ਓਨਟਾਰੀਓ, 21 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ (ਓਪੀਪੀ) ਵੱਲੋਂ ਨਸਿ਼ਆਂ ਦੀ ਸਮਗਲਿੰਗ ਕਰਨ ਦੇ ਮਾਮਲੇ ਵਿੱਚ ਸੱਤ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਤੇ ਉਨ੍ਹਾਂ ਕੋਲੋਂ 50,000 ਡਾਲਰ ਤੋਂ ਵੱਧ ਮੁੱਲ ਦੇ ਗੈਰਕਾਨੂੰਨੀ ਨਸ਼ੇ ਵੀ ਬਰਾਮਦ ਕੀਤੇ ਗਏ ਹਨ। ਸੋਮਵਾਰ ਨੂੰ ਓਪੀਪੀ ਵੱਲੋਂ ਜਾਰੀ ਕੀਤੀ ਗਈ ਪ੍ਰੈੱਸ ਰਲੀਜ਼ ਅਨੁਸਾਰ ਇਹ ਗ੍ਰਿਫਤਾਰੀਆਂ ਸਿਟੀ ਆਫ ਦ ਕਵਾਰਥਾ ਲੇਕ (ਸੀਕੇਐਲ) ਵਿੱਚ ਤਫਸੀਲ ਨਾਲ ਕੀਤੀ ਗਈ ਜਾਂਚ ਤੋਂ ਬਾਅਦ ਕੀਤੀਆਂ ਗਈਆਂ।
ਇਸ ਜਾਂਚ ਵਿੱਚ ਦੋ ਮਹੀਨੇ ਦਾ ਸਮਾਂ ਲੱਗਿਆ ਤੇ ਇਸ ਦੀ ਅਗਵਾਈ ਸੀਕੇਐਲ ਕਮਿਊਨਿਟੀ ਸਟਰੀਟ ਕ੍ਰਾਈਮ ਯੂਨਿਟ (ਸੀਐਸਸੀਯੂਂ) ਦੇ ਮੈਂਬਰਾਂ ਵੱਲੋਂ ਕੀਤੀ ਗਈ। ਇਸ ਜਾਂਚ ਵਿੱਚ ਓਪੀਪੀ ਦੇ ਆਰਗੇਨਾਈਜ਼ਡ ਕ੍ਰਾਈਮ ਐਨਫੋਰਸਮੈਂਟ ਬਿਊਰੋ ਤੇ ਬ੍ਰੇਸਬ੍ਰਿੱਜ ਸੀਐਸਸੀਯੂ ਨੇ ਵੀ ਯੋਗਦਾਨ ਪਾਇਆ। ਇਹ ਜਾਂਚ ਉਸ ਸਮੇਂ ਸ਼ੁਰੂ ਕੀਤੀ ਗਈ ਜਦੋਂ ਕਵਾਰਥਾ ਲੇਕਸ, ਖਾਸਤੌਰ ਉੱਤੇ ਫੈਨੇਲੌਨ ਫਾਲਜ਼ ਇਲਾਕੇ ਵਿੱਚ ਓਵਰਡੋਜ਼ ਦੇ ਕਈ ਮਾਮਲੇ ਸਾਹਮਣੇ ਆਏ।
ਰਲੀਜ਼ ਵਿੱਚ ਓਪੀਪੀ ਨੇ ਆਖਿਆ ਕਿ ਜਾਂਚਕਾਰਾਂ ਵੱਲੋਂ ਕੋਕੀਨ, ਫੈਂਟਾਨਿਲ, ਕਾਰਫੈਂਟਾਨਿਲ, ਕ੍ਰਿਸਟਲ ਮੈਥਾਮਫੈਟਾਮਾਈਨ, ਪਰਕੋਸੈਟ ਪਿੱਲਜ਼ ਦੇ ਨਾਲ ਨਾਲ ਕੈਨੇਡੀਅਨ ਕਰੰਸੀ ਵੀ ਬਰਾਮਦ ਕੀਤੀ ਗਈ। ਇਨ੍ਹਾਂ ਨਸਿ਼ਆਂ ਦੀ ਬਜ਼ਾਰ ਵਿੱਚ ਕੀਮਤ 56,000 ਡਾਲਰ ਹੈ। ਗ੍ਰਿਫਤਾਰ ਕੀਤੇ ਗਏ ਸੱਤ ਵਿਅਕਤੀਆਂ ਵਿੱਚੋਂ ਪੰਜ ਫੈਨੇਲੌਨ ਫਾਲਜ਼ ਵਾਸੀ ਹਨ ਜਦਕਿ ਇੱਕ ਲਿੰਡਸੇ ਤੇ ਇੱਕ ਹੋਰ ਪਿੱਕਰਿੰਗ ਦਾ ਰਹਿਣ ਵਾਲਾ ਹੈ। ਮਸ਼ਕੂਕਾਂ ਦੀ ਉਮਰ 21 ਤੋਂ 47 ਸਾਲ ਹੈ।ਪੁਲਿਸ ਨੇ ਦੱਸਿਆ ਕਿ ਤਿੰਨ ਮਸ਼ਕੂਕ ਅਜੇ ਵੀ ਵਾਂਟਿਡ ਹਨ। ਪੁਲਿਸ ਵੱਲੋਂ ਬ੍ਰੇਸਬ੍ਰਿੱਜ ਦੇ 22 ਸਾਲਾ ਸ਼ੈਲਡਨ ਬਰੀ, ਬਰੈਂਪਟਨ ਦੇ 28 ਸਾਲਾ ਸਿਮੌਨ ਜੇਮਜ਼ ਤੇ ਫੈਨੇਲੌਨ ਫਾਲਜ਼ ਦੇ 34 ਸਾਲ ਜੇਮੀ ਬਾਊਂਡੀ ਦੀ ਭਾਲ ਲਈ ਜਨਤਾ ਤੋਂ ਮਦਦ ਵੀ ਮੰਗੀ ਗਈ ਹੈ।