ਨਵੀਂ ਦਿੱਲੀ, 15 ਨਵੰਬਰ (ਪੋਸਟ ਬਿਊਰੋ)- ਦਿੱਲੀ 'ਚ ਲਿਵ-ਇਨ ਪਾਰਟਨਰ ਆਫਤਾਬ ਦੁਆਰਾ ਸ਼ਰਧਾ ਦੀ ਬੇਰਹਿਮੀ ਨਾਲ ਹੱਤਿਆ ਨੇ ਪੂਰੇ ਦੇਸ਼ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਸ਼ਰਧਾ ਦੇ ਕਾਲਜ ਦੋਸਤ ਰਜਤ ਸ਼ੁਕਲਾ ਨੇ ਦੱਸਿਆ ਕਿ ਉਹ ਘਰੇਲੂ ਹਿੰਸਾ ਦਾ ਸ਼ਿਕਾਰ ਹੋਈ ਸੀ। ਉਸ ਨੇ ਮਦਦ ਲਈ ਸ਼ਰਧਾ ਦਾ ਸੁਨੇਹਾ ਵੀ ਯਾਦ ਕੀਤਾ ਜੋ ਉਸ ਨੇ ਆਪਣੇ ਕਤਲ ਤੋਂ ਕਈ ਮਹੀਨੇ ਪਹਿਲਾਂ ਭੇਜਿਆ ਸੀ। ਰਜਤ ਸ਼ੁਕਲਾ ਨੇ ਂਦੱਸਿਆ, "ਉਸਦਾ ਸਰੀਰਕ ਸ਼ੋਸ਼ਣ ਕੀਤਾ ਗਿਆ ਸੀ। ਉਸ ਨੇ ਇਹ ਗੱਲ ਆਪਣੇ ਸਭ ਤੋਂ ਚੰਗੇ ਦੋਸਤ ਨੂੰ ਦੱਸੀ ਸੀ। ਕਿਉਂਕਿ ਅਸੀਂ ਦੋਸਤ ਇੱਕੋ ਸਰਕਲ ਦਾ ਹਿੱਸਾ ਸੀ, ਸਾਨੂੰ ਇਸ ਬਾਰੇ ਸੂਚਿਤ ਕੀਤਾ ਗਿਆ ਸੀ।"
28 ਸਾਲਾ ਆਫਤਾਬ ਨੇ ਮਈ 'ਚ 26 ਸਾਲਾ ਸ਼ਰਧਾ ਦਾ ਗਲਾ ਘੁੱਟ ਕੇ ਹੱਤਿਆ ਕਰ ਦਿੱਤੀ ਅਤੇ ਉਸ ਦੀ ਲਾਸ਼ ਦੇ 35 ਟੁਕੜੇ ਕਰ ਦਿੱਤੇ, ਜਿਸ ਨੂੰ ਉਸ ਨੇ ਦੱਖਣੀ ਦਿੱਲੀ ਦੇ ਛਤਰਪੁਰ 'ਚ ਕਿਰਾਏ ਦੇ ਮਕਾਨ 'ਤੇ 300 ਲੀਟਰ ਦੇ ਫਰਿੱਜ 'ਚ ਰੱਖਿਆ ਅਤੇ 18 ਦਿਨਾਂ 'ਚ ਨੇੜੇ ਦੇ ਜੰਗਲ 'ਚ ਸੁੱਟ ਦਿੱਤਾ।
