ਆਗਰਾ, 02 ਅਕਤੂਬਰ (ਪੋਸਟ ਬਿਊਰੋ) - ਉੱਤਰ ਪ੍ਰਦੇਸ਼ ਦੇ ਆਗਰਾ ਜਿ਼ਲ੍ਹੇ ਵਿੱਚ ਚੱਲ ਰਹੀ ਅਗਨੀਵੀਰ ਫੌਜ ਭਰਤੀ ਰੈਲੀ ਵਿੱਚ ਸ਼ਨੀਵਾਰ ਨੂੰ 115 ਨੌਜਵਾਨ ਫੜੇ ਗਏ ਜੋ ਆਪਣੀ ਸਮਰੱਥਾ ਵਧਾਉਣ ਲਈ ਸਟੀਰੌਇਡ ਅਤੇ ਹੋਰ ਦਵਾਈਆਂ ਲੈ ਰਹੇ ਸਨ।ਇਹ ਜਾਣਕਾਰੀ ਭਰਤੀ ਅਧਿਕਾਰੀ ਨੇ ਦਿੱਤੀ।
ਅਗਨੀਵੀਰ ਭਰਤੀ ਰੈਲੀ ਦੇ ਸੰਚਾਲਕ ਨੇ ਦੱਸਿਆ ਕਿ ਅਲੀਗੜ੍ਹ ਦੇ ਖੈਰ ਅਤੇ ਏਟਾ ਦੀ ਅਲੀਗੰਜ ਤਹਿਸੀਲ ਦੇ 115 ਨੌਜਵਾਨ ਜਿਨ੍ਹਾਂ ਨੇ ਆਪਣੀ ਸਮਰੱਥਾ ਵਧਾਉਣ ਲਈ ਸਟੀਰੌਇਡ ਅਤੇ ਹੋਰ ਦਵਾਈਆਂ ਦਾ ਸੇਵਨ ਕੀਤਾ ਸੀ, ਉਹ ਆਨੰਦ ਇੰਜੀਨੀਅਰਿੰਗ ਕਾਲਜ ਵਿਖੇ ਚੱਲ ਰਹੀ ਫੌਜ ਦੀ ਅਗਨੀਵੀਰ ਭਰਤੀ ਰੈਲੀ ਵਿੱਚ ਸ਼ਾਮਲ ਹੋਏ।ਉਨ੍ਹਾਂ ਦੱਸਿਆ ਕਿ ਸਿਵਲ ਮੈਡੀਕਲ ਟੀਮ ਨੇ ਸਰੀਰਕ ਮੁਆਇਨਾ ਤੋਂ ਪਹਿਲਾਂ ਉਨ੍ਹਾਂ ਨੂੰ ਜਾਂਚ ਵਿੱਚ ਮਾਰਕ ਕੀਤਾ।
ਅਧਿਕਾਰੀ ਨੇ ਦੱਸਿਆ ਕਿ ਇਹ ਨੌਜਵਾਨ ਭਰਤੀ ਪ੍ਰਕਿਰਿਆ ਤੋਂ ਵਾਂਝੇ ਰਹਿ ਗਏ ਹਨ।ਅਧਿਕਾਰੀ ਨੇ ਦੱਸਿਆ ਕਿ ਇਨ੍ਹਾਂ ਨੌਜਵਾਨਾਂ ਖਿ਼ਲਾਫ਼ ਬਣਦੀ ਕਾਨੂੰਨੀ ਕਾਰਵਾਈ ਵੀ ਕੀਤੀ ਜਾ ਰਹੀ ਹੈ।ਆਗਰਾ ਵਿੱਚ ਪਿਛਲੇ ਹਫ਼ਤੇ 26 ਅਤੇ 27 ਸਤੰਬਰ ਨੂੰ ਅਗਨੀਵੀਰ ਭਰਤੀ ਰੈਲੀ ਵਿੱਚ ਕੁੱਲ 94 ਉਮੀਦਵਾਰ ਕਥਿਤ ਤੌਰ 'ਤੇ ਜਾਅਲੀ ਦਸਤਾਵੇਜ਼ਾਂ ਦੀ ਵਰਤੋਂ ਕਰਦੇ ਹੋਏ ਫੜੇ ਗਏ ਸਨ।ਗ੍ਰਿਫਤਾਰ ਕੀਤੇ ਗਏ ਸਾਰੇ ਉਮੀਦਵਾਰ ਆਗਰਾ, ਹਾਥਰਸ ਅਤੇ ਫਿਰੋਜ਼ਾਬਾਦ ਜਿ਼ਲਿਆਂ ਦੇ ਰਹਿਣ ਵਾਲੇ ਸਨ। ਇਨ੍ਹਾਂ 94 ਕੇਸਾਂ ਵਿੱਚੋਂ 38 ਕੇਸਾਂ ਵਿੱਚ ਉਮੀਦਵਾਰਾਂ ਨੇ ਆਪਣੀ ਜਨਮ ਮਿਤੀ ਵਿੱਚ ਪੰਜ ਤੋਂ ਛੇ ਸਾਲ ਦਾ ਵਾਧਾ ਕੀਤਾ ਸੀ ਅਤੇ ਜਾਅਲੀ ਦਸਤਾਵੇਜ਼ਾਂ ਦੇ ਆਧਾਰ ’ਤੇ ਕਈ ਵਾਰ ਆਪਣੇ ਰਿਹਾਇਸ਼ੀ ਸਰਟੀਫਿਕੇਟ ਵੀ ਬਦਲੇ ਸਨ।