ਸਸਕੈਚਵਨ, 5 ਼ਸਤੰਬਰ (ਪੋਸਟ ਬਿਊਰੋ) : ਛੁਰੇਬਾਜ਼ੀ ਰਾਹੀਂ 10 ਲੋਕਾਂ ਦਾ ਕਤਲ ਕਰਨ ਤੇ 15 ਹੋਰਨਾਂ ਨੂੰ ਜ਼ਖ਼ਮੀ ਕਰਨ ਵਾਲੇ ਦੋ ਮਸ਼ਕੂਕਾਂ ਵਿੱਚੋਂ ਇੱਕ ਮ੍ਰਿਤਕ ਪਾਇਆ ਗਿਆ ਹੈ। ਇਹ ਜਾਣਕਾਰੀ ਸਸਕੈਚਵਨ ਆਰਸੀਐਮਪੀ ਵੱਲੋਂ ਦਿੱਤੀ ਗਈ।
ਸਸਕੈਚਵਨ ਦੇ ਜੇਮਜ਼ ਸਮਿੱਥ ਕ੍ਰੀ ਨੇਸ਼ਨ ਤੋਂ ਦੋ ਵਿਅਕਤੀਆਂ ਵੱਲੋਂ ਛੁਰੇਬਾਜ਼ੀ ਕਰਕੇ ਕਈ ਲੋਕਾਂ ਦੀਆਂ ਜਾਨਾਂ ਲੈਣ ਦੀਆਂ ਰਿਪੋਰਟਾਂ ਮਿਲਣ ਤੋਂ ਬਾਅਦ 31 ਸਾਲਾਂ ਦੇ ਮਸ਼ਕੂਕ ਡੈਮੀਅਨ ਸੈਂਡਰਸਨ ਤੇ 30 ਸਾਲਾ ਮਾਈਲਜ਼ ਸੈਂਡਰਸਨ ਦੀ ਭਾਲ ਐਤਵਾਰ ਸਵੇਰੇ ਸ਼ੁਰੂ ਕੀਤੀ ਗਈ।ਸੋਮਵਾਰ ਦੁਪਹਿਰ ਨੂੰ ਦਿੱਤੀ ਗਈ ਅਪਡੇਟ ਵਿੱਚ ਆਰਸੀਐਮਪੀ ਅਸਿਸਟੈਂਟ ਕਮਿਸ਼ਨਰ ਰੌਂਡਾ ਬਲੈਕਮੋਰ ਨੇ ਆਖਿਆ ਕਿ ਫੋਰੈਂਸਿਕ ਮਾਹਿਰਾਂ ਵੱਲੋਂ ਫਰਸਟ ਨੇਸ਼ਨ ਤੋਂ ਮਿਲੀ ਲਾਸ਼ ਦੀ ਪਛਾਣ ਡੈਮੀਅਨ ਸੈਂਡਰਸਨ ਵਜੋਂ ਕੀਤੀ ਗਈ ਹੈ।
ਬਲੈਕਮੋਰ ਨੇ ਆਖਿਆ ਕਿ ਡੈਮੀਅਨ ਦੀ ਲਾਸ਼ ਸੰਘਣੇ ਘਾਹ ਵਾਲੇ ਇਲਾਕੇ ਤੋਂ ਮਿਲੀ। ਉਨ੍ਹਾਂ ਦੱਸਿਆ ਕਿ ਉਸ ਦੇ ਸ਼ਰੀਰ ਉੱਤੇ ਸੱਟਾਂ ਦੇ ਨਿਸ਼ਾਨ ਸਨ ਜੋ ਕਿ ਉਸ ਨੇ ਖੁਦ ਨਹੀਂ ਮਾਰੀਆਂ ਹੋ ਸਕਦੀਆਂ।