ਮਾਰਖਮ, 15 ਮਈ (ਪੋਸਟ ਬਿਊਰੋ) :ਯੌਰਕ ਰੀਜਨਲ ਪੁਲਿਸ ਨੇ ਦੱਸਿਆ ਕਿ ਨਸੇ਼ ਦੀ ਹਾਲਤ ਵਿੱਚ ਗੱਡੀ ਚਲਾ ਰਹੇ ਇੱਕ ਵਿਅਕਤੀ ਨੇ ਐਤਵਾਰ ਨੂੰ ਮਾਰਖਮ ਦੇ ਇੱਕ ਸਕੂਲ ਦੇ ਪਲੇਅਗ੍ਰਾਊਂਡ ਵਿੱਚ ਗੱਡੀ ਵਾੜ ਕੇ ਇੱਕ ਨੌਂ ਸਾਲਾ ਬੱਚੇ ਨੂੰ ਟੱਕਰ ਮਾਰ ਕੇ ਜ਼ਖ਼ਮੀ ਕਰ ਦਿੱਤਾ।
ਪੁਲਿਸ ਨੇ ਦੱਸਿਆ ਕਿ ਇਹ ਹਾਦਸਾ ਰਾਤੀਂ 8:35 ਉੱਤੇ ਬੈਕੇਟ ਐਵਨਿਊ ਵਿੱਚ ਹੋਇਆ। ਜਾਂਚਕਾਰਾਂ ਨੇ ਦੱਸਿਆ ਕਿ ਕਾਲੇ ਰੰਗ ਦੀ ਮਿਸੁਬਿਸ਼ੀ ਐਸਯੂਵੀ ਤੇਜ਼ ਰਫਤਾਰ ਨਾਲ ਦਰਵਾਜ਼ੇ ਨੂੰ ਤੋੜਦੀ ਹੋਈ ਪਲੇਅਗ੍ਰਾਊਂਡ ਵਿੱਚ ਦਾਖਲ ਹੋ ਗਈ ਤੇ ਬੱਚੇ ਨਾਲ ਜਾ ਟਕਰਾਈ।ਬੱਚੇ ਨੂੰ ਜ਼ਖ਼ਮੀ ਹਾਲਤ ਵਿੱਚ ਛੱਡ ਕੇ ਡਰਾਈਵਰ ਤੇਜ਼ ਰਫਤਾਰ ਨਾਲ ਗੱਡੀ ਨੂੰ ਉੱਥੋਂ ਭਜਾ ਕੇ ਲੈ ਗਿਆ। ਬਾਅਦ ਵਿੱਚ ਬੱਚੇ ਨੂੰ ਹਸਪਤਾਲ ਲਿਜਾਇਆ ਗਿਆ। ਬੱਚੇ ਨੂੰ ਬਹੁਤੀਆਂ ਗੰਭੀਰ ਸੱਟਾਂ ਨਹੀਂ ਸਨ ਲੱਗੀਆਂ।
ਅੱਧੇ ਘੰਟੇ ਬਾਅਦ ਪੁਲਿਸ ਨੂੰ ਉਸੇ ਗੱਡੀ ਦੇ ਮਾਰਖਮ ਵਿੱਚ ਵਿੰਸਟਨ ਕਾਸਲ ਡਰਾਈਵ ਉੱਤੇ ਕਿਸੇ ਰਿਹਾਇਸ਼ੀ ਲਾਅਨ ਵਿੱਚ ਲੱਗੇ ਰੁੱਖ ਨਾਲ ਟਕਰਾਉਣ ਦੀ ਜਾਣਕਾਰੀ ਮਿਲੀ। ਪੁਲਿਸ ਜਦੋਂ ਮੌਕੇ ਉੱਤੇ ਪਹੁੰਚੀ ਤਾਂ ਇੱਕ ਪੁਰਸ਼ ਡਰਾਈਵਰ ਬੇਸੁੱਧ ਡਰਾਈਵਰ ਵਾਲੀ ਸੀਟ ਉੱਤੇ ਪਿਆ ਸੀ।ਗੱਡੀ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਤੇ ਮਸ਼ਕੂਕ ਨੂੰ ਗੱਡੀ ਕੱਟ ਕੇ ਬਾਹਰ ਕੱਢਿਆ ਗਿਆ ਤੇ ਹਿਰਾਸਤ ਵਿੱਚ ਲਿਆ ਗਿਆ। ਉਸ ਨੂੰ ਹਸਪਤਾਲ ਵੀ ਲਿਜਾਇਆ ਗਿਆ ਜਿੱਥੇ ਪਤਾ ਲੱਗਿਆ ਕਿ ਉਸ ਨੇ ਲੋੜੋਂ ਵੱਧ ਨਸ਼ਾ ਕੀਤਾ ਹੋਇਆ ਸੀ। ਟੋਰਾਂਟੋ ਦੇ 45 ਸਾਲਾ ਗਫਰੀਜੀਓ ਮਰੀਅਲ ਨੂੰ ਹਾਦਸੇ ਤੋਂ ਬਾਅਦ ਨਾ ਰੁਕਣ, ਖਤਰਨਾਕ ਡਰਾਈਵਿੰਗ ਤੇ ਨਸ਼ਾ ਕਰਕੇ ਗੱਡੀ ਚਲਾਉਣ ਲਈ ਚਾਰਜ ਕੀਤਾ ਗਿਆ ਹੈ।