ਨਵੀਂ ਦਿੱਲੀ, 18 ਅਗਸਤ (ਪੋਸਟ ਬਿਊਰੋ)- ਬਿਹਾਰ ਵਿੱਚ ਨਵੀਂ ਕੈਬਨਿਟ ਵਿੱਚ ਸ਼ਾਮਲ 72 ਫ਼ੀਸਦੀ ਮੰਤਰੀਆਂ ਨੇ ਆਪਣੇ ਖ਼ਿਲਾਫ਼ ਅਪਰਾਧਕ ਕੇਸ ਮੰਨੇ ਹਨ। ਇਹ ਜਾਣਕਾਰੀ ਗ਼ੈਰ-ਸਰਕਾਰੀ ਸੰਗਠਨ ‘ਐਸੋਸੀਏਸ਼ਨ ਫਾਰ ਡੈਮੋਕ੍ਰੇਟਿਕ ਰਿਫਾਰਮਜ਼' (ਏ ਡੀ ਆਰ) ਨੇ ਦਿੱਤੀ ਹੈ। ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਅਤੇ ਉਪ ਮੁੱਖ ਮੰਤਰੀ ਤੇਜਸਵੀ ਯਾਦਵ ਵਿਰੁੱਧ ਵੀ ਕੇਸ ਦਰਜ ਹਨ। ਭਾਰਤੀ ਜਨਤਾ ਪਾਰਟੀ ਛੱਡ ਕੇ ਰਾਸ਼ਟਰੀ ਜਨਤਾ ਦਲ ਨਾਲ ਸਰਕਾਰ ਬਣਾਉਣ ਵਾਲੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਕੱਲ੍ਹ 31 ਮੰਤਰੀਆਂ ਨੂੰ ਸ਼ਾਮਲ ਕਰ ਕੇ ਮੰਤਰੀ ਮੰਡਲ ਦਾ ਵਿਸਥਾਰ ਕੀਤਾ ਹੈ।
ਨਿਤੀਸ਼ ਕੁਮਾਰ ਮੰਤਰੀ ਮੰਡਲ ਦੇ ਵਾਧੇ ਤੋਂ ਬਾਅਦ ਏ ਡੀ ਆਰ ਅਤੇ ‘ਬਿਹਾਰ ਇਸੈਸ਼ਨ ਵਾਚ' ਨੇ 2020 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਮੁੱਖ ਮੰਤਰੀ ਸਮੇਤ 33 ਵਿੱਚੋਂ 32 ਮੰਤਰੀਆਂ ਵੱਲੋਂ ਦਾਇਰ ਕੀਤੇ ਐਫੀਡੇਵਿਟ ਵੇਖੇ ਅਤੇ ਇਸ ਦੇ ਬਾਅਦ ਏ ਡੀ ਆਰ ਦੀ ਰਿਪੋਰਟ ਅਨੁਸਾਰ ਜਨਤਾ ਦਲ (ਯੂਨਾਈਟਿਡ) ਦੇ ਆਗੂ ਅਤੇ ਕੈਬਨਿਟ ਮੰਤਰੀ ਅਸ਼ੋਕ ਚੌਧਰੀ ਨੂੰ ਐਫੀਡੇਵਿਟ ਪੇਸ਼ ਕਰਨ ਦੀ ਲੋੜ ਨਹੀਂ, ਕਿਉਂਕਿ ਉਹ ਵਿਧਾਨ ਪ੍ਰੀਸ਼ਦ ਦਾ ਨਾਮਜ਼ਦ ਮੈਂਬਰ ਹੈ, ਇਸ ਲਈ ਉਨ੍ਹਾਂ ਦੇ ਅਪਰਾਧਕ, ਵਿੱਤੀ ਅਤੇ ਹੋਰ ਜਾਣਕਾਰੀ ਜਨਤਕ ਨਹੀਂ ਹੈ।ਰਿਪੋਰਟ ਮੁਤਾਬਕ 23 ਮੰਤਰੀਆਂ (72 ਫ਼ੀਸਦੀ) ਨੇ ਆਪਣੇ ਖ਼ਿਲਾਫ਼ ਅਪਰਾਧਕ ਕੇਸ ਮੰਨੇ ਹਨ ਅਤੇ 17 ਮੰਤਰੀਆਂ (53 ਫ਼ੀਸਦੀ) ਨੇ ਆਪਣੇ ਖ਼ਿਲਾਫ਼ ਗੰਭੀਰ ਅਪਰਾਧਕ ਕੇਸ ਮੰਨੇ ਹਨ। ਇਸ ਦੇ ਨਾਲ ਹੀ 32 ਮੰਤਰੀਆਂ ਵਿੱਚੋਂ 27 (84) ਕਰੋੜਪਤੀ ਹਨ, ਜਿਨ੍ਹਾਂ ਵਿੱਚੋਂ ਸਭ ਤੋਂ ਵੱਧ ਜਾਇਦਾਦ ਵਾਲੇ ਮੰਤਰੀ ਸਮੀਰ ਕੁਮਾਰ ਮਹਾਸੇਠ ਹਨ, ਜੋ ਮਧੂਬਨੀ ਸੀਟ ਤੋਂ ਜਿੱਤੇ ਹਨ। ਸਮੀਰ ਦੀ ਜਾਇਦਾਦ 24.45 ਕਰੋੜ ਰੁਪਏ ਹੈ। ਸਭ ਤੋਂ ਘੱਟ ਜਾਇਦਾਦ ਵਾਲੇ ਮੰਤਰੀ ਮੁਰਾਰੀ ਪ੍ਰਸਾਦ ਗੌਤਮ ਦੀ ਜਾਇਦਾਦ 17.66 ਲੱਖ ਰੁਪਏ ਹੈ। ਏ ਡੀ ਆਰ ਅਨੁਸਾਰ, ਅੱਠ ਮੰਤਰੀਆਂ (25 ਪ੍ਰਤੀਸ਼ਤ) ਨੇ ਵਿੱਦਿਅਕ ਯੋਗਤਾ 8ਵੀਂ ਅਤੇ 12ਵੀਂ ਜਮਾਤ ਦੇ ਵਿਚਕਾਰ ਦੱਸੀਅਤੇ 24 ਮੰਤਰੀਆਂ (75 ਪ੍ਰਤੀਸ਼ਤ) ਦੀ ਵਿਦਿਅਕ ਯੋਗਤਾ ਗ੍ਰੈਜੂਏਸ਼ਨ ਜਾਂ ਇਸ ਤੋਂ ਉਪਰ ਹੈ।