ਨਾਸਿਕ, 29 ਜਨਵਰੀ (ਪੋਸਟ ਬਿਊਰੋ)- ਨਾਸਿਕ ਦੇ ਸਤਪੁਰ ਇਲਾਕੇ ਦੇ ਰਾਧਾਕਿ੍ਰਸ਼ਨ ਨਗਰ ਵਿੱਚ ਇੱਕ ਹੈਰਾਨੀਜਨਕ ਘਟਨਾ ਸਾਹਮਣੇ ਆਈ ਹੈ। ਜਿੱਥੇ ਇੱਕ ਵਪਾਰੀ ਪਰਿਵਾਰ ਦੇ ਤਿੰਨ ਲੋਕਾਂ ਨੇ ਖੁਦਕੁਸੀ ਕਰ ਲਈ। ਦੋਵਾਂ ਨੌਜਵਾਨਾਂ ਨੇ ਆਪਣੇ ਪਿਤਾ ਨਾਲ ਮਿਲ ਕੇ ਘਰ ਦੇ ਤਿੰਨ ਵੱਖ-ਵੱਖ ਕਮਰਿਆਂ ’ਚ ਫਾਹਾ ਲੈ ਲਿਆ। ਸੂਚਨਾ ਮਿਲਦੇ ਹੀ ਇਲਾਕੇ ’ਚ ਹੜਕੰਪ ਮਚ ਗਿਆ। ਤੁਰੰਤ ਪੁਲਸ ਨੂੰ ਸੂਚਨਾ ਦਿੱਤੀ ਗਈ। ਮੌਕੇ ‘ਤੇ ਪਹੁੰਚੀ ਪੁਲਸ ਨੇ ਲਾਸ਼ਾਂ ਨੂੰ ਕਬਜ਼ੇ ’ਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲਸ ਇਸ ਨੂੰ ਖੁਦਕੁਸ਼ੀ ਦਾ ਮਾਮਲਾ ਮੰਨ ਰਹੀ ਹੈ।
ਸਤਪੁਰ ਪੁਲਸ ਅਨੁਸਾਰ ਖੁਦਕੁਸ਼ੀ ਕਰਨ ਵਾਲਿਆਂ ਦੇ ਨਾਮ ਦੀਪਕ ਸ਼ਿਰੋੜੇ (ਪਿਤਾ ਉਮਰ 55 ਸਾਲ), ਪ੍ਰਸਾਦ ਸ਼ਿਰੋੜੇ (ਵੱਡਾ ਪੁੱਤਰ ਉਮਰ 25 ਸਾਲ), ਰਾਕੇਸ ਸ਼ਿਰੋੜੇ (ਉਮਰ 23 ਸਾਲ) ਹਨ। ਤਿੰਨਾਂ ਨੇ ਇਕੋ ਘਰ ਦੇ ਤਿੰਨ ਵੱਖ-ਵੱਖ ਕਮਰਿਆਂ ਵਿੱਚ ਛੱਤ ਵਾਲੇ ਪੱਖੇ ਨਾਲ ਫਾਹਾ ਲੈ ਕੇ ਖੁਦਕੁਸੀ ਕਰ ਲਈ। ਸ਼ਿਰੋੜੇ ਪਰਿਵਾਰ ਅਸ਼ੋਕਨਗਰ ਦੇ ਆਖਰੀ ਬੱਸ ਸਟਾਪ ਇਲਾਕੇ ’ਚ ਫਲਾਂ ਦਾ ਕਾਰੋਬਾਰ ਕਰਦਾ ਸੀ। ਘਰ ਦੇ ਵੱਡੇ ਬੇਟੇ ਪ੍ਰਸਾਦ ਸ਼ਿਰੋੜੇ ਦੀ ਪਤਨੀ ਗਰਭਵਤੀ ਹੋਣ ਕਾਰਨ ਮੁੰਬਈ ਗਈ ਹੋਈ ਸੀ। ਅੱਜ ਸਵੇਰੇ ਉਸ ਦੀ ਡਿਲੀਵਰੀ ਹੋਈ ਅਤੇ ਉਸ ਨੇ ਬੇਟੀ ਨੂੰ ਜਨਮ ਦਿੱਤਾ।
