ਓਨਟਾਰੀਓ, 20 ਸਤੰਬਰ (ਪੋਸਟ ਬਿਊਰੋ) : ਮਹਾਂਮਾਰੀ ਦੌਰਾਨ ਕਈ ਇੰਸ਼ੋਰੈਂਸ ਕੰਪਨੀਆਂ ਵੱਲੋਂ ਆਪਣੇ ਪ੍ਰੀਮੀਅਮਜ਼ ਵਿੱਚ ਕਟੌਤੀ ਕੀਤੀ ਗਈ ਤੇ ਜਾਂ ਫਿਰ ਛੋਟ ਦਿੱਤੀ ਗਈ ਪਰ ਹੁਣ ਜਦੋਂ ਟਰੈਫਿਕ ਮਹਾਂਮਾਰੀ ਤੋਂ ਪਹਿਲਾਂ ਵਾਲੇ ਪੱਧਰ ਉੱਤੇ ਪਰਤ ਰਿਹਾ ਹੈ ਤਾਂ ਅਜਿਹੇ ਵਿੱਚ ਕੁੱਝ ਇੰਸ਼ੋਰੈਂਸ ਕੰਪਨੀਆਂ ਵੱਲੋਂ ਆਪਣੇ ਰੇਟਸ ਵਿੱਚ ਵਾਧਾ ਕੀਤਾ ਜਾ ਰਿਹਾ ਹੈ।
Ratesdotca ਦੀ ਇੰਸ਼ੋਰੈਂਸ ਮਾਹਿਰ ਤਨੀਸ਼ਾ ਕਿਸ਼ਨ ਨੇ ਦੱਸਿਆ ਕਿ ਇਸ ਸਮੇਂ ਤਾਂ ਕੁੱਝ ਕੁ ਕੰਪਨੀਆਂ ਵੱਲੋਂ ਇਹ ਵਾਧਾ ਕੀਤਾ ਜਾ ਰਿਹਾ ਹੈ ਪਰ ਜਲਦ ਹੀ ਦੂਜੀਆਂ ਕੰਪਨੀਆਂ ਦੇ ਵੀ ਅਜਿਹਾ ਕਰਨ ਦੀ ਸੰਭਾਵਨਾ ਹੈ।ਵੈੱਬਸਾਈਟ ਅਨੁਸਾਰ ਕੁੱਝ ਕੰਪਨੀਆਂ ਵੱਲੋਂ ਇਨ੍ਹਾਂ ਦਰਾਂ ਵਿੱਚ ਇੱਕ ਤੋਂ 12 ਫੀ ਸਦੀ ਦਾ ਵਾਧਾ ਕੀਤਾ ਗਿਆ ਹੈ। ਇਹ ਵੀ ਦੱਸਿਆ ਗਿਆ ਕਿ ਪੈਫਕੋ ਇੰਸ਼ੋਰੈਂਸ ਕੰਪਨੀ ਨੇ ਇਨ੍ਹਾਂ ਦਰਾਂ ਵਿੱਚ 5 ਫੀ ਸਦੀ ਜਦਕਿ ਜੈਨਿਥ ਇੰਸ਼ੋਰੈਂਸ ਕੰਪਨੀ ਨੇ ਇੰਸ਼ੋਰੈਂਸ ਦਰਾਂ ਵਿੱਚ 10·37 ਫੀ ਸਦੀ ਦਾ ਵਾਧਾ ਕੀਤਾ ਹੈ।
ਕਿਸ਼ਨ ਨੇ ਆਖਿਆ ਕਿ ਮਹਾਂਮਾਰੀ ਤੋਂ ਬਾਅਦ ਟਰੈਫਿਕ ਵਧਣ ਕਾਰਨ ਹਾਦਸੇ ਵੀ ਪਹਿਲਾਂ ਵਾਂਗ ਹੀ ਹੋਣ ਲੱਗੇ ਹਨ। ਉੱਤੋਂ ਮਹਿੰਗਾਈ ਕਾਰਨ ਟੁੱਟੀਆਂ ਭੱਜੀਆਂ ਗੱਡੀਆਂ ਨੂੰ ਠੀਕ ਕਰਨਾ ਵੀ ਖਰਚੀਲਾ ਹੋ ਗਿਆ ਹੈ, ਗੱਡੀਆਂ ਦੇ ਕਈ ਹਿੱਸੇ ਲੱਭਦੇ ਹੀ ਨਹੀਂ ਤੇ ਜੇ ਤੁਸੀਂ ਹਾਦਸੇ ਦਾ ਸਿ਼ਕਾਰ ਹੋਈ ਗੱਡੀ ਨੂੰ ਬਦਲਣਾ ਚਾਹੁੰਦੇ ਹੋਂ ਤਾਂ ਉਸ ਲਈ ਲੰਮੀਂ ਉਡੀਕ ਸੂਚੀ ਹੈ।