ਨਵੀਂ ਦਿੱਲੀ, 17 ਜੁਲਾਈ (ਪੋਸਟ ਬਿਊਰੋ)- ਭਾਰਤ ਦੀ ਸੁਪਰੀਮ ਕੋਰਟ ਨੇ ਕਿਹਾ ਹੈ ਕਿ ਮੁਸਲਮਾਨਾਂ ਵਿੱਚ ‘ਤਲਾਕ-ਏ-ਹਸਨ' ਨਾਲ ਤਲਾਕ ਦੇਣ ਦੀ ਪ੍ਰਥਾ ਤਿੰਨ ਤਲਾਕ ਵਰਗੀ ਨਹੀਂ ਤੇ ਔਰਤਾਂ ਕੋਲ ‘ਖੁਲ੍ਹਾਂ' ਦਾ ਬਦਲ ਹੈ। ਤਿੰਨ ਤਲਾਕ ਵਾਂਗ ‘ਤਲਾਕ-ਏ-ਹਸਨ' ਵੀ ਤਲਾਕ ਦੇਣ ਦਾ ਇੱਕ ਤਰੀਕਾ ਹੈ, ਪਰ ਇਸ ਵਿੱਚ ਤਿੰਨ ਮਹੀਨੇ ਵਿੱਚ ਤਿੰਨ ਵਾਰ ਇੱਕ ਮਿਥੇ ਸਮੇਂ ਤੋਂ ਬਾਅਦ ਤਲਾਕ ਕਹਿ ਕੇ ਰਿਸ਼ਤਾ ਖ਼ਤਮ ਕਰ ਦਿੱਤਾ ਜਾਂਦਾ ਹੈ। ਇਸਲਾਮ ਵਿੱਚ ਮਰਦ ‘ਤਲਾਕ' ਲੈ ਸਕਦਾ ਹੈ, ਜਦਕਿ ਔਰਤ ‘ਖੁਲ੍ਹਾਂ' ਰਾਹੀਂ ਆਪਣੇ ਪਤੀ ਤੋਂ ਵੱਖ ਹੋ ਸਕਦੀ ਹੈ।
ਜਸਟਿਸ ਐਸ ਕੇ ਕੌਲ ਅਤੇ ਜਸਟਿਸ ਐਮ ਐਮ ਸੁੰਦਰੇਸ ਦੀ ਬੈਂਚ ਨੇ ਕਿਹਾ ਕਿ ਜੇਕਰ ਪਤੀ-ਪਤਨੀ ਇਕੱਠੇ ਨਹੀਂ ਰਹਿ ਸਕਦੇ ਤਾਂ ਰਿਸ਼ਤਾ ਤੋੜਨ ਦੇ ਇਰਾਦੇ ਵਿੱਚ ਕੋਈ ਬਦਲਾਅ ਨਾ ਹੋਣ ਉੱਤੇ ਸੰਵਿਧਾਨ ਦੀ ਧਾਰਾ 142 ਤਹਿਤ ਤਲਾਕ ਦਿੱਤਾ ਜਾ ਸਕਦਾ ਹੈ। ਬੈਂਚ ‘ਤਲਾਕ-ਏ-ਹਸਨ' ਅਤੇ ‘‘ਇੱਕ ਪਾਸੜ ਗ਼ੈਰ ਨਿਆਂ ਤਲਾਕ ਦੇ ਹੋਰ ਸਾਰੇ ਰੂਪਾਂ ਨੂੰ ਗ਼ੈਰ-ਕਾਨੂੰਨੀ ਅਤੇ ਗ਼ੈਰ-ਸੰਵਿਧਾਨਕ'' ਐਲਾਨ ਕਰਨ ਦੀ ਮੰਗ ਦੀ ਪਟੀਸ਼ਨ ਉੱਤੇ ਸੁਣਵਾਈ ਕਰ ਰਿਹਾ ਸੀ। ਪਟੀਸ਼ਨ ਵਿੱਚ ਕਿਹਾ ਗਿਆ ਹੈ ਕਿ ਤਲਾਕ ਦੇ ਇਹ ਤਰੀਕੇ ‘ਮਨਮਾਨੇ, ਅਸੰਗਤ ਤੇ ਬੁਨਿਆਦੀ ਅਧਿਕਾਰਾਂ ਦੀ ਉਲੰਘਣਾ ਕਰਦੇ ਹਨ।’ ਬੈਂਚ ਨੇ ਕਿਹਾ ਕਿ ਇਹ ਉਸ ਤਰ੍ਹਾਂ ਦਾ ਤਿੰਨ ਤਲਾਕ ਨਹੀਂ। ਵਿਆਹ ਇੱਕ ਤਰ੍ਹਾਂ ਦਾ ਕਰਾਰ ਹੋਣ ਕਾਰਨ ਤੁਹਾਡੇ ਕੋਲ ਖੁੱਲ੍ਹਾਂ ਦਾ ਬਦਲ ਹੈ। ਜੇ ਦੋ ਵਿਅਕਤੀ ਇਕੱਠੇ ਨਹੀਂ ਰਹਿ ਸਕਦੇ, ਤਾਂ ਵਿਆਹ ਨੂੰ ਤੋੜਨ ਦਾ ਇਰਾਦਾ ਨਾ ਬਦਲਣ ਦੇ ਆਧਾਰ ਉੱਤੇ ਤਲਾਕ ਦੀ ਇਜਾਜ਼ਤ ਅਸੀਂ ਵੀ ਦਿੰਦੇ ਹਾਂ। ਜੇ ‘ਮੇਹਰ' (ਲਾੜੇ ਵੱਲੋਂ ਨਗਦ ਜਾਂ ਹੋਰ ਰੂਪ ਵਿੱਚ ਦਿੱਤਾ ਤੋਹਫਾ) ਦਿੱਤਾ ਜਾਂਦਾ ਹੈ ਤਾਂ ਕੀ ਤੁਸੀਂ ਆਪਸੀ ਸਹਿਮਤੀ ਨਾਲ ਤਲਾਕ ਲਈ ਤਿਆਰ ਹੋ?''