ਵਿਆਹ ਨੂੰ ਲੈ ਕੇ ਹੋਏ ਝਗੜੇ ਤੋਂ ਬਾਅਦ ਉਸ ਨੇ ਸ਼ਰਧਾ ਦਾ ਕਤਲ ਕਰ ਦਿੱਤਾ। ਉਸ ਨੇ ਪੁੱਛਗਿੱਛ ਦੌਰਾਨ ਪੁਲਿਸ ਕੋਲ ਕਬੂਲ ਕੀਤਾ ਕਿ ਉਸ ਦੇ ਸਰੀਰ ਦੇ ਟੁਕੜੇ ਕਰਨ ਦਾ ਵਿਚਾਰ ਟੀਵੀ ਸ਼ੋਅ 'ਡੈਕਸਟਰ' ਤੋਂ ਪ੍ਰੇਰਿਤ ਸੀ। ਰਜਤ ਸ਼ੁਕਲਾ ਨੇ ਦੱਸਿਆ ਕਿ ਕਿਸ ਤਰ੍ਹਾਂ ਆਫਤਾਬ ਦੀ ਜ਼ਿੰਦਗੀ 'ਚ ਆਉਣ ਤੋਂ ਬਾਅਦ ਸ਼ਰਧਾ ਬਦਲਣ ਲੱਗੀ। ਉਨ੍ਹਾਂ ਕਿਹਾ ਕਿ ਘਟਨਾ ਬਾਰੇ ਸੋਚ ਕੇ ਹੀ ਰੂਹ ਕੰਬ ਜਾਂਦੀ ਹੈ। ਮੈਂ ਤੇ ਸ਼ਰਧਾ ਇਕੱਠੇ ਪੜ੍ਹਦੇ ਸੀ। ਉਹ ਪੱਤਰਕਾਰ ਬਣਨਾ ਚਾਹੁੰਦੀ ਸੀ ਅਤੇ ਬਹੁਤ ਸਰਗਰਮ ਸੀ। ਸਾਲ 2018 'ਚ ਆਫਤਾਬ ਉਨ੍ਹਾਂ ਦੀ ਜ਼ਿੰਦਗੀ 'ਚ ਆਇਆ, ਜਿਸ ਕਾਰਨ ਉਨ੍ਹਾਂ 'ਚ ਬਦਲਾਅ ਆਉਣ ਲੱਗੇ। ਪਰ ਇਹ ਚੰਗੀਆਂ ਤਬਦੀਲੀਆਂ ਨਹੀਂ ਸਨ।
ਰਜਤ ਨੇ ਕਿਹਾ ਕਿ ਉਹ ਸੁੱਕਣ ਲੱਗ ਪਈ ਸੀ। ਸਾਨੂੰ ਇਸ ਬਾਰੇ 2019 ਵਿੱਚ ਪਤਾ ਲੱਗਾ, ਸ਼ੁਰੂ ਵਿੱਚ ਆਫਤਾਬ ਇੱਕ ਆਮ ਵਿਅਕਤੀ ਵਾਂਗ ਲੱਗ ਰਿਹਾ ਸੀ। ਸਾਨੂੰ ਦੱਸਿਆ ਗਿਆ ਕਿ ਦੋਵੇਂ ਕੰਮ ਕਾਰਨ ਦਿੱਲੀ ਸ਼ਿਫਟ ਹੋ ਗਏ ਸਨ। ਜਿਸ ਤਰ੍ਹਾਂ ਉਸ ਦਾ ਕਤਲ ਹੋਇਆ ਹੈ, ਉਸ ਬਾਰੇ ਸੋਚ ਕੇ ਰੂਹ ਕੰਬ ਜਾਂਦੀ ਹੈ। ਰਜਤ ਨੇ ਇਸ ਪਿੱਛੇ ਕਿਸੇ ਵੱਡੀ ਸਾਜ਼ਿਸ਼ ਦਾ ਸ਼ੱਕ ਵੀ ਜ਼ਾਹਰ ਕੀਤਾ ਅਤੇ ਕਿਹਾ ਕਿ ਇਹ ਪ੍ਰੇਮ ਕਹਾਣੀ ਨਹੀਂ ਹੋ ਸਕਦੀ। ਕੋਈ ਵੀ ਪ੍ਰੇਮ ਕਹਾਣੀ ਇਸ ਤਰ੍ਹਾਂ ਖਤਮ ਨਹੀਂ ਹੋ ਸਕਦੀ।