ਨਵੀਂ ਦਿੱਲੀ, 27 ਸਤੰਬਰ (ਪੋਸਟ ਬਿਊਰੋ) - ਦਿੱਲੀ ਆਬਕਾਰੀ ਨੀਤੀ ਮਾਮਲੇ ਦੀ ਜਾਂਚ ਕਰ ਰਹੀ ਸੀਬੀਆਈ ਨੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਦੇ ਕਰੀਬੀ ਵਿਜੇ ਨਾਇਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।ਸੀਬੀਆਈ ਦੀ ਐਫਆਈਆਰ ਵਿੱਚ ਵਿਜੇ ਨਾਇਰ ਪੰਜਵੇਂ ਨੰਬਰ ਦਾ ਮੁਲਜ਼ਮ ਹੈ।ਇੱਕ ਇਵੈਂਟ ਮੈਨੇਜਮੈਂਟ ਕੰਪਨੀ ਦੇ ਸਾਬਕਾ ਸੀ.ਈ.ਓ. ਵਿਜੇ ਨਾਇਰ ਲੰਬੇ ਸਮੇਂ ਤੋਂ ਆਮ ਆਦਮੀ ਪਾਰਟੀ ਨਾਲ ਜੁੜੇ ਹੋਏ ਹਨ, ਹਾਲਾਂਕਿ ਉਨ੍ਹਾਂ ਕੋਲ ਕੋਈ ਅਹੁਦਾ ਨਹੀਂ ਹੈ।ਸੀਬੀਆਈ ਮਨੀਸ਼ ਸਿਸੋਦੀਆ ਅਤੇ ਵਿਜੇ ਨਾਇਰ ਸਮੇਤ ਘੱਟੋ-ਘੱਟ 14 ਹੋਰ ਵਿਅਕਤੀਆਂ ਦੀ ਭੂਮਿਕਾ ਦੀ ਜਾਂਚ ਕਰ ਰਹੀ ਹੈ।
ਸਤੰਬਰ ਦੇ ਪਹਿਲੇ ਹਫ਼ਤੇ ਤੱਕ ਸੀਬੀਆਈ ਨੇ ਦਿੱਲੀ ਦੇ ਆਬਕਾਰੀ ਮਾਮਲੇ ਵਿਚ ਇੱਕ ਵਾਰ ਪੰਜ ਲੋਕਾਂ ਤੋਂ ਪੁੱਛਗਿੱਛ ਕੀਤੀ ਸੀ।ਇਹ ਪੰਜ ਲੋਕ ਹਨ ਸੰਨੀ ਮਰਵਾਹਾ, ਅਮਨਦੀਪ ਢੱਲ, ਅਮਿਤ ਅਰੋੜਾ, ਸਮੀਰ ਮਹਿੰਦਰੂ ਅਤੇ ਅਰੁਣ ਰਾਮਚੰਦਰ ਪਿੱਲਈ।ਇਨ੍ਹਾਂ ਸਾਰਿਆਂ ਤੋਂ ਇੱਕ ਵਾਰ ਸੀਬੀਆਈ ਹੈੱਡਕੁਆਰਟਰ ਵਿਚ ਪੁੱਛਗਿੱਛ ਕੀਤੀ ਗਈ ਸੀ।ਵਿਜੇ ਨਾਇਰ ਅਤੇ ਦਿਨੇਸ਼ ਅਰੋੜਾ ਵਿਦੇਸ਼ ਸਨ ਇਸ ਲਈ ਉਨ੍ਹਾਂ ਤੋਂ ਪੁੱਛਗਿੱਛ ਨਹੀਂ ਕੀਤੀ ਗਈ।
ਐਫਆਈਆਰ ਦੇ ਅਨੁਸਾਰ, ਸੰਨੀ ਮਾਰਵਾਹ ਮਹਾਦੇਵ ਸ਼ਰਾਬ ਵਿਚ ਇੱਕ ਅਥੋਰਾਈਜ਼ਡ ਸਿਗਨੇਟਰੀ ਸੀ ਅਤੇ ਪੌਂਟੀ ਚੱਢਾ ਨਾਲ ਸਬੰਧਤ ਕੰਪਨੀਆਂ ਵਿੱਚ ਡਾਇਰੈਕਟਰ ਵੀ ਹੈ।ਸੰਨੀ ਮਾਰਵਾਹ ਉਸ ਵੇਲੇ ਦੇ ਆਬਕਾਰੀ ਅਧਿਕਾਰੀਆਂ ਦੇ ਬਹੁਤ ਕਰੀਬੀ ਦੱਸੇ ਜਾਂਦੇ ਹਨ।ਉਹ ਆਬਕਾਰੀ ਅਧਿਕਾਰੀਆਂ ਨੂੰ ਫਾਇਦਾ ਪਹੁੰਚਾ ਕੇ ਲਾਇਸੈਂਸ ਦਿਵਾਉਣ ਵਿਚ ਵਿਚੋਲੇ ਦਾ ਕੰਮ ਕਰਦਾ ਸੀ।ਮਹਾਦੇਵ ਲਿਕਰਸ ਕੰਪਨੀ ਓਖਲਾ ਦੇ ਬੀ 303 ਇੰਡਸਟਰੀਅਲ ਏਰੀਆ ਵਿਚ ਸਥਿਤ ਹੈ।ਇਸ ਤੋਂ ਇਲਾਵਾ 38 ਕਾਲਕਾਜੀ ਵਿੱਚ ਵੀ ਇੱਕ ਦਫ਼ਤਰ ਹੈ।ਇਸ 'ਚ ਸੰਨੀ ਮਾਰਵਾਹ ਸਿਗਨੇਟਰੀ ਹਨ।