ਨਵੀਂ ਦਿੱਲੀ, 5 ਦਸੰਬਰ (ਪੋਸਟ ਬਿਊਰੋ)- ਐੱਮ.ਸੀ.ਡੀ. ਚੋਣਾਂ ਵਿਚ ਐਗਜ਼ਿਟ ਪੋਲ ਨੇ ਐੱਮ.ਸੀ.ਡੀ. ਚੋਣਾਂ ਵਿਚ ਆਮ ਆਦਮੀ ਪਾਰਟੀ ਦੀ ਸ਼ਾਨਦਾਰ ਜਿੱਤ ਦਾ ਅਨੁਮਾਨ ਲਗਾਇਆ ਹੈ। ਦਿੱਲੀ ਨਗਰ ਨਿਗਮ ਚੋਣਾਂ ਤੋਂ ਪਹਿਲਾਂ ਐਗਜ਼ਿਟ ਪੋਲ ਮੁਤਾਬਿਕ ਅਰਵਿੰਦ ਕੇਜਰੀਵਾਲ ਦੀ ਆਮ ਆਦਮੀ ਪਾਰਟੀ ਵੱਡੀ ਜਿੱਤ ਵੱਲ ਵਧਦੀ ਨਜਰ ਆ ਰਹੀ ਹੈ। ਹੁਣ ਤੱਕ ਦੇ ਐਗਜ਼ਿਟ ਪੋਲ ਵਿਚ ‘ਆਪ’ ਨੂੰ ਐੱਮ.ਸੀ.ਡੀ. ਚੋਣਾਂ ਵਿਚ 250 ਵਿਚੋਂ 149 ਤੋਂ 171 ਵਾਰਡਾਂ ’ਤੇ ਜਿੱਤ ਦੀ ਗੱਲ ਕਹੀ ਗਈ ਹੈ। ਇਕ ਹੋਰ ਐਗਜ਼ਿਟ ਪੋਲ ਵਿਚ ‘ਆਪ’ ਨੂੰ 146 ਤੋਂ 156 ਸੀਟਾਂ ਮਿਲਣ ਦੀ ਗੱਲ ਕਹੀ ਗਈ ਹੈ। ਉਥੇ ਹੀ ਦੂਸਰੇ ਐਗਜ਼ਿਟ ਪੋਲ ਨੇ ਭਾਜਪਾ ਨੂੰ 69 ਤੋਂ 91 ਵਾਰਡਾਂ ਵਿਚ ਜਿੱਤ ਦੀ ਭਵਿੱਖਬਾਣੀ ਕੀਤੀ ਹੈ ਜਦੋਂ ਪਹਿਲੇ ਐਗਜ਼ਿਟ ਪੋਲ ਨੇ ਪਾਰਟੀ ਨੂੰ 84 ਤੋਂ 94 ਵਾਰਡਾਂ ਵਿੱਚ ਜਿੱਤਣ ਦਾ ਅਨੁਮਾਨ ਲਗਾਇਆ ਹੈ।
ਇਹ ਦੋਵੇਂ ਐਗਜ਼ਿਟ ਪੋਲ ਕਾਂਗਰਸ ਪਾਰਟੀ ਦੀ ਮਾੜੀ ਹਾਲਤ ਦੀ ਭਵਿੱਖਬਾਣੀ ਕਰ ਰਹੇ ਹਨ। ਦੋਵਾਂ ਅਨੁਮਾਨਾਂ ਅਨੁਸਾਰ ਕਾਂਗਰਸ ਨੂੰ 10 ਜਾਂ ਇਸ ਤੋਂ ਘੱਟ ਵਾਰਡਾਂ ਵਿਚ ਜਿੱਤ ਦੀ ਉਮੀਦ ਹੈ। ਦੋਵੇਂ ਐਗਜ਼ਿਟ ਪੋਲ ਦਰਸਾਉਂਦੇ ਹਨ ਕਿ ਦੂਸਰੇ 5 ਤੋਂ 9 ਵਾਰਡ ਜਿੱਤ ਸਕਦੇ ਹਨ। ਐਗਜ਼ਿਟ ਪੋਲ ਦੇ ਅਨੁਮਾਨ ਇਸ ਗੱਲ ਦੀ ਪੁਸਟੀ ਕਰਦੇ ਜਾਪਦੇ ਹਨ ਕਿ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦੇ ਭਿ੍ਰਸ਼ਟਾਚਾਰ ਦੇ ਖਾਤਮੇ ਦੇ ਸੰਦੇਸ਼ ਨੇ ਵੋਟਰਾਂ ਨੂੰ ਪ੍ਰਭਾਵਿਤ ਕੀਤਾ ਹੈ।
ਦੱਸ ਦਈਏ ਕਿ 2007 ਤੋਂ ਐੱਮ.ਸੀ.ਡੀ. ’ਤੇ ਭਾਜਪਾ ਦਾ ਕਬਜ਼ਾ ਹੈ। 15 ਸਾਲਾਂ ਦੇ ਕਾਰਜਕਾਲ ਦੌਰਾਨ, ਇਸ ਪਾਰਟੀ ਨੇ ਨਗਰ ਨਿਗਮ ਨੂੰ ਐੱਨ.ਡੀ.ਐੱਮ.ਸੀ., ਐੱਸ.ਡੀ.ਐੈੱਮ.ਸੀ. ਤੇ ਈ.ਡੀ.ਐੱਮ.ਸੀ. (2012-2022) ਵਿਚ ਵੰਡਿਆ ਹੋਇਆ ਦੇਖਿਆ ਹੈ। ਤਿੰਨੇ ਨਿਗਮਾਂ ਦਾ ਏਕੀਕਰਨ ਇਸ ਸਾਲ ਦੇ ਸ਼ੁਰੂ ਵਿੱਚ ਹੀ ਹੋ ਗਿਆ ਹੈ।