ਉਨ੍ਹਾਂ ਆਖਿਆ ਕਿ ਪੁਲਿਸ ਦਾ ਮੰਨਣਾ ਹੈ ਕਿ ਮਾਈਲਜ਼ ਇਸ ਸਮੇਂ ਜ਼ਖ਼ਮੀ ਹੋ ਸਕਦਾ ਹੈ। ਉਨ੍ਹਾਂ ਅੱਗੇ ਆਖਿਆ ਕਿ ਇਸ ਨਾਲ ਇਸ ਘਟਨਾ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ 11 ਤੇ ਜ਼ਖ਼ਮੀਆਂ ਦੀ ਗਿਣਤੀ 19 ਤੱਕ ਪਹੁੰਚ ਗਈ ਹੈ।ਉਨ੍ਹਾਂ ਆਖਿਆ ਕਿ ਅਸੀਂ ਚਾਹੁੰਦੇ ਹਾਂ ਕਿ ਜਨਤਾ ਇਹ ਸੱਭ ਜਾਣੇ ਕਿਉਂਕਿ ਜ਼ਖ਼ਮੀ ਹੋਏ ਮਾਈਲਜ਼ ਨੂੰ ਮੈਡੀਕਲ ਮਦਦ ਚਾਹੀਦੀ ਹੋ ਸਕਦੀ ਹੈ।ਪਰ ਅਸੀਂ ਇਹ ਵੀ ਨਹੀਂ ਆਖ ਰਹੇ ਕਿ ਜਨਤਾ ਚੌਕਸ ਨਾ ਰਹੇ ਕਿਉਂਕਿ ਜ਼ਖ਼ਮੀ ਹਾਲਤ ਵਿੱਚ ਵੀ ਉਹ ਸ਼ਖਸ ਖਤਰਨਾਕ ਹੋ ਸਕਦਾ ਹੈ।ਬਲੈਕਮੋਰ ਨੇ ਆਖਿਆ ਕਿ ਆਰਸੀਐਮਪੀ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਇਹ ਦੋਵੇਂ ਮਸ਼ਕੂਕ ਭਰਾ ਹਨ।
ਡੈਮੀਅਨ ਦੀ ਮੌਤ ਦੀ ਪੁਸ਼ਟੀ ਹੋਣ ਤੋਂ ਪਹਿਲਾਂ ਆਰਸੀਐਮਪੀ ਨੇ ਦੋਵਾਂ ਵਿਅਕਤੀਆਂ ਨੂੰ ਚਾਰਜ ਕੀਤਾ। ਮਾਈਲਜ਼ ਨੂੰ ਫਰਸਟ ਡਿਗਰੀ ਮਰਡਰ ਦੇ ਤਿੰਨ ਮਾਮਲਿਆਂ, ਕਤਲ ਦੀ ਕੋਸਿ਼ਸ਼ ਕਰਨ ਦੇ ਇੱਕ ਮਾਮਲੇ ਤੇ ਘਰ ਵਿੱਚ ਚੋਰੀ ਦਾਖਲ ਹੋਣ ਦੇ ਇੱਕ ਮਾਮਲੇ ਲਈ ਚਾਰਜ ਕੀਤਾ ਗਿਆ। ਡੈਮੀਅਨ ਨੂੰ ਫਰਸਟ ਡਿਗਰੀ ਮਰਡਰ ਦੇ ਇੱਕ ਮਾਮਲੇ, ਕਤਲ ਦੀ ਕੋਸਿ਼ਸ਼ ਦੇ ਇੱਕ ਮਾਮਲੇ ਤੇ ਘਰ ਵਿੱਚ ਚੋਰੀ ਦਾਖਲ ਹੋਣ ਦੇ ਇੱਕ ਮਾਮਲੇ ਲਈ ਚਾਰਜ ਕੀਤਾ ਗਿਆ। ਆਰਸੀਐਮਪੀ ਨੇ ਆਖਿਆ ਕਿ ਇਸ ਗੁੰਝਲਦਾਰ ਜਾਂਚ ਦੇ ਚੱਲਦਿਆਂ ਕਈ ਹੋਰ ਚਾਰਜਿਜ਼ ਸਾਹਮਣੇ ਆ ਸਕਦੇ ਹਨ।