ਜਾਣਕਾਰੀ ਮੁਤਾਬਕ ਪਰਿਵਾਰ ਮੂਲ ਰੂਪ ਵਿਚ ਦੇਵਲਾ ਤਾਲੁਕਾ ਦੇ ਉਮਰਾਣੇ ਦਾ ਰਹਿਣ ਵਾਲਾ ਹੈ। ਪਿਛਲੇ 10 ਸਾਲਾਂ ਤੋਂ ਉਹ ਕਾਰੋਬਾਰ ਦੇ ਸਿਲਸਿਲੇ ’ਚ ਨਾਸਿਕ ਆਇਆ ਹੋਇਆ ਸੀ। ਉਨ੍ਹਾਂ ਦਾ ਘਰ ਰਾਧਾਕਿ੍ਰਸ਼ਨ ਨਗਰ ਇਲਾਕੇ ਵਿਚ ਹੈ। ਪਿਤਾ ਦੀਪਕ ਅਸ਼ੋਕ ਨਗਰ ਦੇ ਆਖਰੀ ਬੱਸ ਅੱਡੇ ’ਤੇ ਸਬਜੀ ਮੰਡੀ ਨੇੜੇ ਫਲ ਵੇਚਣ ਦਾ ਕੰਮ ਕਰਦਾ ਸੀ। ਉਸ ਦੇ ਪੁੱਤਰ ਪ੍ਰਸਾਦ ਅਤੇ ਰਾਕੇਸ਼ ਸ਼ਿਵਾਜੀ ਨਗਰ ਇਲਾਕੇ ’ਚ ਚਾਰ ਪਹੀਆ ਵਾਹਨਾਂ ’ਤੇ ਫਲ ਵੇਚਦੇ ਸਨ।
ਦੱਸਿਆ ਜਾ ਰਿਹਾ ਹੈ ਕਿ ਪਰਿਵਾਰ ਦੀ ਆਰਥਿਕ ਹਾਲਤ ਖਰਾਬ ਹੋਣ ਕਾਰਨ ਉਹ ਕਰਜਾਈ ਸੀ। ਜਿਸ ਕਾਰਨ ਉਹ ਚਿੰਤਤ ਸਨ। ਐਤਵਾਰ ਦੁਪਹਿਰ ਪਰਿਵਾਰ ਦੇ ਹੋਰ ਮੈਂਬਰ ਕਿਸੇ ਕੰਮ ਲਈ ਬਾਹਰ ਗਏ ਹੋਏ ਸਨ। ਇਸ ਦੌਰਾਨ ਦੋਵੇਂ ਪੁੱਤਰਾਂ ਨੇ ਆਪਣੇ ਪਿਤਾ ਨਾਲ ਮਿਲ ਕੇ ਫਾਹਾ ਲੈ ਕੇ ਖੁਦਕੁਸੀ ਕਰਨ ਦਾ ਫੈਸਲਾ ਕੀਤਾ। ਜਦੋਂ ਪਰਿਵਾਰਕ ਮੈਂਬਰ ਆਏ ਤਾਂ ਉਨ੍ਹਾਂ ਨੇ ਦਰਵਾਜਾ ਖੜਕਾਇਆ। ਪਰ ਅੰਦਰੋਂ ਕਿਸੇ ਨੇ ਦਰਵਾਜਾ ਨਹੀਂ ਖੋਲ੍ਹਿਆ। ਜਿਸ ਤੋਂ ਬਾਅਦ ਉਸ ਨੇ ਆਸਪਾਸ ਦੇ ਲੋਕਾਂ ਨੂੰ ਬੁਲਾਇਆ ਤਾਂ ਘਰ ਦਾ ਦਰਵਾਜਾ ਤੋੜਿਆ ਗਿਆ। ਜਿਸ ਤੋਂ ਬਾਅਦ ਸਾਰਿਆਂ ਨੇ ਤਿੰਨਾਂ ਨੂੰ ਫਾਹੇ ਨਾਲ ਲਟਕਦੇ ਦੇਖਿਆ।