ਮੈਲਬਰਨ, 29 ਜਨਵਰੀ (ਪੋਸਟ ਬਿਊਰੋ)-ਇਕ ਰੇਡੀਓਐਕਟਿਵ ਕੈਪਸੂਲ ਦੇ ਗੁੰਮ ਹੋਣ ਕਾਰਨ ਪੱਛਮੀ ਆਸਟ੍ਰੇਲੀਆ ਵਿੱਚ ਹਲਚਲ ਮਚ ਗਈ ਹੈ। ਜਲਦਬਾਜ਼ੀ ਵਿੱਚ ਪੱਛਮੀ ਆਸਟ੍ਰੇਲੀਆ ਦੇ ਕਈ ਹਿੱਸਿਆਂ ਵਿੱਚ ਰੇਡੀਏਸ਼ਨ ਅਲਰਟ ਜਾਰੀ ਕੀਤਾ ਗਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਪਰਥ ਵਿਚ ਮਾਈਨਿੰਗ ਵਿਚ ਵਰਤਿਆ ਜਾਣ ਵਾਲਾ ਇਕ ਰੇਡੀਓਐਕਟਿਵ ਕੈਪਸੂਲ ਗਾਇਬ ਹੋ ਗਿਆ ਹੈ।
ਏਜੰਸੀ ਦੇ ਅਨੁਸਾਰ, ਫਾਇਰ ਬਿ੍ਰਗੇਡ ਅਤੇ ਐਮਰਜੈਂਸੀ ਸੇਵਾਵਾਂ ਵਿਭਾਗ ਨੇ ਕਿਹਾ ਕਿ ਸੀਜੀਅਮ -137 ਵਾਲਾ ਇੱਕ ਛੋਟਾ ਕੈਪਸੂਲ ਨਿਊਮੈਨ ਦੇ ਉੱਤਰ ਵਿਚ ਆਵਾਜਾਈ ਦੌਰਾਨ ਗੁੰਮ ਹੋ ਗਿਆ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਘਟਨਾ ਕਿੰਬਰਲੇ ਦੇ ਇੱਕ ਛੋਟੇ ਜਿਹੇ ਕਸਬੇ ਵਿੱਚ ਵਾਪਰੀ ਹੈ।
ਏਜੰਸੀ ਨੇ ਕਿਹਾ ਕਿ ਇਸ ਰੇਡੀਓਐਕਟਿਵ ਕੈਪਸੂਲ ਦੀ ਵਰਤੋਂ ਮਾਈਨਿੰਗ ਕਾਰਜਾਂ ‘ਚ ਗੇਜ ਦੇ ਅੰਦਰ ਕੀਤੀ ਜਾਂਦੀ ਹੈ। ਇਸ ਪਦਾਰਥ ਦੇ ਸੰਪਰਕ ਵਿੱਚ ਆਉਣ ਨਾਲ ਜਲਨ ਜਾਂ ਗੰਭੀਰ ਬੀਮਾਰੀ ਹੋ ਸਕਦੀ ਹੈ। ਰਾਜ ਦੀ ਸਿਹਤ ਏਜੰਸੀ ਨੇ ਕਿਹਾ ਕਿ ਕੈਪਸੂਲ ਨੂੰ ਇੱਕ ਟਰੱਕ ਵਿਚ ਇਕ ਖਾਨ ਤੋਂ ਸਟੋਰੇਜ ਸਹੂਲਤ ਤੱਕ ਲਿਜਾਇਆ ਜਾ ਰਿਹਾ ਸੀ। ਇਸ ਦੌਰਾਨ ਉਹ ਗਾਇਬ ਹੋ ਗਿਆ। ਨਿਊਮੈਨ ਪਰਥ ਤੋਂ ਲਗਭਗ 1,200 ਕਿਲੋਮੀਟਰ ਉੱਤਰ-ਪੂਰਬ ਵਿੱਚ ਸਥਿਤ ਹੈ। ਪੱਛਮੀ ਆਸਟ੍ਰੇਲੀਆ ਦੇ ਮੁੱਖ ਸਿਹਤ ਅਧਿਕਾਰੀ ਐਂਡਰਿਊ ਰੌਬਰਟਸਨ ਨੇ ਕਿਹਾ ਕਿ ਜੇਕਰ ਕੈਪਸੂਲ ਨੂੰ ਸਰੀਰ ਦੇ ਨੇੜੇ ਰੱਖਿਆ ਜਾਂਦਾ ਹੈ, ਤਾਂ ਇਹ ਚਮੜੀ ਦੀ ਲਾਲੀ ਅਤੇ ਰੇਡੀਓ ਐਕਟਿਵ ਬਰਨ ਦਾ ਕਾਰਨ ਬਣ ਸਕਦਾ ਹੈ।