ਓਟਵਾ, 18 ਅਗਸਤ (ਪੋਸਟ ਬਿਊਰੋ) : ਜ਼ੈਲਰਜ਼ ਬ੍ਰੈਂਡ ਦੀ ਮਾਲਕ ਹਡਸਨ ਬੇਅ ਕੰਪਨੀ ਨੇ ਬੁੱਧਵਾਰ ਨੂੰ ਐਲਾਨ ਕੀਤਾ ਹੈ ਕਿ ਉਹ ਕੁੱਝ ਮੌਜੂਦਾ ਐਚਬੀਸੀ ਸਟੋਰਜ਼ ਨਾਲ ਇਸ ਡਿਪਾਰਟਮੈਂਟ ਸਟੋਰ ਨੂੰ ਮੁੜ ਖੋਲ੍ਹਣ ਜਾ ਰਹੀ ਹੈ। ਇਸ ਦੇ ਨਾਲ ਹੀ ਅਗਲੇ ਸਾਲ ਇਸ ਨੂੰ ਆਨਲਾਈਨ ਵੀ ਸ਼ੁਰੂ ਕੀਤਾ ਜਾਵੇਗਾ।
ਇਸ ਐਲਾਨ ਤ਼ੋਂ ਬਾਅਦ ਜ਼ੈਲਰਜ਼ ਦੇ ਪੁਰਾਣੇ ਕਸਟਮਰਜ਼ ਵਿੱਚ ਨਵਾਂ ਜੋਸ਼ ਭਰ ਗਿਆ ਹੈ। ਕਈ ਕੈਨੇਡੀਅਨਜ਼ ਨੇ ਦੱਸਿਆ ਕਿ ਜੈਲਰਜ਼ ਨਾਲ ਉਨ੍ਹਾਂ ਦੀਆਂ ਕਿੰਨੀਆਂ ਚੰਗੀਆਂ ਯਾਦਾ ਜੁੜੀਆਂ ਹੋਈਆਂ ਹਨ। ਜ਼ੈਲਰਜ਼ ਵੱਲੋਂ ਕਈ ਲੋਕਾਂ ਦੀ ਪਰਵਰਿਸ਼ ਨਾਲ ਜੁੜੀਆਂ ਯਾਦਾਂ ਵਿੱਚ ਚੰਗੀ ਭੂਮਿਕਾ ਨਿਭਾਈ ਗਈ ਹੈ। ਕਈਆਂ ਨੂੰ ਜ਼ੈਲਰਜ਼ ਦਾ ਸ਼ਾਪਿੰਗ ਸਬੰਧੀ ਤਜਰਬਾ ਯਾਦਗਾਰੀ ਲੱਗਦਾ ਹੈ ਤੇ ਕਈਆਂ ਨੂੰ ਸਟੋਰ ਦੇ ਅੰਦਰ ਮੌਜੂਦ ਰੈਸਟੋਰੈਂਟ ਵਿੱਚ ਖਾਣਾ ਖਾਣਾ ਬਹੁਤ ਪਸੰਦ ਸੀ।
ਇਸ ਡਿਪਾਰਟਮੈਂਟ ਸਟੋਰ ਵਿੱਚ ਕਈ ਕੈਨੇਡੀਅਨ ਡਿਜ਼ਾਈਨਰ ਕੱਪੜੇ ਵੀ ਸਨ ਜਿਵੇਂ ਕਿ ਐਲਫਰੈਡ ਸੰਗ ਆਦਿ।ਇਸ ਸਟੋਰ ਵਿੱਚ ਕੰਮ ਕਰਨ ਵਾਲਿਆਂ ਦਾ ਵੀ ਕਹਿਣਾ ਹੈ ਕਿ ਇੱਥੇ ਕੰਮ ਕਰਨਾ ਉਨ੍ਹਾਂ ਦੀ ਜਿ਼ੰਦਗੀ ਦੇ ਚੰਗੇ ਤਜ਼ਰਬਿਆਂ ਨਾਲ ਜੁੜਿਆ ਹੋਇਆ ਹੈ। 2013 ਵਿੱਚ ਕੈਨੇਡਾ ਭਰ ਵਿੱਚ ਜ਼ੈਲਰਜ਼ ਦੇ ਬਹੁਤੇ ਸਟੋਰ ਬੰਦ ਕਰ ਦਿੱਤੇ ਗਏ ਤੇ ਸਿਰਫ ਕੁੱਝ ਲੋਕੇਸ਼ਨਾਂ ਨੂੰ ਹੀ 2020 ਤੱਕ ਖੁੱਲ੍ਹਾ ਰੱਖਿਆ ਗਿਆ।