-ਡਾਕਟਰ ਅਤੁਲ ਚਤੁਰਵੇਦੀ
ਧੰਨ ਹਨ ਉਹ ਫਿਲਮ ਸਟਾਰ, ਜੋ ਭੂਮਿਕਾ ਅਨੁਸਾਰ ਚੁਟਕੀਆਂ ਵਿੱਚ 10-12 ਕਿਲੋ ਭਾਰ ਘਟਾ-ਵਧਾ ਲੈਂਦੇ ਹਨ। ਮੈਂ ਉਨ੍ਹਾਂ ਦੇ ਕਰਤੱਬ ਤੋਂ ਹੈਰਾਨ ਹਾਂ। ਮੈਂ ਤਾਂ ਨਿੰਬੂ-ਪਾਣੀ ਤੋਂ ਲੈ ਕੇ ਪੈਦਲ ਟਹਿਲਣ ਤੇ ਸੇਬ ਦੇ ਸਿਰਕੇ ਤੋਂ ਲੈ ਕੇ ਮਿੱਠੇ ਦੇ ਤਿਆਗ ਤੱਕ ਸਾਰੇ ਉਪਾਅ ਕਰ ਚੁੱਕਾ ਹਾਂ, ਪਰ ਕੰਡੇ ਦੀ ਸੂਈ ਅੰਗਦ ਦੇ ਪੈਰ ਵਾਂਗ ਨੱਬੇ ਉੱਤੇ ਅਟਕੀ ਹੈ। ਭਾਰ ਦੀ ਸਮੱਸਿਆ ਕਾਰਨ ਕਦੋਂ ਤੁਸੀਂ ਭਾਈ ਸਾਹਿਬ ਤੋਂ ਅੰਕਲ ਜੀ ਅਤੇ ਅੰਕਲ ਜੀ ਤੋਂ ਬਾਬੂ ਜੀ ਵਿੱਚ ਤਬਦੀਲ ਹੋ ਜਾਂਦੇ ਹੋ, ਪਤਾ ਹੀ ਨਹੀਂ ਲੱਗਦਾ। ਉਂਜ ਵਧਦਾ ਹੋਇਆ ਭਾਰ ਜਿੱਥੇ ਰਾਜਨੀਤੀ ਤੇ ਨੌਕਰੀ ਦੇ ਖੇਤਰ ਵਿੱਚ ਵਧਦੇ ਪ੍ਰਭਾਵ ਦਾ ਸੂਚਕ ਹੈ, ਉਥੇ ਜੀਵਨ ਦੇ ਦੂਸਰੇ ਖੇਤਰਾਂ ਵਿੱਚ ਇਸ ਦੇ ਨੁਕਸਾਨ ਵੱਧ ਤੇ ਫਾਇਦੇ ਘੱਟ ਹਨ। ਬਲੱਡ ਪ੍ਰੈਸ਼ਰ, ਸ਼ੂਗਰ ਤੇ ਥਾਈਰਾਈਡ ਵਰਗੀਆਂ ਬਿਮਾਰੀਆਂ ਤੁਹਾਡੀ ਦੇਹ ਦੇ ਦੁਆਰ ਖੜਕਾਉਣ ਲੱਗਦੀਆਂ ਹਨ। ਟੈਕਸੀ ਅਤੇ ਆਟੋ ਵਾਲੇ ਤੁਹਾਨੂੰ ਦੇਖ ਕੇ ਕੰਨੀ ਕੱਟਣ ਲੱਗਦੇ ਹਨ। ਟੇਲਰ ਜ਼ਿਆਦਾ ਕੱਪੜੇ ਦੀ ਮੰਗ ਕਰਨ ਲੱਗਦਾ ਹੈ।
ਫਿਰ ਤੁਸੀਂ ਸਾਰੀਆਂ ਸਲਾਹਾਂ ਅਤੇ ਉਪਾਵਾਂ ਉੱਤੇ ਅਮਲ ਕਰਦੇ ਹੋ। ਫਿਟਨੈਸ ਦੇ ਐਪ ਅਜਮਾਉਂਦੇ ਹੋ। ਥਾਲੀ ਵਿੱਚ ਰੱਖੀਆਂ ਦੋ ਰੋਟੀਆਂ ਤੁਹਾਨੂੰ ਦੁਸ਼ਮਣ ਦੀ ਬੰਦੂਕ ਵਾਂਗ ਘੂਰਨ ਲੱਗਦੀਆਂ ਹਨ, ਪਰ ਸਾਹਿਤ ਦੀ ਦੁਨੀਆ ਨੂੰ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ। ਉਥੇ ਕਈ ਸੁਪਰ ਹੈਵੀਵੇਟ ਸੰਗ੍ਰਹਿ ਲਾਇਬਰੇਰੀਆਂ ਵਿੱਚ ਧੂੜ ਫੱਕਦੇ ਹਨ, ਪਰ ਤਿੰਨ ਕਹਾਣੀਆਂ ਦੇ ਦਮ ਉੱਤੇ ਗੁਲੇਰੀ ਜੀ ਅਮਰ ਕਥਾਕਾਰ ਬਣੇ ਹੋਏ ਹਨ। ਮੈਂ ਟੀ ਵੀ ਸਕਰੀਨ ਉੱਤੇ ਕਾਮੇਡੀ ਕਲਾਕਾਰਾਂ ਨੂੰ ਦੇਖਦਾ ਅਤੇ ਮੇਰਾ ਆਤਮਵਿਸ਼ਵਾਸ ਵਾਪਸ ਆ ਜਾਂਦਾ ਹੈ। ਜੀਭ ਮਜ਼ਬੂਤ ਤੇ ਸਵਾਦ ਇੰਦਰੀਆਂ ਸਰਗਰਮ ਹੋ ਉਠਦੀਆਂ ਹਨ। ਹੱਥ ਰਬੜੀ ਦੀ ਕੌਲੀ ਵੱਲ ਵਧਦਾ ਹੈ, ਪਰ ਇਹ ਕੀ, ਅਚਾਨਕ ਸੇਬ ਦੀ ਪਤਲੀ ਫਾਂਕ ਵੱਲ ਮੁੜ ਜਾਂਦਾ ਹੈ। ਇਹੀ ਹੈ ਜ਼ਿੰਦਗੀ ਦੀ ਟ੍ਰੈਜ਼ਡੀ। ਇਹੀ ਹੈ ਆਦਰਸ਼ ਅਤੇ ਯਥਾਰਥ ਦਾ ਫਾਸਲਾ। ਜੀਵਨ ਬਹੁਤ ਜ਼ਾਲਮ ਹੈ ਮਿੱਤਰੋ।
ਤੁਸੀਂ ਡਾਈਟਿੰਗ ਪ੍ਰੋਗਰਾਮ ਬਣਾਉਂਦੇ ਹੋ ਤੇ ਉਸੇ ਦਿਨ ਘਰ ਮਹਿਮਾਨ ਆ ਜਾਂਦੇ ਹਨ। ਪਕਵਾਨਾਂ ਦੇ ਵਿੱਚ ਤੁਸੀਂ ਮਨ ਮਾਰ ਕੇ ਚੁੱਪਚਾਪ ਬੈਠੇ ਹੋ। ਹਜ਼ਾਰ ਮੁਸ਼ਕਲਾਂ ਹਨ ਫਿਟਨੈਸ ਦੀ ਰਾਹ ਵਿੱਚ। ਯੂ-ਟਿਊਬ ਚੈਨਲ ਉੱਤੇ ਫਿਟਨੈਸ ਟ੍ਰੇਨਰ ਤੁਹਾਨੂੰ ਟਿਪਸ ਦੇ ਰਹੀਆਂ ਹਨ। ਰੋਜ਼ਾਨਾ ਸਮੇਂ ਦੇ ਪ੍ਰਵਾਹ ਵਿੱਚ ਸੰਕਲਪ ਲੈਂਦੇ ਹੋ। ਮੈਂ ਸੋਚਦਾ ਹਾਂ ਕਿ ਕਿਤਾਬ ਲਿਖਾਂ ‘ਸੰਕਲਪ ਅਤੇ ਰੁਕਾਵਟਾਂ’, ਪਰ ਮਿੱਤਰ ਦੀ ਕਿਤਾਬ ਛਪੀ ਹੈ ‘ਸੰਕਲਪ ਤੋਂ ਸਿੱਧੀ ਤੱਕ’। ਇਸ ਕਰ ਕੇ ਠਿਠਕ ਜਾਂਦਾ ਹਾਂ। ਸੰਕਲਪ ਦੋਵਾਂ ਪਾਸੇ ਹਨ, ਪਰ ਰੁਕਾਵਟਾਂ ਦਾ ਜੋ ਸਫਰ ਹੈ, ਇਹੀ ਅੱਗ ਦਾ ਦਰਿਆ ਹੈ।