ਐਜ਼ਮਾਰਿਨ, ਸੀਰੀਆ, 6 ਫਰਵਰੀ (ਪੋਸਟ ਬਿਊਰੋ) : ਸੋਮਵਾਰ ਸਵੇਰੇ ਤੁਰਕੀ ਤੇ ਸੀਰੀਆ ਵਿੱਚ ਆਏ ਜ਼ਬਰਦਸਤ ਭੂਚਾਲ ਕਾਰਨ 1500 ਤੋਂ ਵੱਧ ਲੋਕਾਂ ਦੇ ਮਾਰੇ ਜਾਣ ਦਾ ਖਦਸ਼ਾ ਹੈ ਜਦਕਿ ਇਸ ਦੌਰਾਨ ਕਈ ਬਿਲਡਿੰਗਾਂ ਨੂੰ ਵੀ ਨੁਕਸਾਨ ਪਹੁੰਚਿਆ। ਅਜੇ ਵੀ ਸੈਂਕੜੇ ਲੋਕਾਂ ਦੇ ਮਲਬੇ ਹੇਠਾਂ ਦੱਬੇ ਹੋਣ ਦਾ ਖਦਸ਼ਾ ਹੈ। ਰੈਸਕਿਊ ਵਰਕਰਜ਼ ਵੱਲੋਂ ਲੋਕਾਂ ਨੂੰ ਬਚਾਉਣ ਦਾ ਕੰਮ ਜੰਗੀ ਪੱਧਰ ਉੱਤੇ ਜਾਰੀ ਹੈ।
ਸਰਹੱਦ ਦੇ ਦੋਵਾਂ ਪਾਸਿਆਂ ਉੱਤੇ ਸਵੇਰ ਹੋਣ ਤੋਂ ਪਹਿਲਾਂ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਰਿਕਟਰ ਪੈਮਾਨੇ ਉੱਤੇ ਭੂਚਾਲ ਦੀ ਗਤੀ 7·8 ਮਾਪੀ ਗਈ। ਝਟਕਿਆਂ ਕਾਰਨ ਲੋਕ ਅੱਬੜਵਾਹੇ ਉੱਠ ਕੇ ਘਰਾਂ ਤੋਂ ਬਾਹਰ ਨੂੰ ਭੱਜੇ ਤਾਂ ਉਨ੍ਹਾਂ ਦਾ ਸਾਹਮਣਾ ਠੰਢ, ਮੀਂਹ ਤੇ ਬਰਫੀਲੀ ਰਾਤ ਨਾਲ ਹੋਇਆ। ਕਈ ਇਮਾਰਤਾਂ ਚਰਮਰਾ ਕੇ ਢਹਿ ਢੇਰੀ ਹੋ ਗਈਆਂ। ਇਸ ਤੋਂ ਬਾਅਦ ਵੀ ਭੂਚਾਲ ਤੋਂ ਬਾਅਦ ਵਾਲੇ ਕਈ ਹਲਕੇ ਝਟਕੇ ਲੰਮੇਂ ਸਮੇਂ ਤੱਕ ਮਹਿਸੂਸ ਹੁੰਦੇ ਰਹੇ। ਤੁਰਕੀ ਵਿੱਚ ਇੱਕ ਹਸਪਤਾਲ ਦੀ ਇਮਾਰਤ ਹੀ ਡਿੱਗ ਗਈ ਤੇ ਇਸੇ ਤਰ੍ਹਾਂ ਸੀਰੀਆ ਦੇ ਇੱਕ ਹਸਪਤਾਲ ਨੂੰ ਪਹੁੰਚੇ ਵੱਡੇ ਨੁਕਸਾਨ ਤੋਂ ਬਾਅਦ ਮਰੀਜ਼ਾਂ, ਜਿਨ੍ਹਾਂ ਵਿੱਚ ਨਵਜੰਮੇਂ ਬੱਚੇ ਵੀ ਸਨ, ਨੂੰ ਜਲਦੀ ਤੋਂ ਜਲਦੀ ਬਾਹਰ ਕੱਢਿਆ ਗਿਆ।
ਭੂਚਾਲ ਦਾ ਕੇਂਦਰ ਤੁਰਕੀ ਦੀ ਪ੍ਰੋਵਿੰਸ਼ੀਅਲ ਰਾਜਧਾਨੀ ਗੈਜ਼ੀਆਨਤੇਪ ਵਿੱਚ ਸੀ ਤੇ ਝਟਕੇ ਕਾਹਿਰਾ ਤੱਕ ਮਹਿਸੂਸ ਕੀਤੇ ਗਏ। ਡੈਮਸਕਸ ਤੇ ਬੈਰੂਤ ਵਿੱਚ ਵੀ ਭੂਚਾਲ ਦੇ ਝਟਕੇ ਮਹਿਸੂਸ ਹੋਣ ਤੋਂ ਬਾਅਦ ਲੋਕ ਸੜਕਾਂ ਉੱਤੇ ਨਿਕਲ ਆਏ।ਯੂਐਸ ਜੀਓਲੌਜੀਕਲ ਸਰਵੇਅ ਵੱਲੋਂ ਇਸ ਭੂਚਾਲ ਤੋਂ ਬਾਅਦ ਇਸ ਦੇ ਕੇਂਦਰ ਤੋਂ 100 ਕਿਲੋਮੀਟਰ ਦੀ ਦੂਰੀ ਉੱਤੇ 7·5 ਦੀ ਗਤੀ ਦਾ ਇੱਕ ਹੋਰ ਭੂਚਾਲ ਆਇਆ ਵੀ ਦੱਸਿਆ ਗਿਆ। ਅਧਿਕਾਰੀਆਂ ਵੱਲੋਂ ਇਹ ਦਾਅਵਾ ਕੀਤਾ ਗਿਆ ਹੈ ਕਿ ਇਹ ਭੂਚਾਲ ਤੋਂ ਬਾਅਦ ਵਾਲੇ ਹਲਕੇ ਝਟਕੇ ਨਹੀਂ ਸਗੋਂ ਵੱਖਰਾ ਭੂਚਾਲ ਸੀ।