ਓਨਟਾਰੀਓ, 6 ਫਰਵਰੀ (ਪੋਸਟ ਬਿਊਰੋ) : ਬਫਲੋ, ਨਿਊ ਯੌਰਕ ਨੇੜੇ ਆਏ ਭੂਚਾਲ ਤੋਂ ਬਾਅਦ ਸੋਮਵਾਰ ਸਵੇਰੇ ਕੁੱਝ ਓਨਟਾਰੀਓ ਵਾਸੀਆਂ ਨੂੰ ਆਪਣੇ ਘਰਾਂ ਵਿੱਚੋਂ ਬਾਹਰ ਨਿਕਲਣਾ ਪਿਆ।
ਅਰਥਕੁਏਕਸ ਕੈਨੇਡਾ ਵੱਲੋਂ ਭੂਚਾਲ ਦੀ ਗਤੀ 4·2 ਮਾਪੀ ਗਈ। ਇਹ ਵੀ ਦੱਸਿਆ ਗਿਆ ਕਿ ਭੂਚਾਲ ਬਫਲੋ ਦੇ ਨੇੜੇ ਤੇੜੇ ਸਵੇਰੇ 6:15 ਉੱਤੇ ਆਇਆ।ਬਾਅਦ ਵਿੱਚ ਯੂਐਸ ਜੀਓਲੌਜੀਕਲ ਸਰਵੇਅ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਕਿ ਇਸ ਭੂਚਾਲ ਦੀ ਗਤੀ 3·8 ਸੀ ਤੇ ਇਹ ਬਫਲੋ ਤੋਂ ਦੱਖਣ ਵੱਲ ਵੈਸਟ ਸੈਨੇਕਾ, ਨਿਊ ਯੌਰਕ ਵਿੱਚ ਜ਼ਮੀਨ ਤੋਂ 3 ਕਿਲੋਮੀਟਰ ਹੇਠਾਂ ਆਇਆ ਸੀ।
ਟਵਿੱਟਰ ਉੱਤੇ ਕਈ ਕੈਨੇਡੀਅਨਜ਼ ਵੱਲੋਂ ਭੂਚਾਲ ਦੇ ਝਟਕੇ ਨਾਇਗਰਾ ਫਾਲਜ਼ ਤੇ ਸੇਂਟ ਕੈਥਰੀਨਜ਼ ਇਲਾਕਿਆਂ ਵਿੱਚ ਮਹਿਸੂਸ ਕਰਨ ਦੀ ਗੱਲ ਵੀ ਆਖੀ ਗਈ। ਇੱਕ ਵਿਅਕਤੀ ਨੇ ਦੱਸਿਆ ਕਿ ਉਹ ਸੇਂਟ ਕੈਥਰੀਨਜ਼ ਵਿੱਚ ਬਰੌਕ ਯੂਨੀਵਰਸਿਟੀ ਨੇੜੇ ਰਹਿੰਦਾ ਹੈ ਤੇ ਉਸ ਨੂੰ ਲੱਗਿਆ ਕਿ ਕੋਈ ਵਿਅਕਤੀ ਉਸ ਦੇ ਘਰ ਦੀ ਛਤ ਉੱਤੇ ਜ਼ੋਰ ਜ਼ੋਰ ਨਾਲ ਟੱਪ ਰਿਹਾ ਹੈ।
ਇਸ ਦੌਰਾਨ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਖਬਰ ਨਹੀਂ ਹੈ। ਭੂਚਾਲ ਨਾਲ ਕਿਸੇ ਤਰ੍ਹਾਂ ਦਾ ਮਾਲੀ ਨੁਕਸਾਨ ਹੋਣ ਦੀ ਵੀ ਕੋਈ ਖਬਰ ਨਹੀਂ ਮਿਲੀ ਹੈ।