ਓਨਟਾਰੀਓ, 2 ਅਕਤੂਬਰ (ਪੋਸਟ ਬਿਊਰੋ) : ਨਵੇਂ ਸਿਰੇ ਤੋਂ ਗੱਲਬਾਤ ਸ਼ੁਰੂ ਹੋਣ ਤੋਂ ਪਹਿਲਾਂ ਪ੍ਰੋਵਿੰਸ ਭਰ ਦੇ ਹਜ਼ਾਰਾਂ ਐਜੂਕੇਸ਼ਨ ਵਰਕਰਜ਼ ਹੜਤਾਲ ਦੇ ਪੱਖ ਵਿੱਚ ਵੋਟ ਕਰ ਸਕਦੇ ਹਨ।
ਸੀਯੂਪੀਈ ਦੀ ਓਨਟਾਰੀਓ ਸਕੂਲ ਬੋਰਡਜ਼ ਕਾਊਂਸਲ ਆਫ ਯੂਨੀਅਨਜ਼ (ਓਐਸਬੀਸੀਯੂ), ਜਿਹੜੀ ਪਬਲਿਕ, ਕੈਥੋਲਿਕ, ਇੰਗਲਿਸ਼ ਤੇ ਫਰੈਂਚ ਸਕੂਲ ਸਿਸਟਮਜ਼ ਵਿੱਚ 55,000 ਲਾਇਬ੍ਰੇਰੀਅਨਜ਼, ਕੇਅਰਟੇਕਰਜ਼ ਤੇ ਐਜੂਕੇਸ਼ਨ ਅਸਿਸਟੈਂਟਸ ਦੀ ਨੁਮਾਇੰਦਗੀ ਕਰਦੀ ਹੈ, ਵੱਲੋਂ ਬੀਤੇ ਮਹੀਨੇ ਪ੍ਰੋਵਿੰਸ਼ੀਅਲ ਵਾਰਤਾਕਾਰ ਨਾਲ ਗੱਲਬਾਤ ਨਿਰਾਸ਼ਾਜਨਕ ਰਹਿਣ ਉਪਰੰਤ ਆਪਣੇ ਮੈਂਬਰਾਂ ਨੂੰ ਹੜਤਾਲ ਦੇ ਪੱਖ ਵਿੱਚ ਵੋਟ ਪਾਉਣ ਲਈ ਆਖਿਆ ਗਿਆ ਸੀ।
ਇਸ ਵੋਟ ਦੇ ਨਤੀਜੇ ਸੋਮਵਾਰ ਸਵੇਰੇ ਜਾਰੀ ਕੀਤੇ ਜਾਣਗੇ। ਯੂਨੀਅਨ ਵੱਲੋਂ ਸਾਲਾਨਾ ਭੱਤਿਆਂ ਵਿੱਚ 3·25 ਡਾਲਰ ਪ੍ਰਤੀ ਘੰਟੇ ਜਾਂ 11·7 ਫੀ ਸਦੀ ਵਾਧਾ ਕਰਨ ਦੇ ਨਾਲ ਨਾਲ ਘੱਟ ਤੋਂ ਘੱਟ ਸਟਾਫਿੰਗ ਰਿਕੁਆਇਰਮੈਂਟਸ, ਹਰੇਕ ਕਿੰਡਰਗਾਰਟਨ ਕਲਾਸ ਲਈ ਨਿਰਧਾਰਤ ਅਰਲੀ ਚਾਈਲਡਹੁੱਡ ਐਜੂਕੇਟਰ ਅਤੇ ਰੋਜ਼ਗਾਰ ਦੇ 1500 ਤੋਂ 1700 ਨਵੇਂ ਮੌਕਿਆਂ ਲਈ 100 ਮਿਲੀਅਨ ਡਾਲਰ ਰੱਖਣ ਦੀ ਮੰਗ ਕੀਤੀ ਜਾ ਰਹੀ ਹੈ।
ਫੋਰਡ ਸਰਕਾਰ ਨੇ ਸਾਲ ਦੇ 40,000 ਡਾਲਰ ਤੋਂ ਘੱਟ ਕਮਾਉਣ ਵਾਲੇ ਐਜੂਕੇਸ਼ਨ ਵਰਕਰਜ਼ ਨੂੰ ਸਾਲ ਦਾ ਦੋ ਫੀ ਸਦੀ ਵਾਧਾ ਦੇਣ ਅਤੇ ਬਾਕੀ ਸਾਰਿਆਂ ਨੂੰ ਪ੍ਰਸਤਾਵਿਤ ਚਾਰ ਸਾਲਾ ਡੀਲ ਤਹਿਤ 1·25 ਫੀ ਸਦੀ ਵਾਧਾ ਦੇਣ ਦੀ ਪੇਸ਼ਕਸ਼ ਕੀਤੀ ਹੈ। ਸੀਯੂਪੀਈ ਦੀ ਓਨਟਾਰੀਓ ਸਕੂਲ ਬੋਰਡਜ਼ ਕਾਊਂਸਲ ਆਫ ਯੂਨੀਅਨਜ਼ ਦੀ ਪ੍ਰੈਜ਼ੀਡੈਂਟ ਲੌਰਾ ਵਾਲਟਨ ਨੇ ਆਖਿਆ ਕਿ ਫੋਰਡ ਸਰਕਾਰ ਨੂੰ ਸਾਡੇ ਨਾਲ ਖੇਡਾਂ ਖੇਡਣੀਆਂ ਬੰਦ ਕਰਨੀਆਂ ਚਾਹੀਦੀਆਂ ਹਨ ਤੇ ਸਾਡੇ ਜਾਇਜ਼ ਤੇ ਢੁਕਵੇਂ ਪ੍ਰਸਤਾਵ ਨੂੰ ਮੰਨ ਲੈਣਾ ਚਾਹੀਦਾ ਹੈ।
ਇਸ ਦੌਰਾਨ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਵੱਲੋਂ ਯੂਨੀਅਨ ਦੇ ਇਸ ਕਦਮ ਦੀ ਨਿਖੇਧੀ ਕੀਤੀ ਗਈ। ਉਨ੍ਹਾਂ ਆਖਿਆ ਕਿ ਯੂਨੀਅਨ ਨੇ ਸਰਕਾਰ ਦੀ ਪਹਿਲੀ ਪੇਸ਼ਕਸ਼ ਤੋਂ ਪਹਿਲਾਂ ਹੀ ਹੜਤਾਲ ਲਈ ਵੋਟਾਂ ਇੱਕਠੀਆਂ ਕਰਨ ਦੀ ਯੋਜਨਾ ਬਣਾ ਲਈ ਸੀ।