ਲਾਗੋਸ, 18 ਅਗਸਤ (ਪੋਸਟ ਬਿਊਰੋ)- ਸ਼ਾਦੀ ਨੂੰ ਦੁਨੀਆ ਦੇ ਹਰ ਸਮਾਜ ਵਿੱਚ ਬੇਹੱਦ ਖਾਸ ਸੰਸਕਾਰ ਮੰਨਿਆ ਜਾਂਦਾ ਹੈ। ਪੁਰਸ਼ ਤੇ ਇਸਤਰੀ ਦੇ ਵਿੱਚ ਪਰਵਾਰ ਨੂੰ ਅੱਗੇ ਵਧਾਉਣ ਦੇ ਉਦੇਸ਼ ਨਾਲ ਕੀਤੇ ਗਏ ਇਸ ਬੰਧਨ ਨੂੰ ਅਲੱਗ-ਅਲੱਗ ਦੇਸ਼ਾਂ ਵਿੱਚ ਅਲੱਗ-ਅਲੱਗ ਰੂਪ ਦਿੱਤੇ ਗਏ ਹਨ। ਸਮੇਂ ਨਾਲ ਸ਼ਾਦੀਆਂ ਵਿੱਚ ਵੀ ਬਦਲਾਅ ਹੋਏ ਹਨ ਪਰ ਕਈ ਆਦਿਵਾਸੀ ਕਬੀਲੇਅੱਜ ਵੀ ਪੁਰਾਣੇ ਸਮੇਂ ਦੀਆਂ ਆਪਣੀਆਂ ਪਰੰਪਰਾਵਾਂ ਤੇ ਮਾਨਤਾਵਾਂ ਦਾ ਪਾਲਣ ਕਰਦੇ ਹਨ।
ਅਫਰੀਕਾ ਦੇ ਸਾਹੇਲ ਖੇਤਰ ਵਿੱਚ ਰਹਿੰਦਾ ਵਣਜਾਰਾ ਆਦਿਵਾਸੀ ਕਬੀਲਾ ਵੋਦਾਬੀ ਦੁਨੀਆਵਿੱਚ ਆਪਣੀ ਤਰ੍ਹਾਂ ਦੀ ਪਰੰਪਰਾ ਲਈ ਪ੍ਰਸਿੱਧ ਹੈ। ਇਸ ਕਬੀਲੇ ਵਿੱਚ ਔਰਤਾਂ ਨੂੰ ਕਾਫ਼ੀ ਛੋਟ ਹੈ। ਇਥੇ ਸ਼ਾਦੀ ਅਤੇ ਸੰਬੰਧਾਂ ਬਾਰੇ ਕਾਫ਼ੀ ਅਲੱਗ ਮਾਨਤਾ ਹੈ। ਇਸ ਕਬੀਲੇ ਦੀ ਸਭ ਤੋਂ ਖਾਸ ਪ੍ਰਥਾ ਹੈ ਦੂਸਰੇ ਮਰਦਾਂ ਦੀ ਪਤਨੀ ਚੁਰਾਉਣਾ। ਇਹ ਖਾਸ ਤਿਉਹਾਰ ਮੰਨਿਆ ਜਾਂਦਾ ਹੈ ਜਿਸ ਨੂੰ ਇਥੇ ‘ਦੀ’ ਕਹਿੰਦੇ ਹਨ ਜੋ 10 ਦਿਨ ਚੱਲਦਾ ਹੈ। ਇਸ ਨੂੰ ‘ਵਾਈਫ ਸਟੀਲਿੰਗ ਫੈਸਟੀਵਲ ਵੀ ਕਿਹਾ ਜਾਂਦਾ ਹੈ। ਤਿਉਹਾਰ ਦੇ ਦਿਨ ਮਰਦ ਘੰਟਿਆਂ ਬੱਧੀ ਤਿਆਰ ਹੁੰਦੇ ਅਤੇ ਅਜਬ-ਗਜ਼ਬ ਪੌਸ਼ਾਕਾਂ ਪਾਉਂਦੇ ਹਨ। ਉਹ ਆਪਣੇ ਚਿਹਰੇ ਉੱਤੇ ਕੁਦਰਤੀ ਚੀਜ਼ਾਂ ਦਾ ਇਸਤੇਮਾਲ ਕਰ ਕੇ ਮੇਕਅਪ ਕਰਦੇ ਤੇ ਬੁੱਲ੍ਹਾਂ ਉੱਤੇ ਪੇਂਟ ਲਾਉਂਦੇ ਹਨ ਜਿਸ ਨਾਲ ਉਨ੍ਹਾਂ ਦੇ ਸਫੈਦ ਦੰਦ ਹੋਰ ਜ਼ਿਆਦਾ ਚਮਕਦੇ ਹਨ। ਪੁਰਸ਼ਾਂ ਵੱਲੋਂ ਇਹ ਸਜਾਵਟ ਮਹਿਲਾਵਾਂ ਨੂੰ ਆਕਰਸ਼ਤ ਕਰਨ ਦੇ ਲਈ ਕੀਤੀ ਜਾਂਦੀ ਹੈ। ਇਸ ਦੇ ਬਾਅਦ ਉਹ ਮਹਿਲਾਵਾਂ ਦੇ ਸਾਹਮਣੇ ਅਨੋਖੀ ਤਰ੍ਹਾਂ ਨਾਲ ਨੱਚਦੇ ਹਨ।