ਬਿਲਾਸਪੁਰ, 17 ਅਗਸਤ (ਪੋਸਟ ਬਿਊਰੋ)- ਲਗਾਤਾਰ ਨਵੀਨਤਾ ਹਾਸਲ ਕਰ ਰਹੀ ਭਾਰਤੀ ਰੇਲਵੇ ਨੇ ਆਜ਼ਾਦੀ ਦਿਨ ਮੌਕੇ ਇੱਕ ਹੋਰ ਇਤਿਹਾਸਕ ਪ੍ਰਾਪਤੀ ਕੀਤੀ ਹੈ। ਦੱਖਣ-ਪੂਰਬੀ ਮੱਧ ਰੇਲਵੇ ਜ਼ੋਨ ਬਿਲਾਸਪੁਰ ਤੋਂ 15 ਅਗਸਤ ਨੂੰ 3.5 ਕਿਲੋਮੀਟਰ ਲੰਬੀ ਅਜਿਹੀ ਰੇਲ ਗੱਡੀ ਚਲਾਈ ਹੈ, ਜਿਸ ਵਿੱਚ ਛੇ ਇੰਜਣ ਅਤੇ 295 ਵੈਗਨ ਸਨ।
ਇਸ ਮਾਲ ਗੱਡੀ ਵਿੱਚ 27000 ਟਨ ਤੋਂ ਵਧੇਰੇ ਕੋਲਾ ਲੱਦਿਆ ਸੀ, ਜੋ ਛੱਤੀਸਗੜ੍ਹ ਵਿਚਲੇ ਕੋਰਬਾ ਤੋਂ 260 ਕਿਲੋਮੀਟਰ ਦੂਰ ਰਾਜਨਾਂਦਗਾਂਵ ਦੇ ਪਰਮਕਲਾ ਤਕ 11 ਘੰਟੇ 20 ਮਿੰਟ ਵਿੱਚ ਪਹੁੰਚ ਗਿਆ। ਇਸ ਤੋਂ ਰੇਲਵੇ ਨੂੰ ਮਾਲ ਭਾੜੇ ਦੇ ਰੂਪ ਵਿੱਚ 2.54 ਕਰੋੜ ਰੁਪਏ ਮਿਲੇ।ਪੰਜ ਮਾਲ ਗੱਡੀਆਂ ਜੋੜ ਕੇ ਬਣਾਈ ਇਸ ਮਾਲ ਗੱਡੀ ਦਾ ਨਾਂਅ ਰੇਲਵੇ ਨੇ ਸੁਪਰ ਵਾਸੁਕੀ ਰੱਖਿਆ ਹੈ। ਕੇਂਦਰੀ ਰੇਲ ਮੰਤਰੀ ਅਸ਼ਵਨੀ ਵੈਸ਼ਣਵ ਨੇ ਇਸ ਪ੍ਰਾਪਤੀ ਨੂੰ ਟਵਿੱਟਰ ਹੈਂਡਲ ਉੱਤੇ ਵੀ ਸਾਂਝਾ ਕੀਤਾ ਅਤੇ ਇਸ ਨੂੰ ਦੇਸ਼ ਦੀ ਸਭ ਤੋਂ ਲੰਬੀ ਮਾਲ ਗੱਡੀ ਦੱਸਿਆ। ਇਸ ਤੋਂ ਪਹਿਲਾਂ 22 ਜਨਵਰੀ 2021 ਨੂੰ ਪੰਜ ਖਾਲੀ ਮਾਲ ਗੱਡੀਆਂ ਜੋੜ ਕੇ ਭਿਲਾਈ ਤੋਂ ਕੋਰਲਾ ਲਿਆਂਦੀਆਂ ਗਈਆਂ ਸੀ। ਇਸ ਨੂੰ ਵਾਸੁਕੀ ਨਾਂਅ ਦਿੱਤਾ ਗਿਆ ਸੀ। ਰੇਲਵੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਕੱਠੀਆਂ ਤਿੰਨ ਜਾਂ ਪੰਜ ਮਾਲ ਗੱਡੀਆਂ ਨੂੰ ਜੋੜ ਕੇ ਚਲਾਉਣ ਨਾਲ ਨਾ ਕੇਵਲ ਸਟਾਫ ਦੀ ਬਚਤ ਹੁੰਦੀ ਹੈ, ਸਗੋਂ ਰੇਲਵੇ ਟਰੈਕ ਉੱਤੇ ਆਵਾਜਾਈ ਦਾ ਦਬਾਅ ਵੀ ਘੱਟ ਹੁੰਦਾ ਹੈ।