ਓਨਟਾਰੀਓ, 2 ਦਸੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਬਿੱਗ ਸਿਟੀ ਮੇਅਰਜ਼ (ਓਬੀਸੀਐਮ) ਸੁ਼ੱਕਰਵਾਰ ਨੂੰ ਇੱਕਠੇ ਹੋਣਗੇ। ਪ੍ਰੋਵਿੰਸ ਦੀ ਸੱਭ ਤੋਂ ਵੱਡੀ ਸਿਟੀ ਤੇ ਪ੍ਰੀਮੀਅਰ ਡੱਗ ਫੋਰਡ ਦਰਮਿਆਨ ਤਣਾਅ ਪੈਦਾ ਹੋ ਗਿਆ ਹੈ।ਇਹ ਤਣਾਅ ਨਵੇਂ ਹਾਊਸਿੰਗ ਬਿੱਲ ਦੇ ਵਿੱਤੀ ਅਸਰ ਕਾਰਨ ਪੈਦਾ ਹੋਇਆ ਹੈ।
ਮੇਅਰ ਜੌਹਨ ਟੋਰੀ 29 ਮੇਅਰਜ਼ ਦੇ ਗਰੁੱਪ ਵਿੱਚ ਹੋਣਗੇ ਜਿਹੜੇ ਸ਼ੁੱਕਰਵਾਰ ਸਵੇਰੇ 9:30 ਵਜੇ ਹੋਣ ਵਾਲੀ ਮੀਟਿੰਗ ਵਿੱਚ ਹਿੱਸਾ ਲੈਣਗੇ। ਇਸ ਗਰੁੱਪ ਵਿੱਚ ਬਰੈਂਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ ਤੇ ਮਿਸੀਸਾਗਾ ਦੀ ਮੇਅਰ ਬੌਨੀ ਕ੍ਰੌਂਬੀ ਵੀ ਸ਼ਾਮਲ ਹੋਣਗੇ। ਏਜੰਡੇ ਵਿੱਚ ਸੱਭ ਤੋਂ ਉੱਤੇ ਪ੍ਰੋਵਿੰਸ ਦਾ ਨਵਾਂ ਹਾਊਸਿੰਗ ਬਿੱਲ 23- ਦ ਮੋਰ ਹੋਮਜ਼ ਬਿਲਟ ਫਾਸਟਰ ਐਕਟ (More Homes Built Faster Act)ਹੋਵੇਗਾ ਤੇ ਫੰਡਿੰਗ ਬਾਰੇ ਮਿਊਂਸਪੈਲਿਟੀਜ਼ ਨੂੰ ਜਿਹੜਾ ਖਤਰਾ ਹੈ ਉਸ ਬਾਰੇ ਵੀ ਚਰਚਾ ਕੀਤੀ ਜਾਵੇਗੀ। ਇਹ ਬਿੱਲ ਸੋਮਵਾਰ ਨੂੰ ਪਾਸ ਹੋਇਆ ਸੀ ਤੇ ਇਸ ਤਹਿਤ ਕਿਰਾਏ ਦੇ ਘਰਾਂ ਤੇ ਕਿਫਾਇਤੀ ਘਰਾਂ ਉੱਤੇ ਕੁੱਝ ਫੀਸ ਘਟਾਉਣ ਦੀ ਤਜਵੀਜ਼ ਹੈ।
ਅਗਲੇ ਦਸ ਸਾਲਾਂ ਵਿੱਚ ਪ੍ਰੋਵਿੰਸ ਵੱਲੋਂ 1·5 ਮਿਲੀਅਨ ਘਰ ਹੋਰ ਬਣਾਉਣ ਦਾ ਟੀਚਾ ਮਿਥਿਆ ਗਿਆ ਹੈ ਪਰ ਕੁੱਝ ਮੇਅਰਜ਼ ਨੂੰ ਇਹ ਚਿੰਤਾ ਹੈ ਕਿ ਸਿਟੀ ਫੰਡਾਂ ਵਿਚਲਾ ਇਹ ਗੈਪ ਕਿਸ ਤਰ੍ਹਾਂ ਪੂਰਾ ਕਰੇਗੀ। ਐਸੋਸਿਏਸ਼ਨ ਆਫ ਮਿਊਂਸਪੈਲਿਟੀਜ਼ ਆਫ ਓਨਟਾਰੀਓ (ਏਐਮਓ) ਦਾ ਕਹਿਣਾ ਹੈ ਕਿ ਡਿਵੈਲਪਮੈਂਟ ਚਾਰਜਿਜ਼ ਵਿਚਲੀਆਂ ਤਬਦੀਲੀਆਂ ਕਾਰਨ ਕਮਿਊਨਿਟੀਜ਼ ਨੂੰ 5 ਬਿਲੀਅਨ ਡਾਲਰ ਥੁੜ੍ਹਣਗੇ। ਐਸੋਸਿਏਸ਼ਨ ਦਾ ਕਹਿਣਾ ਹੈ ਕਿ ਇਸ ਦਾ ਸਿੱਧਾ ਬੋਝ ਟੈਕਸਦਾਤਾਵਾਂ ਨੂੰ ਵੱਧ ਟੈਕਸ ਤੇ ਘੱਟ ਸੇਵਾਵਾਂ ਨਾਲ ਚੁਕਾਉਣਾ ਪਵੇਗਾ।
ਇਸ ਹਫਤੇ ਫੋਰਡ ਵੱਲੋਂ ਦਿੱਤੇ ਬਿਆਨ ਵਿੱਚ ਆਖਿਆ ਗਿਆ ਸੀ ਕਿ ਇਹ ਤਾਂ ਬਹੁਤ ਹੀ ਮਾੜੀ ਗੱਲ ਹੈ ਕਿ ਕਿਫਾਇਤੀ ਘਰਾਂ ਉੱਤੇ ਵੀ ਸਿਟੀਜ਼ ਨੂੰ ਚਾਰਜ ਕਰਨ ਦੀ ਪਈ ਹੈ। ਇਹ ਤਾਂ ਕੋਈ ਤੁਕ ਨਹੀੰਂ ਬਣਦੀ।