇ ਹਨ।