ਓਟਵਾ, 11 ਸਤੰਬਰ (ਪੋਸਟ ਬਿਊਰੋ) : ਪਿਏਰ ਪੌਲੀਏਵਰ ਕੰਜ਼ਰਵੇਟਿਵ ਪਾਰਟੀ ਆਫ ਕੈਨੇਡਾ ਦੇ ਨਵੇਂ ਆਗੂ ਚੁਣ ਲਏ ਗਏ ਹਨ। ਉਨ੍ਹਾਂ ਨੂੰ ਰਿਕਾਰਡ ਤੋੜ ਵੋਟਾਂ ਹਾਸਲ ਹੋਈਆਂ।
ਸੱਤ ਮਹੀਨੇ ਚੱਲੀ ਕੈਂਪੇਨ ਤੋਂ ਬਾਅਦ ਲੰਮੇਂ ਸਮੇਂ ਤੋਂ ਐਮਪੀ ਤੇ ਓਨਟਾਰੀਓ ਤੋਂ ਸਾਬਕਾ ਕੈਬਨਿਟ ਮੰਤਰੀ ਰਹੇ ਪੌਲੀਏਵਰ ਨੂੰ ਪਹਿਲੇ ਮਤਦਾਨ ਵਿੱਚ 22,993 ਵੋਟਾਂ ਹਾਸਲ ਹੋਈਆਂ। ਉਨ੍ਹਾਂ ਨੂੰ ਦੇਸ਼ ਭਰ ਵਿੱਚ ਭਰਵਾਂ ਹੁੰਗਾਰਾ ਮਿਲਿਆ ਤੇ ਲੱਗਭਗ ਹਰੇਕ ਹਲਕੇ ਤੋਂ ਉਹ ਉਮੀਦਵਾਰਾਂ ਵਿੱਚੋਂ ਮੈਂਬਰਾਂ ਦੀ ਪਹਿਲੀ ਪਸੰਦ ਰਹੇ।ਸ਼ਨਿੱਚਰਵਾਰ ਨੂੰ ਓਟਵਾ ਦੇ ਕਨਵੈਂਸ਼ਨ ਸੈਂਟਰ ਤੋਂ ਲੀਡਰ ਵਜੋਂ ਆਪਣਾ ਪਹਿਲਾ ਭਾਸ਼ਣ ਦਿੰਦਿਆਂ ਪੌਲੀਏਵਰ ਨੇ ਆਖਿਆ ਕਿ ਅੱਜ ਤੋਂ ਉਸ ਪੁਰਾਣੀ ਸਰਕਾਰ ਨੂੰ ਬਦਲਣ ਦਾ ਸਮਾਂ ਆ ਗਿਆ ਹੈ ਜਿਸ ਨੇ ਤੁਹਾਨੂੰ ਦਿੱਤਾ ਘੱਟ ਹੈ ਪਰ ਜਿਹੜੀ ਸਾਰਿਆਂ ਲਈ ਮਹਿੰਗੀ ਪੈ ਰਹੀ ਹੈ। ਇਸ ਪੁਰਾਣੀ ਸਰਕਾਰ ਨੂੰ ਅਸੀਂ ਉਸ ਨਵੀਂ ਸਰਕਾਰ ਨਾਲ ਬਦਲਾਂਗੇ ਜਿਹੜੀ ਤੁਹਾਨੂੰ ਪਹਿਲ ਦੇਵੇਗੀ, ਤੁਹਾਡੇ ਕੰਮ ਦਾ ਮੁੱਲ ਪਹਿਲਾਂ ਮੋੜੇਗੀ, ਤੁਹਾਡੀ ਰਿਟਾਇਰਮੈਂਟ, ਤੁਹਾਡੇ ਘਰ ਤੇ ਦੇਸ਼ ਦਾ ਖਿਆਲ ਰੱਖੇਗੀ।
68·15 ਫੀ ਸਦੀ ਵੋਟਾਂ ਹਾਸਲ ਕਰਕੇ ਪੌਲੀਏਵਰ ਨੇ ਆਪਣੇ ਮੁੱਖ ਵਿਰੋਧੀ ਜੀਨ ਚਾਰੈਸਟ ਨੂੰ ਬੁਰੀ ਤਰ੍ਹਾਂ ਹਰਾਇਆ। ਜੀਨ ਚਾਰੈਸਟ ਨੂੰ ਸਿਰਫ 16·07 ਫੀ ਸਦੀ ਵੋਟਾਂ ਹਾਸਲ ਹੋਈਆਂ ਤੇ ਉਹ ਦੂਜੇ ਸਥਾਨ ਉੱਤੇ ਰਹੇ। ਸੋਸ਼ਲ ਕੰਜ਼ਰਵੇਟਿਵ ਤੇ ਐਮਪੀ ਲੈਸਲਿਨ ਲੁਈਸ 9·69 ਫੀ ਸਦੀ ਵੋਟਾਂ ਨਾਲ ਤੀਸਰੇ ਸਥਾਨ ਉੱਤੇ ਰਹੇ। ਓਨਟਾਰੀਓ ਤੋਂ ਸਾਬਕਾ ਐਮਪੀਪੀ ਰੋਮਨ ਬੇਬਰ ਨੂੰ 5·03 ਫੀ ਸਦੀ ਵੋਟਾਂ ਹਾਸਲ ਹੋਈਆਂ ਤੇ ਮੇਅਰ ਤੋਂ ਐਮਪੀ ਬਣੇ ਸਕੌਟ ਐਚੀਸਨ 1·06 ਫੀ ਸਦੀ ਵੋਟਾਂ ਹਾਸਲ ਕਰਕੇ ਆਖਰੀ ਸਥਾਨ ਉੱਤੇ ਰਹੇ।
ਬ੍ਰਿਟੇਨ ਦੀ ਮਹਾਰਾਣੀ ਐਲਿਜ਼ਾਬੈੱਥ ਦੀ ਮੌਤ ਕਾਰਨ ਇਸ ਸਮੇਂ ਕੈਨੇਡਾ ਵਿੱਚ ਵੀ ਸੋਗ ਦੀ ਲਹਿਰ ਦੌੜ ਗਈ ਹੈ। ਸ਼ਨਿੱਚਰਵਾਰ ਨੂੰ ਮਹਾਰਾਣੀ ਐਲਿਜ਼ਾਬੈੱਥ ਨੂੰ ਸ਼ਰਧਾਂਜਲੀ ਦੇਣ ਲਈ ਕੁੱਝ ਦੇਰ ਲਈ ਮੌਨ ਧਾਰਿਆ ਗਿਆ ਤੇ ਉਸ ਤੋਂ ਬਾਅਦ ਹੀ ਪੌਲੀਏਵਰ ਦੇ ਨਾਂ ਦਾ ਐਲਾਨ ਜੇਤੂ ਉਮੀਦਵਾਰ ਵਜੋਂ ਕੀਤਾ ਗਿਆ।