ਨਵੀਂ ਦਿੱਲੀ, 6 ਦਸੰਬਰ (ਪੋਸਟ ਬਿਊਰੋ) - ਦੇਸ਼ ਦੀ ਰਾਜਧਾਨੀ ਦਿੱਲੀ ਸਥਿਤ ਏਮਜ਼ ’ਤੇ ਰੈਨਸਮਵੇਅਰ ਹਮਲੇ ਦੇ ਕੁਝ ਦਿਨ ਬਾਅਦ ਇੰਡੀਅਨ ਕੌਂਸਲ ਆਫ ਮੈਡੀਕਲ ਰਿਸਰਚ (ਆਈ.ਸੀ.ਐੱਮ.ਆਰ.) ਦੀ ਵੈੱਬਸਾਈਟ ਨੂੰ ਹੈਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਸੂਤਰਾਂ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਸੂਤਰਾਂ ਮੁਤਾਬਿਕ 30 ਨਵੰਬਰ ਨੂੰ ਦੇਸ਼ ਦੀ ਚੋਟੀ ਦੀ ਮੈਡੀਕਲ ਸੰਸਥਾ ਦੀ ਵੈੱਬਸਾਈਟ ‘ਤੇ 6 ਹਜ਼ਾਰ ਵਾਰ ਹੈਕਿੰਗ ਦੀ ਕੋਸ਼ਿਸ਼ ਕੀਤੀ ਗਈ ਸੀ। ਆਈ.ਪੀ. ਐਡਰੈੱਸ, ਇੱਕ ‘ਯੂਨੀਕ ਐਡਰੈੱਸ’ ਜੋ ਇੰਟਰਨੈਟ ’ਤੇ ਇਕ ਡਿਵਾਈਸ ਦੀ ਪਛਾਣ ਕਰਦਾ ਹੈ, ਹਾਂਗਕਾਂਗ ਵਿਚ ਸਥਿਤ ਇੱਕ ਬਲੈਕਲਿਸਟਡ ਵੈਬਸਾਈਟ ’ਤੇ ਟ੍ਰੇਸ ਕੀਤਾ ਗਿਆ ਸੀ।
ਜ਼ਿਕਰਯੋਗ ਹੈ ਕਿ 23 ਨਵੰਬਰ ਨੂੰ ਸਵੇਰੇ 6.45 ਵਜੇ ਦਿੱਲੀ ਏਮਜ਼ ਦਾ ਸਰਵਰ ਹੈਕ ਹੋ ਗਿਆ ਸੀ। ਸਭ ਤੋਂ ਪਹਿਲਾਂ ਇਹ ਗੱਲ ਐਮਰਜੈਂਸੀ ਲੈਬ ਦੇ ਕੰਪਿਊਟਰ ਸੈਂਟਰ ਵਿਚ ਧਿਆਨ ਵਿੱਚ ਆਈ, ਜਿਸ ਤੋਂ ਬਾਅਦ ਹੌਲੀ-ਹੌਲੀ ਹਸਪਤਾਲ ਦੇ ਸਮੁੱਚੇ ਕੰਪਿਊਟਰ ਸਿਸਟਮ ਨੂੰ ਹੈਕਰਾਂ ਨੇ ਰੈਨਸਮਵੇਅਰ ਅਟੈਕ ਰਾਹੀਂ ਆਪਣੇ ਕਬਜ਼ੇ ਵਿਚ ਲੈ ਲਿਆ। ਉਦੋਂ ਤੋਂ ਸਰਵਰ ਨੂੰ ਸਾਫ਼ ਕਰਨ ਅਤੇ ਹੈਕਰਾਂ ਦੇ ਚੁੰਗਲ ਤੋਂ ਮੁਕਤ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਕ ਪਾਸੇ ਦਿੱਲੀ ਪੁਲਿਸ ਇਸ ਹੈਕਿੰਗ ਦੀ ਜਾਂਚ ਕਰ ਰਹੀ ਹੈ ਅਤੇ ਦੂਜੇ ਪਾਸੇ ਇੰਡੀਆ ਕੰਪਿਊਟਰ ਐਮਰਜੈਂਸੀ ਟੀਮ ਦੇ ਮਾਹਿਰ ਆਨਲਾਈਨ ਹੈਕਰਾਂ ਨਾਲ ਨਜਿੱਠਣ ਦੀ ਕੋਸਿਸ਼ ਕਰ ਰਹੇ ਹਨ। ਏਮਜ ਵਿਚ ਹਰ ਸਾਲ 38 ਲੱਖ ਮਰੀਜਾਂ ਦਾ ਇਲਾਜ ਹੁੰਦਾ ਹੈ। ਇਸ ਸਾਈਬਰ ਹਮਲੇ ਕਾਰਣ ਮਰੀਜ਼ਾਂ ਦਾ ਡਾਟਾ ਚੋਰੀ ਹੋਣ ਦੀ ਸੰਭਾਵਨਾ ਹੈ।
ਏਮਜ ਸਾਈਬਰ ਅਟੈਕ ਮਾਮਲੇ ਵਿਚ 2 ਮੁਲਾਜ਼ਮਾਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਇਹ ਦੋਵੇਂ ਸਿਸਟਮ ਵਿਸ਼ਲੇਸ਼ਕ ਹਨ। ਦੋਵਾਂ ਨੂੰ ਪਹਿਲਾਂ ਕਾਰਣ ਦੱਸੋ ਨੋਟਿਸ ਦਿੱਤਾ ਗਿਆ ਸੀ। ਜਵਾਬ ਤੋਂ ਸੰਤੁਸਟ ਨਾ ਹੋਣ ’ਤੇ ਏਮਜ਼ ਪ੍ਰਸ਼ਾਸਨ ਨੇ ਦੋਵਾਂ ਨੂੰ ਸਸਪੈਂਡ ਕਰ ਦਿੱਤਾ ਹੈ। ਇਸ ਦੌਰਾਨ ਏਮਜ਼ ਦੇ 50 ਵਿਚੋਂ 30 ਸਰਵਰਾਂ ਨੂੰ ਐਂਟੀ ਵਾਇਰਸ ਲਗਾ ਕੇ ਸਕੈਨ ਕੀਤਾ ਗਿਆ ਹੈ।