ਓਨਟਾਰੀਓ, 5 ਦਸੰਬਰ (ਪੋਸਟ ਬਿਊਰੋ) : ਦੱਖਣ-ਪੱਛਮੀ ਓਨਟਾਰੀਓ ਵਿੱਚ ਅੱਜ ਦੁਪਹਿਰੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਪ੍ਰੀਮੀਅਰ ਡੱਗ ਫੋਰਡ ਦੀ ਹਾਜ਼ਰੀ ਵਿੱਚ ਇਲੈਕਟ੍ਰਿਕ ਵ੍ਹੀਕਲ ਉਤਪਾਦਨ ਦੇ ਸਬੰਧ ਵਿੱਚ ਐਲਾਨ ਕੀਤਾ ਜਾਵੇਗਾ।
ਇਸ ਮੌਕੇ ਟਰੂਡੋ ਦੇ ਨਾਲ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਤੇ ਪ੍ਰੋਵਿੰਸ ਦੇ ਇਕਨੌਮਿਕ ਡਿਵੈਲਪਮੈਂਟ ਮੰਤਰੀ ਵਿੱਕ ਫਿਡੇਲੀ ਵੀ ਮੌਜੂਦ ਹੋਣਗੇ। ਇਹ ਐਲਾਨ ਇੰਗਰਸੋਲ, ਓਨਟਾਰੀਓ ਵਿੱਚ ਦੁਪਹਿਰ ਦੇ 12:15 ਵਜੇ ਕੀਤਾ ਜਾਵੇਗਾ।ਟਰੂਡੋ ਦੇ ਸ਼ਡਿਊਲ ਅਨੁਸਾਰ ਇਸ ਐਲਾਨ ਨਾਲ ਇਲੈਕਟ੍ਰਿਕ ਵ੍ਹੀਕਲਜ਼ ਦੇ ਉਤਪਾਦਨ ਦੇ ਖੇਤਰ ਵਿੱਚ ਮੀਲ ਪੱਥਰ ਰੱਖਿਆ ਜਾਵੇਗਾ।
ਇਸ ਟਾਊਨ ਵਿੱਚ ਜਨਰਲ ਮੋਟਰਜ਼ ਕੈਮੀ ਦਾ ਉਤਪਾਦਨ ਪਲਾਂਟ ਹੈ। ਇਸ ਆਟੋਨਿਰਮਾਤਾ ਕੰਪਨੀ ਨੇ ਅਪਰੈਲ ਵਿੱਚ ਇਸ ਪਲਾਂਟ ਨੂੰ ਸਾਲ ਦੇ ਅੰਤ ਤੱਕ ਰੀਬੂਟ ਕਰਨ ਦਾ ਐਲਾਨ ਕੀਤਾ ਸੀ। ਉਸ ਸਮੇਂ ਇਹ ਵੀ ਆਖਿਆ ਗਿਆ ਸੀ ਕਿ ਇਹ ਦੇਸ਼ ਦੀ ਪਹਿਲੀ ਫੁੱਲ ਸਕੇਲ ਕਮਰਸ਼ੀਅਲ ਇਲੈਕਟ੍ਰਿਕ ਵ੍ਹੀਕਲ ਪ੍ਰੋਡਕਸ਼ਨ ਫੈਸਿਲਿਟੀ ਹੋਵੇਗੀ।ਪ੍ਰੋਵਿੰਸ਼ੀਅਲ ਤੇ ਫੈਡਰਲ ਸਰਕਾਰਾਂ ਵੱਲੋਂ ਹਰੇਕ ਵੱਲੋਂ ਇਸ ਪਲਾਂਟ ਲਈ 259 ਮਿਲੀਅਨ ਡਾਲਰ ਨਿਵੇਸ਼ ਕੀਤੇ ਗਏ ਹਨ।