ਇਸਲਾਮਾਬਾਦ, 5 ਫਰਵਰੀ (ਪੋਸਟ ਬਿਊਰੋ) - ਪਾਕਿਸਤਾਨ ਦੇ ਸਾਬਕਾ ਰਾਸਟਰਪਤੀ ਜਨਰਲ ਪਰਵੇਜ਼ ਮੁਸ਼ੱਰਫ਼ ਦਾ 79 ਸਾਲ ਦੀ ਉਮਰ ਵਿਚ ਦੇਹਾਂਤ ਹੋ ਗਿਆ ਹੈ। ਮੁਸ਼ੱਰਫ਼ ਦਾ ਜਨਮ 11 ਅਗਸਤ, 1943 ਨੂੰ ਦਿੱਲੀ ’ਚ ਹੋਇਆ ਸੀ। ਉਨ੍ਹਾਂ ਆਪਣੇ ਸ਼ੁਰੂਆਤੀ ਸਾਲ-1949 ਤੋਂ 1956 ਤੱਕ-ਤੁਰਕੀ ਵਿਚ ਬਿਤਾਏ, ਕਿਉਂਕਿ ਉਨ੍ਹਾਂ ਦੇ ਪਿਤਾ ਸਈਦ ਮੁਸ਼ੱਰਫ਼ੂਦੀਨ ਅੰਕਾਰਾ ਵਿਚ ਤਾਇਨਾਤ ਸਨ। ਤੁਰਕੀ ਤੋਂ ਵਾਪਸ ਆਉਣ ਤੋਂ ਬਾਅਦ ਉਨ੍ਹਾਂ ਸੇਂਟ ਪੈਟਿ੍ਰਕ ਹਾਈ ਸਕੂਲ, ਕਰਾਚੀ ਅਤੇ ਫਿਰ ਐੱਫ਼.ਸੀ. ਕਾਲਜ, ਲਾਹੌਰ ਵਿਚ ਵਿਦਿਆ ਹਾਸਿਲ ਕੀਤੀ। ਉਹ 1961 ਵਿੱਚ ਪਾਕਿਸਤਾਨੀ ਫੌਜ ਵਿਚ ਭਰਤੀ ਹੋਏ। ਮੁਸ਼ੱਰਫ਼ ਨੇ 1965 ਦੀ ਭਾਰਤ-ਪਾਕਿਸਤਾਨ ਜੰਗ ਵਿਚ ਇਕ ਜਵਾਨ ਅਫ਼ਸਰ ਵਜੋਂ ਲੜੀ ਸੀ ਅਤੇ ਇਕ ਕਮਾਂਡਰ ਵਜੋਂ 1971 ਦੀ ਭਾਰਤ-ਪਾਕਿਸਤਾਨ ਜੰਗ ਵਿਚ ਵੀ ਹਿੱਸਾ ਲਿਆ ਸੀ।
ਕਾਰਗਿਲ ਯੁੱਧ ਦੇ ਆਰਕੀਟੈਕਟ ਅਤੇ ਪਾਕਿਸਤਾਨ ਦੇ ਸਾਬਕਾ ਰਾਸਟਰਪਤੀ ਜਨਰਲ ਪਰਵੇਜ ਮੁਸੱਰਫ ਨੇ 1999 ਵਿੱਚ ਇੱਕ ਫੌਜੀ ਤਖਤਾਪਲਟ ਵਿੱਚ ਲੋਕਤੰਤਰੀ ਤੌਰ ‘ਤੇ ਚੁਣੀ ਗਈ ਸਰਕਾਰ ਨੂੰ ਡੇਗ ਦਿੱਤਾ ਅਤੇ ਨੌਂ ਸਾਲ ਤੱਕ ਦੇਸ਼ ’ਤੇ ਰਾਜ ਕੀਤਾ। ਇਸ ਦੌਰਾਨ ਉਨ੍ਹਾਂ ਆਪਣੇ ਆਪ ਨੂੰ ਇੱਕ ਪ੍ਰਗਤੀਸੀਲ ਮੁਸਲਿਮ ਨੇਤਾ ਵਜੋਂ ਪੇਸ਼ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ।
