ਓਟਵਾ, 29 ਸਤੰਬਰ (ਪੋਸਟ ਬਿਊਰੋ) : ਆਰਸੀਐਮਪੀ ਦਾ ਕਹਿਣਾ ਹੈ ਕਿ ਜੈਰੇਮੀ ਮੈਕੈਂਜ਼ੀ ਦੀ ਗ੍ਰਿਫਤਾਰੀ ਕੰਜ਼ਰਵੇਟਿਵ ਆਗੂ ਪਿਏਰ ਪੌਲੀਏਵਰ ਦੀ ਬੇਨਤੀ ਉੱਤੇ ਨਹੀਂ ਕੀਤੀ ਗਈ ਹੈ। ਜਿ਼ਕਰਯੋਗ ਹੈ ਕਿ ਬੀਤੇ ਦਿਨੀ ਆਪਣੀ ਪਤਨੀ ਖਿਲਾਫ ਕੀਤੀਆਂ ਗਈਆਂ ਟਿੱਪਣੀਆਂ ਦੇ ਸਬੰਧ ਵਿੱਚ ਪੌਲੀਏਵਰ ਨੇ ਮਾਊਂਟੀਜ਼ ਨੂੰ ਇਸ ਮਸਲੇ ਵਿੱਚ ਦਖਲ ਦੇਣ ਦੀ ਅਪੀਲ ਕੀਤੀ ਸੀ।
ਬੁੱਧਵਾਰ ਨੂੰ ਆਨਲਾਈਨ ਗਰੁੱਪ ਡਾਇਗਲੌਨ ਨੇ ਬਾਨੀ ਨੂੰ ਕੋਲ ਹਾਰਬਰ, ਨੋਵਾ ਸਕੋਸ਼ੀਆ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ। ਜੁਲਾਈ ਵਿੱਚ ਸਸਕੈਚਵਨ ਵਿੱਚ ਮਾਊਂਟੀਜ਼ ਵੱਲੋਂ ਇਸ ਖਿਲਾਫ ਲਾਏ ਗਏ ਚਾਰਜਿਜ਼ ਦੇ ਮਾਮਲੇ ਵਿੱਚ ਕੈਨੇਡਾ ਭਰ ਵਿੱਚ ਵਾਰੰਟ ਕੱਢੇ ਗਏ ਸਨ। ਨਵੰਬਰ 2021 ਵਿੱਚ ਵਿਸਕਾਊਂਟ, ਸਸਕੈਚਵਨ ਨੇੜੇ ਕਥਿਤ ਤੌਰ ਉੱਤੇ ਕੀਤੇ ਗਏ ਹਮਲੇ ਦੇ ਸਬੰਧ ਵਿੱਚ ਪੁਲਿਸ ਨੂੰ ਮਿਲੀ ਰਿਪੋਰਟ ਤੋਂ ਬਾਅਦ ਮੈਕੈਂਜ਼ੀ ਨੂੰ ਹਮਲੇ, ਹਥਿਆਰ ਤਾਨਣ, ਸ਼ਰਾਰਤ ਕਰਨ ਤੇ ਪਾਬੰਦੀਸ਼ੁਦਾ ਹਥਿਆਰ ਦੀ ਵਰਤੋਂ ਕਰਨ ਲਈ ਚਾਰਜ ਕੀਤਾ ਗਿਆ ਸੀ।
ਸੋਮਵਾਰ ਨੂੰ ਪੌਲੀਏਵਰ ਨੇ ਆਖਿਆ ਕਿ ਉਨ੍ਹਾਂ ਆਰਸੀਐਮਪੀ ਨੂੰ ਇਹ ਅਪੀਲ ਕੀਤੀ ਸੀ ਕਿ ਉਨ੍ਹਾਂ ਦੀ ਪਤਨੀ ਅਨਾਇਦਾ ਪੌਲੀਏਵਰ ਉੱਤੇ ਜਿਨਸੀ ਹਮਲਾ ਕਰਨ ਵਰਗੀਆਂ ਕੀਤੀਆਂ ਵਾਹਿਆਤ ਟਿੱਪਣੀਆਂ ਦੇ ਸਬੰਧ ਵਿੱਚ ਉਹ ਕੁੱਝ ਕਰਨ।