ਝਾਰਖੰਡ, 03 ਅਕਤੂਬਰ (ਪੋਸਟ ਬਿਊਰੋ) - ਝਾਰਖੰਡ ਦੇ ਗਿਰੀਡੀਹ ਜਿ਼ਲੇ ਦੀ ਪੁਲਸ ਨੇ ਰਾਜਸਥਾਨ ਅਤੇ ਮੱਧ ਪ੍ਰਦੇਸ਼ ਸਮੇਤ ਕਈ ਇਲਾਕਿਆਂ 'ਚ ਪਿੰਡ ਦੀਆਂ ਲੜਕੀਆਂ ਨੂੰ ਵੇਚਣ ਵਾਲੇ ਗਿਰੋਹ ਦੇ ਇਕ ਦਰਜਨ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ।ਪੁਲਸ ਨੇ ਉਨ੍ਹਾਂ ਦੇ ਕਬਜ਼ੇ 'ਚੋਂ ਇਕ ਨਾਬਾਲਗ ਲੜਕੀ ਵੀ ਬਰਾਮਦ ਕੀਤੀ ਹੈ।ਇਸ ਨੂੰ ਬਾਹਰ ਕੱਢ ਕੇ ਵੇਚਣ ਦੀਆਂ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਸਨ।ਪੁਲਿਸ ਨੇ ਜਿਸ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ, ਉਸ ਵਿੱਚ ਬਿਹਾਰ, ਰਾਜਸਥਾਨ ਅਤੇ ਮੱਧ ਪ੍ਰਦੇਸ਼ ਦੇ ਲੋਕ ਸ਼ਾਮਲ ਹਨ।
ਗਿਰੀਡੀਹ ਦੇ ਏਐਸਪੀ ਹਰੀਸ਼ ਬਿਨ ਜ਼ਮਾਨ ਨੇ ਦੱਸਿਆ ਕਿ ਜਿ਼ਲ੍ਹੇ ਦੇ ਪਚੰਬਾ ਥਾਣਾ ਖੇਤਰ ਦੇ ਨਾਰੋਬਾਦ ਪਿੰਡ ਤੋਂ ਤਿੰਨ ਮਹੀਨੇ ਪਹਿਲਾਂ ਇੱਕ ਨਾਬਾਲਗ ਲੜਕੀ ਨੂੰ ਅਗਵਾ ਕੀਤਾ ਗਿਆ ਸੀ।ਮਾਮਲੇ ਦੀ ਜਾਂਚ ਦੌਰਾਨ ਪੁਲਿਸ ਇੱਕ ਸੰਗਠਿਤ ਗਿਰੋਹ ਤੱਕ ਪਹੁੰਚ ਗਈ।ਇਸ ਮਾਮਲੇ ਦੀ ਸ਼ੁਰੂਆਤੀ ਜਾਂਚ ਵਿੱਚ ਜਿ਼ਲ੍ਹੇ ਦੇ ਬੇਂਗਾਬਾਦ ਦੀ ਮੀਨਾ ਦੇਵੀ ਦੀ ਸ਼ਮੂਲੀਅਤ ਸਾਹਮਣੇ ਆਈ ਸੀ।
ਪੁਲਿਸ ਨੂੰ ਪਤਾ ਲੱਗਾ ਕਿ ਮੀਨਾ ਦੇਵੀ ਆਪਣੇ ਇੱਕ ਸਾਥੀ ਲਲਿਤਾ ਕੁਮਾਰੀ ਅਤੇ ਗਯਾ ਦੇ ਸ਼ੰਕਰ ਚੌਧਰੀ ਨਾਲ ਮਿਲ ਕੇ ਲੜਕੀ ਨੂੰ ਰਾਜਸਥਾਨ ਵੇਚਣ ਦੀ ਯੋਜਨਾ ਬਣਾ ਰਹੇ ਸਨ।ਇਸ 'ਤੇ ਪਚੰਬਾ ਪੁਲਸ ਨੇ ਕਈ ਥਾਵਾਂ 'ਤੇ ਛਾਪੇਮਾਰੀ ਕਰਕੇ ਇਸ ਪੂਰੇ ਰੈਕੇਟ ਨਾਲ ਜੁੜੇ ਇਕ ਦਰਜਨ ਲੋਕਾਂ ਨੂੰ ਫੜ੍ਹ ਲਿਆ ਹੈ।ਪੁਲਿਸ ਅਨੁਸਾਰ ਇਹ ਗਿਰੋਹ ਇਲਾਕੇ ਦੀਆਂ ਕਈ ਲੜਕੀਆਂ ਨੂੰ ਵਿਆਹ ਦੇ ਨਾਂ 'ਤੇ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ 'ਚ ਵੇਚ ਚੁੱਕਾ ਹੈ।
ਜੇਲ ਭੇਜੇ ਗਏ ਦੋਸ਼ੀਆਂ ਨੂੰ ਰਿਮਾਂਡ 'ਤੇ ਲੈ ਕੇ ਹੋਰ ਪੁੱਛਗਿੱਛ ਕੀਤੀ ਜਾਵੇਗੀ।ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀਆਂ ਵਿਚ ਗਯਾ ਦੇ ਸੈਦਪੁਰ ਵਾਸੀ ਭੋਲਾ ਕੁਮਾਰ ਦਾਸ, ਗਿਰੀਡੀਹ ਦੇ ਗਾਓਨਾ ਥਾਣਾ ਖੇਤਰ ਅਧੀਨ ਪੈਂਦੇ ਪਿੰਡ ਬਦੀਡੀਹ ਵਾਸੀ ਗੋਵਿੰਦ ਸਾਹੂ, ਗਿਰੀਡੀਹ ਜਿ਼ਲ੍ਹੇ ਦੀ ਮੀਨਾ ਦੇਵੀ ਅਤੇ ਲਲਿਤਾ ਕੁਮਾਰੀ, ਗਯਾ ਦੇ ਬੇਲਾਗੰਜ ਵਾਸੀ ਸ਼ੰਕਰ ਚੌਧਰੀ ਸ਼ਾਮਲ ਹਨ।