ਕੇਂਸਾਸ, 3 ਮਈ (ਪੋਸਟ ਬਿਊਰੋ): ਬੋਇੰਗ ਜਹਾਜ਼ 'ਚ ਗੜਬੜੀ ਦਾ ਪਰਦਾਫਾਸ਼ ਕਰਨ ਵਾਲੇ ਵ੍ਹਿਸਲਬਲੋਅਰ ਜੋਸ਼ੂਆ ਡੀਨ ਦੀ ਵੀਰਵਾਰ ਨੂੰ ਮੌਤ ਹੋ ਗਈ। ਅਮਰੀਕਾ ਦੇ ਕੇਸਾਸ ਰਾਜ ਵਿੱਚ ਰਹਿਣ ਵਾਲੇ ਜੋਸ਼ੂਆ ਦੀ ਉਮਰ 45 ਸਾਲ ਸੀ ਅਤੇ ਉਹ ਬੋਇੰਗ ਦੀ ਸਪਲਾਇਰ ਕੰਪਨੀ ਸਪਿਰਿਟ ਵਿੱਚ ਕੁਆਲਿਟੀ ਆਡੀਟਰ ਵਜੋਂ ਕੰਮ ਕਰਦੇ ਸਨ। ਉਸ ਦੇ ਵਕੀਲ ਅਤੇ ਪਰਿਵਾਰ ਨੇ ਕਿਹਾ ਕਿ ਡੀਨ ਦੀ ਮੌਤ ਦਾ ਕਾਰਨ ਚਮੜੀ ਦੀ ਗੰਭੀਰ ਲਾਗ ਸੀ। ਬੋਇੰਗ ਦੇ ਦੁਨੀਆਂ ਭਰ ਵਿੱਚ 10 ਹਜ਼ਾਰ ਤੋਂ ਵੱਧ ਜਹਾਜ਼ ਹਨ।
ਇਸ ਤੋਂ ਪਹਿਲਾਂ ਮਾਰਚ ਵਿੱਚ ਇਸ ਕੇਸ ਨਾਲ ਸਬੰਧਤ ਇੱਕ ਗਵਾਹ ਜੌਨ ਬਰਨੇਟ ਨੇ ਖ਼ੁਦ ਨੂੰ ਗੋਲੀ ਮਾਰ ਕੇ ਖ਼ੁਦਕੁਸ਼ੀ ਕਰ ਲਈ ਸੀ।
ਉਨ੍ਹਾਂ ਦੀ ਮਾਂ ਨੇ 26 ਅਪ੍ਰੈਲ ਨੂੰ ਇੱਕ ਪੋਸਟ ਵਿੱਚ ਕਿਹਾ ਸੀ ਕਿ ਡੀਨ ਆਪਣੀ ਜਿ਼ੰਦਗੀ ਲਈ ਲੜ ਰਹੇ ਹਨ। ਉਨ੍ਹਾਂ ਨੂੰ ਸਕਿਨ ਇਨਫੈਕਸ਼ਨ ਕਾਰਨ ਸਾਹ ਲੈਣ 'ਚ ਦਿੱਕਤ ਆ ਰਹੀ ਸੀ, ਜਿਸ ਲਈ ਉਨ੍ਹਾਂ ਦਾ ਦੋ ਹਫਤੇ ਤੱਕ ਹਸਪਤਾਲ 'ਚ ਇਲਾਜ ਚੱਲ ਰਿਹਾ ਸੀ। ਪਿਛਲੇ ਦੋ ਮਹੀਨਿਆਂ ਵਿੱਚ ਬੋਇੰਗ ਨਾਲ ਸਬੰਧਤ ਕਿਸੇ ਵ੍ਹਿਸਲਬਲੋਅਰ ਦੀ ਇਹ ਦੂਜੀ ਮੌਤ ਹੈ। ਉਹ ਜੌਨ ਬਰਨੇਟ ਦੀ ਮੌਤ ਦੇ ਗਵਾਹ ਸਨ।
ਅਕਤੂਬਰ 2022 ਵਿੱਚ, ਡੀਨ ਨੇ ਬੋਇੰਗ ਦੇ ਜਹਾਜ਼ ਮੈਕਸ 737 ਵਿੱਚ ਨਿਰਮਾਣ ਦੀਆਂ ਗਲਤੀਆਂ ਵੱਲ ਧਿਆਨ ਦਿੱਤਾ ਸੀ। ਉਨ੍ਹਾਂ ਮੁਤਾਬਕ ਬੋਇੰਗ ਜਹਾਜ਼ ਵਿੱਚ ਪ੍ਰੈਸ਼ਰ ਬਲਕਹੈੱਡ ਲਗਾਉਣ ਲਈ ਗਲਤ ਤਰੀਕੇ ਨਾਲ ਛੇਕ ਕੀਤੇ ਗਏ ਹਨ। ਇਹ ਬਲਕਹੈੱਡ ਕੈਬਿਨ ਪ੍ਰੈਸ਼ਰ ਲਈ ਜਿ਼ੰਮੇਵਾਰ ਹੁੰਦੇ ਹਨ।