ਦਿੱਲੀ ਦੇ ਇੱਕ ਮੱਧ-ਵਰਗੀ ਪਰਿਵਾਰ ਵਿਚ ਪੈਦਾ ਹੋਏ ਮੁਸ਼ੱਰਫ਼ ਵੰਡ ਤੋਂ ਬਾਅਦ 1947 ਵਿਚ ਪਾਕਿਸਤਾਨ ਚਲੇ ਗਏ ਸਨ। ਉਨ੍ਹਾਂ ਨੇ ਸੰਯੁਕਤ ਅਰਬ ਅਮੀਰਾਤ ਵਿਚ ਆਪਣੇ ਆਖਰੀ ਸਾਲ ਬਿਮਾਰੀ ਨਾਲ ਜੂਝਦੇ ਹੋਏ ਬਿਤਾਏ। ਮੁਸ਼ੱਰਫ਼ ਦਾ ਲੰਮੀ ਬਿਮਾਰੀ ਤੋਂ ਬਾਅਦ ਐਤਵਾਰ ਨੂੰ ਖਾੜੀ ਦੇਸ਼ ਵਿਚ ਦੇਹਾਂਤ ਹੋ ਗਿਆ। ਉਹ 79 ਸਾਲ ਦੇ ਸਨ।
ਸੇਵਾਮੁਕਤ ਜਨਰਲ ਮੁਸ਼ੱਰਫ਼ ਕਾਰਗਿਲ ਯੁੱਧ ਦੇ ਮੁੱਖ ਆਰਕੀਟੈਕਟ ਸਨ, ਜੋ ਕਿ ਉਸ ਸਮੇਂ ਦੇ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ ਵਲੋਂ ਲਾਹੌਰ ਵਿਚ ਆਪਣੇ ਭਾਰਤੀ ਹਮਰੁਤਬਾ ਅਟਲ ਬਿਹਾਰੀ ਵਾਜਪਾਈ ਨਾਲ ਇਤਿਹਾਸਕ ਸ਼ਾਂਤੀ ਸਮਝੌਤੇ ’ਤੇ ਹਸਤਾਖਰ ਕੀਤੇ ਜਾਣ ਤੋਂ ਕੁਝ ਮਹੀਨਿਆਂ ਬਾਅਦ ਹੋਈ ਸੀ।
ਕਾਰਗਿਲ ਵਿਚ ਹਾਰ ਤੋਂ ਬਾਅਦ, ਮੁਸ਼ੱਰਫ਼ ਨੇ 1999 ਵਿਚ ਇੱਕ ਖੂਨ-ਰਹਿਤ ਤਖਤਾਪਲਟ ਵਿੱਚ ਤਤਕਾਲੀ ਪ੍ਰਧਾਨ ਮੰਤਰੀ ਸ਼ਰੀਫ਼ ਦਾ ਤਖਤਾ ਪਲਟ ਦਿੱਤਾ ਅਤੇ 1999 ਤੋਂ 2008 ਤੱਕ ਵੱਖ-ਵੱਖ ਸਮਰੱਥਾਵਾਂ ਵਿਚ ਪਾਕਿਸਤਾਨ ’ਤੇ ਰਾਜ ਕੀਤਾ। ਮੁਸ਼ੱਰਫ਼ ਨੇ ਪਾਕਿਸਤਾਨ ਵਿਚ ਸ਼ੁਰੂ ਵਿਚ ਮੁੱਖ ਕਾਰਜਕਾਰੀ ਅਤੇ ਬਾਅਦ ਵਿਚ ਰਾਸਟਰਪਤੀ ਵਜੋਂ ਸ਼ਾਸਨ ਕੀਤਾ।