ਬਰੈਂਪਟਨ, 26 ਜਨਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਹਾਊਸਿੰਗ ਸਪਲਾਈ ਦੇ ਸੰਕਟ ਤੇ ਇਸ ਦੇ ਬਰੈਂਪਟਨ ਉੱਤੇ ਪੈਣ ਵਾਲੇ ਪ੍ਰਭਾਵ ਬਾਰੇ ਸਰਕਾਰ ਦੀ ਯੋਜਨਾ ਉੱਤੇ ਚਰਚਾ ਕਰਨ ਲਈ ਐਮਪੀਪੀ ਗ੍ਰਾਹਮ ਮੈਕਗ੍ਰੈਗਰ (ਬਰੈਂਪਟਨ ਨੌਰਥ) ਤੇ ਐਮਪੀਪੀ ਹਰਦੀਪ ਗਰੇਵਾਲ (ਬਰੈਂਪਟਨ ਈਸਟ) ਨੇ ਮਿਊਂਸਪਲ ਮਾਮਲਿਆਂ ਦੇ ਮੰਤਰੀ ਸਟੀਵ ਕਲਾਰਕ ਨਾਲ ਮੁਲਾਕਾਤ ਕੀਤੀ।
ਉਨ੍ਹਾਂ ਆਖਿਆ ਕਿ ਸਾਡੀ ਸਰਕਾਰ ਵੱਲੋਂ ਓਨਟਾਰੀਓ ਵਿੱਚ ਹਾਊਸਿੰਗ ਸਪਲਾਈ ਸੰਕਟ ਖ਼ਤਮ ਕਰਨ ਲਈ ਮੋਰ ਹੋਮਜ਼ ਬਿਲਟ ਫਾਸਟਰ ਐਕਟ ਪਾਸ ਕੀਤਾ ਗਿਆ ਹੈ। ਇਸ ਤਹਿਤ 2031 ਤੱਕ 1·5 ਮਿਲੀਅਨ ਘਰ ਬਣਾ ਕੇ ਇਸ ਸੰਕਟ ਨੂੰ ਖ਼ਤਮ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ।ਇਸ ਦੌਰਾਨ ਬਰੈਂਪਟਨ ਵਿੱਚ ਆਪਣੀ ਮਲਕੀਅਤ ਵਾਲੇ ਤੇ ਕਿਰਾਏ ਦੇ ਘਰ ਤਿਆਰ ਕੀਤੇ ਜਾਣਗੇ ਤਾਂ ਕਿ ਸਮੂਹ ਓਨਟਾਰੀਓ ਵਾਸੀਆਂ ਦੀਆਂ ਲੋੜਾਂ ਪੂਰੀਆਂ ਕੀਤੀਆਂ ਜਾ ਸਕਣ।ਇਨ੍ਹਾਂ ਵਿੱਚ ਸਿੰਗਲ ਪਰਿਵਾਰਕ ਘਰਾਂ ਦੇ ਨਾਲ ਨਾਲ ਟਾਊਨਹੋਮਜ਼ ਵੀ ਹੋਣਗੇ ਤੇ ਰਿਹਾਇਸ਼ੀ ਅਪਾਰਟਮੈਂਟਸ ਵੀ ਤਿਆਰ ਕੀਤੇ ਜਾਣਗੇ। ਇਸ ਐਕਟ ਤਹਿਤ ਸਰਕਾਰ ਡਿਵੈਲਪਮੈਂਟ ਚਾਰਜਿਜ਼ ਖ਼ਤਮ ਕਰ ਰਹੀ ਹੈ ਤਾਂ ਕਿ ਲੋਕਾਂ ਨੂੰ ਕਿਫਾਇਤੀ ਘਰ ਮੁਹੱਈਆ ਕਰਵਾਏ ਜਾ ਸਕਣ।
