ਟੋਰਾਂਟੋ, 24 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਐਨਡੀਪੀ ਦੇ ਟੋਰਾਂਟੋ ਦੇ ਮੈਂਬਰਾਂ ਵੱਲੋਂ ਮੇਅਰ ਜੌਹਨ ਟੋਰੀ ਨੂੰ ਇਹ ਬੇਨਤੀ ਕੀਤੀ ਗਈ ਹੈ ਕਿ ਜਿਸ ਬਿੱਲ ਰਾਹੀਂ ਉਨ੍ਹਾਂ ਨੂੰ ਵਧੇਰੇ ਸ਼ਕਤੀਆਂ ਦਿੱਤੀਆਂ ਜਾਣੀਆਂ ਹਨ ਉਸ ਨੂੰ ਵਾਪਿਸ ਲੈ ਲਿਆ ਜਾਵੇ।
ਬੁੱਧਵਾਰ ਰਾਤ ਨੂੰ ਮੇਅਰ ਨੂੰ ਭੇਜੇ ਪੱਤਰ ਵਿੱਚ ਟੋਰਾਂਟੋ ਏਰੀਆ ਦੇ ਐਮਪੀਪੀਜ਼ ਨੇ ਆਖਿਆ ਕਿ ਉਨ੍ਹਾਂ ਨੂੰ ਇਸ ਗੱਲ ਤੋਂ ਬਹੁਤ ਨਮੋਸ਼ੀ ਹੈ ਕਿ ਟੋਰੀ ਨੇ ਪ੍ਰੀਮੀਅਰ ਡੱਗ ਫੋਰਡ ਨਾਲ ਇਹ ਬਿੱਲ ਪਾਸ ਕਰਵਾਉਣ ਲਈ ਡੀਲ ਕੀਤੀ ਹੈ। ਜੇ ਇਹ ਬਿੱਲ ਪਾਸ ਹੋ ਜਾਂਦਾ ਹੈ ਤਾਂ ਮੇਅਰ ਟੋਰੀ ਕਾਊਂਸਲ ਮੈਂਬਰਾਂ ਦੇ ਇੱਕ ਤਿਹਾਈ ਸਮਰਥਨ ਨਾਲ ਅਹਿਮ ਫੈਸਲੇ ਲੈ ਸਕਣਗੇ। ਇਸ ਪੱਤਰ ਵਿੱਚ ਇਹ ਵੀ ਆਖਿਆ ਗਿਆ ਕਿ ਬਿੱਲ 39 ਦੇ ਪਾਸ ਹੋਣ ਨਾਲ ਜਮਹੂਰੀ ਕਦਰਾਂ ਕੀਮਤਾਂ ਦਾ ਕੋਈ ਮੁੱਲ ਨਹੀਂ ਰਹਿ ਜਾਵੇਗਾ। ਇਸ ਨਾਲ ਗੁਪਤ ਸਮਝੌਤੇ ਸਿਰੇ ਚੜ੍ਹਨਗੇ ਤੇ ਵੰਨ ਸਵੰਨੇ ਸਕੈਂਡਲ ਜਨਮ ਲੈਣਗੇ।
ਇਹ ਵੀ ਆਖਿਆ ਗਿਆ ਕਿ ਇਸ ਨਾਲ ਮਿਊਂਸਪਲ ਚੋਣਾਂ ਦੀ ਅਖੰਡਤਾ ਵੀ ਖੱਡ ਵਿੱਚ ਪੈ ਜਾਵੇਗੀ ਤੇ ਟੋਰਾਂਟੋ ਦੇ ਲੋਕਾਂ ਦੇ ਜਮਹੂਰੀ ਅਧਿਕਾਰਾਂ ਉੱਤੇ ਵੀ ਸਰਾਸਰ ਹਮਲਾ ਹੋਵੇਗਾ। ਇਸ ਨਾਲ ਲੋਕਾਂ ਦਾ ਵਿਸ਼ਵਾਸ ਵੀ ਟੁੱਟੇਗਾ। ਇਸ ਪੱਤਰ ਉੱਤੇ ਕ੍ਰਿਸ ਗਲੋਵਰ (ਸਪੈਡੀਨਾ-ਫੋਰਟ ਯੌਰਕ), ਜੈਸਿਕਾ ਬੈੱਲ (ਯੂਨੀਵਰਸਿਟੀ-ਰੋਜ਼ਡੇਲ), ਮੈਰਿਟ ਸਟਾਈਲਜ਼ (ਡੇਵਨਪੋਰਟ), ਕ੍ਰਿਸਟਿਨ ਵੌਂਗ-ਟੈਮ (ਟੋਰਾਂਟੋ-ਸੈਂਟਰ), ਟੌਮ ਰੈਕੋਸੈਵਿਕ (ਹੰਬਰ ਰਿਵਰ-ਬਲੈਕ ਕ੍ਰੀਕ), ਡੌਲੀ ਬੇਗਮ (ਸਕਾਰਬਰੋ ਸਾਊਥਵੈਸਟ), ਪੀਟਰ ਤਾਬੁਨਜ਼ (ਟੋਰਾਂਟੋ-ਡੈਨਫੋਰਥ), ਭੂਟਿਲਾ ਕਾਰਪੋਚ (ਪਾਰਕਡੇਲ-ਹਾਈ ਪਾਰਕ), ਤੇ ਜਿੱਲ ਐਂਡਰਿਊ (ਂਟੋਰਾਂਟੋ-ਸੇਂਟ ਪਾਲਜ਼) ਨੇ ਦਸਤਖ਼ਤ ਕੀਤੇ।