ਟੋਰਾਂਟੋ, 6 ਦਸੰਬਰ (ਪੋਸਟ ਬਿਊਰੋ) : ਟੋਰਾਂਟੋ ਸਿਟੀ ਕਾਊਂਸਲ ਦੇ ਅੱਧੇ ਤੋਂ ਵੱਧ ਮੈਂਬਰਾਂ ਵੱਲੋਂ ਪ੍ਰੀਮੀਅਰ ਡੱਗ ਫੋਰਡ ਤੇ ਓਨਟਾਰੀਓ ਦੇ ਮਿਊਂਸਪਲ ਅਫੇਅਰਜ਼ ਮੰਤਰੀ ਸਟੀਵ ਕਲਾਰਕ ਨੂੰ ਲਿਖੇ ਪੱਤਰ ਵਿੱਚ ਇਹ ਬੇਨਤੀ ਕੀਤੀ ਗਈ ਹੈ ਕਿ ਬਿੱਲ 39 ਨੂੰ ਮੁੜ ਵਿਚਾਰਿਆ ਜਾਵੇ। ਇਸ ਬਿੱਲ ਰਾਹੀਂ ਜੌਹਨ ਟੋਰੀ ਨੂੰ ਵਧੇਰੇ ਸ਼ਕਤੀਆਂ ਹਾਸਲ ਹੋਣਗੀਆਂ।
ਇਸ ਪੱਤਰ ਉੱਤੇ ਦਸਤਖ਼ਤ ਕਰਨ ਵਾਲੇ 15 ਕਾਊਂਸਲਰਜ਼ ਵਿੱਚੋਂ ਇੱਕ ਡੇਵਨਪੋਰਟ ਤੋਂ ਕਾਊਂਸਲਰ ਐਲੇਜੈ਼ਂਡਰਾ ਬ੍ਰਾਵੋ ਨੇ ਆਖਿਆ ਕਿ ਅਸੀਂ ਬਿੱਲ 39 ਉੱਤੇ ਵਿਚਾਰ ਕੀਤਾ ਹੈ ਤੇ ਇਸ ਦੀ ਜਮਹੂਰੀਅਤ ਵਿੱਚ ਕੋਈ ਥਾਂ ਨਹੀਂ।ਉਨ੍ਹਾਂ ਆਖਿਆ ਕਿ ਹਰ ਬੋਰਡ, ਹਰ ਏਜੰਸੀ, ਗੈਰ ਸਰਕਾਰੀ, ਕਾਰਪੋਰੇਸ਼ਨ ਤੇ ਹਰੇਕ ਵਿਧਾਨਸਭਾ ਵਿੱਚ ਬਹੁਗਿਣਤੀ ਤੋਂ ਉਲਟ ਇੱਕ ਤਿਹਾਈ ਵੋਟਾਂ ਨਾਲ ਕੌਣ ਕੰਮ ਕਰਦਾ ਹੈ।
ਹਰੇਕ ਕਾਊਂਸਲਰ ਨੇ ਆਖਿਆ ਕਿ ਉਹ ਇਹ ਗੱਲ ਨੂੰ ਲੈ ਕੇ ਚਿੰਤਤ ਹਨ ਕਿ ਟੋਰਾਂਟੋ ਸਿਟੀ ਹਾਲ ਵਿੱਚ ਉਨ੍ਹਾਂ ਦੀ ਰਜ਼ਾਮੰਦੀ ਤੋਂ ਬਿਨਾਂ ਹੀ ਕੰਮ ਹੋ ਜਾਇਆ ਕਰੇਗਾ ਤੇ ਕਈ ਮਾਮਲਿਆਂ ਵਿੱਚ ਉਨ੍ਹਾਂ ਦੀ ਰਾਇ ਦੀ ਕੋਈ ਅਹਿਮੀਅਤ ਹੀ ਨਹੀਂ ਹੋਵੇਗੀ। ਇਸ ਨਾਲ ਸ਼ਕਤੀਆਂ ਦੀ ਦੁਰਵਰਤੋਂ ਹੋ ਸਕਦੀ ਹੈ ਤੇ ਸਾਰਾ ਸੰਤੁਲਨ ਗੜਬੜਾ ਜਾਵੇਗਾ। ਯੂਨੀਵਰਸਿਟੀ ਰੋਜ਼ਡੇਲ ਤੋਂ ਕਾਊਂਸਲਰ ਡਾਇਨ ਨੇ ਆਖਿਆ ਕਿ ਇਹ ਪੱਤਰ ਲਿਖ ਕੇ ਉਹ ਪ੍ਰੋਵਿੰਸ ਨੂੰ ਇਹ ਬਿੱਲ ਪਾਸ ਕਰਨ ਤੋਂ ਰੋਕਣਾ ਚਾਹੁੰਦੇ ਹਨ।
ਇਹ ਪੱਤਰ ਸਾਂਝਾ ਕੀਤੇ ਜਾਣ ਤੋਂ ਬਾਅਦ ਮੇਅਰ ਜੌਹਨ ਟੋਰੀ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਵਿੱਚ ਆਖਿਆ ਗਿਆ ਕਿ ਉਹ ਪਿਛਲੇ ਅੱਠ ਸਾਲ ਤੋਂ ਆਪਣੇ ਕੰਮ ਕਰਨ ਦਾ ਢੰਗ ਤੇ ਪਹੁੰਚ ਸੱਭ ਨੂੰ ਵਿਖਾ ਚੁੱਕੇ ਹਨ ਤੇ ਇਸ ਵਿੱਚ ਕੋਈ ਬਦਲਾਅ ਨਹੀਂ ਆਵੇਗਾ। ਉਨ੍ਹਾਂ ਆਖਿਆ ਕਿ ਕੰਮ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਲਈ ਉਹ ਕਾਊਂਸਲ ਨਾਲ ਰਲ ਕੇ ਕੰਮ ਕਰਦੇ ਰਹਿਣਗੇ।ਉਨ੍ਹਾਂ ਆਖਿਆ ਕਿ ਭਾਵੇਂ ਇਸ ਹਫਤੇ ਕੁਈਨਜ਼ ਪਾਰਕ ਵਿੱਚ ਪ੍ਰੋਵਿੰਸ਼ੀਅਲ ਤਬਦੀਲੀਆਂ ਨੂੰ ਮਨਜ਼ੂਰੀ ਮਿਲ ਜਾਵੇਗੀ ਪਰ ਉਹ ਹਰੇਕ ਮੁੱਦੇ ਉੱਤੇ ਕਾਊਂਸਲ ਦੀ ਸਹਿਮਤੀ ਲੈਣ ਦੀ ਕੋਸਿ਼ਸ਼ ਕਰਨਗੇ।