ਅੰਮ੍ਰਿਤਸਰ, 13 ਮਈ (ਪੋਸਟ ਬਿਊਰੋ)- ਵੱਖ-ਵੱਖ ਵਿਚਾਰਧਾਰਾ ਨਾਲ ਜੁੜੇ ਤੇ ਪਿਛਲੇ ਲੰਬੇ ਸਮੇਂ ਤੋਂ ਇੱਕ ਦੂਸਰੇ ਦੇ ਵਿਰੋਧੀ ਸਮਝੇ ਜਾਂਦੇ ਸਿੱਖ ਲੀਡਰਾਂ ਵੱਲੋਂ ਮੰਚ ਸਾਂਝਾ ਕਰਨ ਨਾਲ ਪੰਥਕ, ਸੱਤਾਧਾਰੀ ਤੇ ਰਾਜਸੀ ਆਗੂ ਦੰਗ ਰਹਿ ਗਏ, ਪਰ ਸਿਆਸੀ ਤੇ ਸਿੱਖ ਮਾਹਰ ਇਸ ਨੂੰ ਗੰਭੀਰਤਾ ਨਾਲ ਲੈ ਰਹੇ ਹਨ ਕਿ ਕੀ ਬਾਦਲ ਪਰਵਾਰ ਨਾਲ ਕੁਝ ਪੰਥਕ ਨੇਤਾਵਾਂ ਦੀਆਂ ਦੂਰੀਆਂ ਏਨੇ ਨਾਲ ਨਜ਼ਦੀਕੀਆਂ ਵਿੱਚ ਬਦਲ ਗਈਆਂ, ਜੋ ਰਾਤੋਂ ਰਾਤ ਕਰੀਬ ਆ ਗਏ ਹਨ।
ਰਾਜਸੀ ਮਾਹਰਾਂ ਦੇ ਅਨੁਸਾਰ ਕਾਰਜਕਾਰੀ ਜੱਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਦੀ ਸਿੱਖ ਆਗੂਆਂ ਨੂੰ ਇੱਕ ਮੰਚ ਉੱਤੇ ਇਕੱਠੇ ਕਰਨ ਲਈ ਅਪੀਲ ਇੱਕ ਬਹਾਨਾ ਹੈ? ਅਸਲ ਵਿੱਚ ਕਾਰਜਕਾਰੀ ਜੱਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੂੰ ਸ਼ਕਤੀਸ਼ਾਲੀ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਇੱਕ ਹੋਰ ਭਾਜਪਾ ਨੇਤਾ ਗੁਪਤ ਤੌਰ ਉੱਤੇ ਅਕਾਲ ਤਖ਼ਤ ਸਾਹਿਬ ਸੈਕਟਰੀਏਟ ਅੰਮ੍ਰਿਤਸਰ ਵਿਖੇ ਮਿਲ ਚੁੱਕੇ ਹਨ, ਜਿਸ ਦੇ ਵੇਰਵੇ ਅਜੇ ਤਕ ਜਨਤਕ ਨਹੀਂ ਹੋਏ। ਦੂਸਰੇ ਪਾਸੇ ਭਾਜਪਾ ਹਾਈ ਕਮਾਂਡ ਨੇ ਬਾਦਲ ਤੋਂ ਸਿਆਸੀ ਰਾਹ ਵੱਖਰੇ ਕਰ ਲਏ ਹਨ। ਭਾਖੜਾ ਡੈਮ, ਚੰਡੀਗ਼ੜ੍ਹ, ਦਰਿਆਈ ਪਾਣੀਆਂ ਵਰਗੇ ਅਹਿਮ ਮਸਲਿਆਂਅਤੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਿੱਚ ਨਰਿੰਦਰ ਮੋਦੀ ਸਰਕਾਰ ਦੀ ਦਖ਼ਲ ਅੰਦਾਜ਼ੀ ਤੋਂ ਸਿੱਖ ਲੀਡਰ ਖਫ਼ਾ ਹਨ ਅਤੇ ਭਾਜਪਾ ਪੰਜਾਬ ਵਿੱਚ ਪੈਰ ਜਮਾ ਰਹੀ ਹੈ।
ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨਪੰਜਾਬ ਵਿੱਚਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ ਤੇ ਬਾਦਲ ਦਲ ਦੇ ਹਾਸ਼ੀਏ ਉੱਤੇ ਚਲੇ ਜਾਣ ਕਰਕੇ ਸੱਤਾਹੀਣ ਹੋਈ ਸਿੱਖ-ਲੀਡਰਸ਼ਿਪ ਕਾਫੀ ਚਿੰਤਤ ਹੈ, ਪਰ ਪੰਥਕ ਹਲਕੇ ਇਸ ਗੱਲ ਤੋਂ ਬਾਦਲ ਪਰਵਾਰ ਦੇ ਵਿਰੁੱਧ ਹਨ ਕਿ ਉਨ੍ਹਾਂ ਦੀ ਕਰੀਬ 15 ਸਾਲ ਸਰਕਾਰ ਰਹੀ ਅਤੇ ਉਨ੍ਹਾਂ ਦੇ ਰਾਜ ਸਮੇਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀਆਂ ਹੋਈਆਂ, ਪੰਥ ਤੋਂ ਛੇਕੇ ਡੇਰਾ ਸੱਚਾ ਸੌਦਾ ਦੇ ਮੁਖੀ ਨੂੰ ਜੱਥੇਦਾਰਾਂ ਤੋਂ ਮੁਆਫੀ ਦਿਵਾਈ, ਉਨ੍ਹਾਂ ਦੇ ਰਾਜ ਸਮੇਂ ਪੁਲਸ ਗੋਲੀ ਨਾਲ ਦੋ ਸਿੱਖ ਸ਼ਹੀਦ ਹੋਏ, ਕਈ ਪੁਲਸ ਜਾਂਚ ਟੀਮਾਂ ਬਣੀਆਂ, ਪਰ ਇਨਸਾਫ਼ ਨਹੀਂ ਮਿਲਿਆ, ਇਸ ਲਈ ਪਰਦੇ ਪਿੱਛੇ ਹੁੰਦੀਆਂ ਸਰਗਰਮੀਆਂ ਅਜੇ ਭੇਦ ਬਣੀਆਂ ਹਨ?