ਐਮਪੀਪੀ ਮੈਕਗ੍ਰੈਗਰ ਨੇ ਆਖਿਆ ਕਿ ਉਹ ਇਸ ਸੰਕਟ ਤੋਂ ਭਲੀ ਭਾਂਤ ਜਾਣੂ ਹਨ। ਸਪਲਾਈ ਦੀ ਘਾਟ ਤੋਂ ਭਾਵ ਹੈ ਕਿ ਬਰੈਂਪਟਨ ਵਿੱਚ ਬਹੁਤ ਸਾਰੇ ਲੋਕਾਂ ਨੂੰ ਆਪਣੀਆਂ ਲੋੜਾਂ ਤੇ ਬਜਟ ਦੇ ਹਿਸਾਬ ਨਾਲ ਘਰ ਨਹੀਂ ਮਿਲ ਪਾਉਂਦਾ।ਇਸ ਲਈ ਅਗਲੇ ਇੱਕ ਦਹਾਕੇ ਵਿੱਚ ਸਾਡੀ ਸਰਕਾਰ ਵੱਲੋਂ 1·5 ਮਿਲੀਅਨ ਘਰ ਬਣਾਉਣ ਦਾ ਟੀਚਾ ਮਿਥਿਆ ਗਿਆ ਹੈ ਤਾਂ ਕਿ ਯੰਗ ਕੈਨੇਡੀਅਨ ਵੀ ਆਪਣੇ ਘਰ ਦਾ ਸੁਪਨਾ ਸਾਕਾਰ ਕਰ ਸਕਣ।
ਇਸ ਮੌਕੇ ਬਰੈਂਪਟਨ ਈਸਟ ਤੋਂ ਐਮਪੀਪੀ ਹਰਦੀਪ ਗਰੇਵਾਲ ਨੇ ਆਖਿਆ ਕਿ ਸਾਡੀ ਸਰਕਾਰ ਸਮਝਦੀ ਹੈ ਕਿ ਅਸੀਂ ਹਾਊਸਿੰਗ ਸਪਲਾਈ ਸੰਕਟ ਵਿੱਚੋਂ ਲੰਘ ਰਹੇ ਹਾਂ। ਉਨ੍ਹਾ ਆਖਿਆ ਕਿ ਸਾਨੂੰ ਇਹ ਯਕੀਨੀ ਬਣਾਉਣਾ ਹੋਵੇਗਾ ਕਿ ਆਬਾਦੀ ਵਿੱਚ ਹੋ ਰਹੇ ਵਾਧੇ ਨੂੰ ਧਿਆਨ ਵਿੱਚ ਰੱਖ ਕੇ ਘਰ ਤਿਆਰ ਕੀਤੇ ਜਾਣ।ਸਾਡੀਆਂ ਸਰਕਾਰੀ ਨੀਤੀਆਂ ਦੇ ਕਮਾਲ ਦੇ ਨਤੀਜੇ ਵੇਖਣ ਨੂੰ ਮਿਲੇ ਹਨ। ਪਿਛਲੇ ਤਿੰਨ ਸਾਲਾਂ ਵਿੱਚ ਅਸੀਂ ਇਸ ਖੇਤਰ ਵਿੱਚ 4·4 ਬਿਲੀਅਨ ਡਾਲਰ ਦਾ ਨਿਵੇਸ਼ ਕਰ ਚੁੱਕੇ ਹਾਂ। ਕਮਿਊਨਿਟੀ ਦੀ ਮਦਦ ਲਈ ਤੇ ਪੀਲ ਰੀਜਨ ਵਿੱਚ ਕਿਫਾਇਤੀ ਘਰ ਤਿਆਰ ਕਰਨ ਲਈ ਅਸੀਂ ਸੋਸ਼ਲ ਸਰਵਿਸਿਜ਼ ਰਲੀਫ ਫੰਡ ਤੇ ਹੋਮਲੈੱਸਨੈੱਸ ਪ੍ਰਿਵੈਂਸ਼ਨ ਪ੍ਰੋਗਰਾਮ ਵੀ ਚਲਾਏ।2022-2023 ਲਈ ਪੀਲ ਰੀਜਨ ਨੂੰ ਹੋਮਲੈੱਸਨੈੱਸ ਪ੍ਰਿਵੈਂਸ਼ਨ ਪ੍ਰੋਗਰਾਮ ਤਹਿਤ 30·7 ਮਿਲੀਅਨ ਡਾਲਰ ਦਿੱਤੇ ਗਏ ਤੇ ਸੋਸ਼ਲ ਸਰਵਿਸਿਜ਼ ਰਲੀਫ ਫੰਡ ਤਹਿਤ 49·4 ਮਿਲੀਅਨ ਡਾਲਰ ਦਿੱਤੇ ਗਏ। ਅਸੀਂ ਸਾਂਝੇ ਟੀਚੇ ਨੂੰ ਪੂਰਾ ਕਰਨ ਲਈ ਪ੍ਰੋਵਿੰਸ ਭਰ ਦੀਆਂ ਸਾਰੀਆਂ ਕਮਿਊਨਿਟੀਜ਼ ਨਾਲ ਰਲ ਕੇ ਕੰਮ ਕਰਨਾ ਜਾਰੀ ਰੱਖਾਂਗੇ।