ਟੋਰਾਂਟੋ, 30 ਨਵੰਬਰ (ਪੋਸਟ ਬਿਊਰੋ) : ਬੱਚਿਆਂ ਦੇ ਆਨਲਾਈਨ ਕੀਤੇ ਜਾ ਰਹੇ ਸ਼ੋਸ਼ਣ ਦੇ ਸਬੰਧ ਵਿੱਚ ਟੋਰਾਂਟੋ ਪੁਲਿਸ ਵੱਲੋਂ ਦੋ ਦਰਜਨ ਦੇ ਨੇੜੇ ਤੇੜੇ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਤੇ ਉਨ੍ਹਾਂ ਉੱਤੇ ਲੱਗਭਗ 100 ਚਾਰਜਿਜ਼ ਲਾਏ ਗਏ ਹਨ।
ਇਸ ਜਾਂਚ ਨੂੰ ਪ੍ਰੋਜੈਕਟ ਮੈਵਰਿੱਕ ਦਾ ਨਾਂ ਦਿੱਤਾ ਗਿਆ। ਇਸ ਪ੍ਰੋਜੈਕਟ ਵਿੱਚ ਓਨਟਾਰੀਓ ਦੀ ਪ੍ਰੋਵਿੰਸ਼ੀਅਲ ਪੁਲਿਸ ਤੋਂ ਇਲਾਵਾ ਟੋਰਾਂਟੋ, ਪੀਲ ਤੇ ਦਰਹਾਮ ਪੁਲਿਸ ਸਮੇਤ 27 ਪੁਲਿਸ ਏਜੰਸੀਆਂ ਨੇ ਸ਼ਮੂਲੀਅਤ ਕੀਤੀ। ਲੋਕਲ ਪੱਧਰ ਉੱਤੇ ਟੋਰਾਂਟੋ ਪੁਲਿਸ ਨੇ ਅਕਤੂਬਰ ਵਿੱਚ 20 ਦਿਨਾਂ ਦੇ ਅੰਦਰ 24 ਸਰਚ ਵਾਰੰਟ ਕਢਵਾ ਕੇ 23 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਤੇ ਉਨ੍ਹਾਂ ਖਿਲਾਫ 96 ਚਾਰਜਿਜ਼ ਲਾਏ ਗਏ। ਜਾਂਚਕਾਰਾਂ ਨੇ 22 ਬੱਚਿਆਂ ਦੀ ਪਛਾਣ ਕੀਤੀ ਜਿਨ੍ਹਾਂ ਦਾ ਆਨਲਾਈਨ ਸ਼ੋਸ਼ਣ ਕੀਤਾ ਜਾ ਰਿਹਾ ਸੀ ਤੇ 10 ਬੱਚਿਆਂ ਨੂੰ ਬਚਾਇਆ।
ਪ੍ਰੋਵਿੰਸ ਭਰ ਵਿੱਚ ਪੁਲਿਸ ਨੇ 255 ਮਾਮਲਿਆਂ ਦੀ ਜਾਂਚ ਕਰਕੇ 107 ਵਿਅਕਤੀਆਂ ਖਿਲਾਫ 428 ਚਾਰਜਿਜ਼ ਲਗਾਏ। ਜਾਂਚਕਾਰ 168 ਸਰਚ ਵਾਰੰਟਸ ਉੱਤੇ ਕੰਮ ਕਰਨ ਵਿੱਚ ਕਾਮਯਾਬ ਰਹੇ ਤੇ 1032 ਡਿਵਾਈਸਿਜ਼ ਜ਼ਬਤ ਕੀਤੀਆਂ ਗਈਆਂ। 61 ਅਜਿਹੇ ਬੱਚਿਆਂ ਦੀ ਪਛਾਣ ਕੀਤੀ ਗਈ ਜਿਨ੍ਹਾਂ ਦਾ ਸ਼ੋਸ਼ਣ ਕੀਤਾ ਜਾ ਰਿਹਾ ਸੀ ਤੇ ਉਨ੍ਹਾਂ ਨੂੰ ਸਬੰਧਤ ਸੂਤਰਾਂ ਰਾਹੀਂ ਬਚਾਇਆ ਗਿਆ। ਇਸ ਤੋਂ ਇਲਾਵਾ 60 ਹੋਰਨਾਂ ਬੱਚਿਆਂ ਨੂੰ ਓਪੀਪੀ ਵੱਲੋਂ ਬਚਾਇਆ ਗਿਆ। ਅਜੇ ਵੀ 175 ਮਾਮਲਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ ਤੇ ਇਸ ਸਬੰਧ ਵਿੱਚ ਹੋਰ ਚਾਰਜਿਜ਼ ਲਾਏ ਜਾ ਸਕਦੇ ਹਨ।