ਹੈਲੀਫੈਕਸ, 21 ਨਵੰਬਰ (ਪੋਸਟ ਬਿਊਰੋ): ਜਲਦ ਹੀ ਕੈਨੇਡੀਅਨਜ਼ ਨੂੰ ਆਪਣੇ ਘਰਾਂ ਨੂੰ ਤੇਲ ਦੀ ਮਦਦ ਨਾਲ ਨਿੱਘਾ ਰੱਖਣ ਦੀ ਲੋੜ ਨਹੀਂ ਹੋਵੇਗੀ। ਇਸ ਲਈ ਜਲਦ ਹੀ ਕੈਨੇਡੀਅਨਜ਼ ਹੀਟ ਪੰਪਸ ਲਈ ਅਪਲਾਈ ਕਰ ਸਕਣਗੇ, ਜਿਸ ਲਈ ਫੈਡਰਲ ਸਰਕਾਰ ਵੱਲੋਂ 250 ਮਿਲੀਅਨ ਡਾਲਰ ਦੀ ਗ੍ਰਾਂਟ ਐਲਾਨੀ ਗਈ ਹੈ।
ਸਟੈਲਾਰਟਨ, ਨੋਵਾ ਸਕੋਸ਼ੀਆ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਇਮੀਗ੍ਰੇਸ਼ਨ ਮੰਤਰੀ ਸ਼ਾਨ ਫਰੇਜ਼ਰ ਨੇ ਆਖਿਆ ਕਿ ਘੱਟ ਤੋਂ ਦਰਮਿਆਨੀ ਆਮਦਨ ਵਾਲੇ ਘਰਾਂ ਲਈ ਹੀਟ ਪੰਪ ਅਫੋਰਡੇਬਿਲਿਟੀ ਗ੍ਰਾਂਟ 5000 ਡਾਲਰ ਤੱਕ ਮੁਹੱਈਆ ਕਰਵਾਈ ਜਾਵੇਗੀ। ਉਨ੍ਹਾਂ ਆਖਿਆ ਕਿ ਇਹ ਰਕਮ ਘਰਾਂ ਵਿੱਚ ਹੀਟ ਪੰਪ ਇਨਸਟਾਲ ਕਰਨ, ਨਵੇਂ ਇਕਿਉਪਮੈਂਟ ਲਈ ਇਲੈਕਟ੍ਰਿਕਲ ਅਪਗ੍ਰੇਡੇਸ਼ਨ ਤੇ ਤੇਲ ਦੇ ਟੈਂਕਸ ਨੂੰ ਹਟਾਉਣ ਲਈ ਖਰਚ ਕੀਤੀ ਜਾਵੇਗੀ।
ਫਰੇਜ਼ਰ ਨੇ ਆਖਿਆ ਕਿ ਅਸਲੀ ਬਚਤ ਉਸ ਸਮੇਂ ਹੋਵੇਗੀ ਜਦੋਂ ਲੋਕਾਂ ਦੇ ਬਿਜਲੀ ਦੇ ਬਿੱਲ ਘੱਟ ਆਉਣਗੇ ਜਾਂ ਇਸ ਤਰ੍ਹਾਂ ਦੇ ਨਿਵੇਸ਼ ਨਾਲ ਘਰਾਂ ਨੂੰ ਨਿੱਘਾ ਰੱਖਣ ਲਈ ਘੱਟ ਬਿੱਲ ਆਉਣਗੇ। ਫਰੇਜ਼ਰ ਨੇ ਆਖਿਆ ਕਿ ਇਹ ਗ੍ਰਾਂਟ ਨਵੇਂ ਸਾਲ ਦੇ ਸ਼ੁਰੂ ਵਿੱਚ ਹੀ ਉਪਲਬਧ ਹੋ ਜਾਵੇਗੀ। ਪਰ ਉਨ੍ਹਾਂ ਇਹ ਨਹੀਂ ਦੱਸਿਆ ਕਿ ਹਰੇਕ ਪ੍ਰੋਵਿੰਸ ਤੇ ਟੈਰੇਟਰੀ ਲਈ ਕਿੰਨੇ ਫੰਡ ਮੁਹੱਈਆ ਕਰਵਾਏ ਜਾਣਗੇ। ਇਸ ਗੱਲ ਬਾਰੇ ਵੀ ਕੋਈ ਜਾਣਕਾਰੀ ਹਾਸਲ ਨਹੀਂ ਹੋ ਸਕੀ ਹੈ ਕਿ ਇਸ ਗ੍ਰਾਂਟ ਲਈ ਕਿੰਨੇ ਲੋਕ ਅਪਲਾਈ ਕਰ ਸਕਣਗੇ।