ਨਵੀਂ ਦਿੱਲੀ, 17 ਅਗਸਤ (ਪੋਸਟ ਬਿਊਰੋ)- ਭਾਰਤ ਵੱਲੋਂ ਬਾਕਾਇਦਾ ਤੌਰ ਉੱਤੇ ਇਤਰਾਜ਼ ਦੇ ਬਾਵਜੂਦ ਸ੍ਰੀਲੰਕਾ ਦੀ ਸਰਕਾਰ ਚੀਨ ਦੇ ਜਾਸੂਸੀ ਬੇੜੇ ਯੁਆਨ ਵਾਂਗ-5 ਨੂੰ ਆਪਣੀ ਬੰਦਰਗਾਹ ਉੱਤੇ ਆਉਣੋਂ ਨਹੀਂ ਰੋਕ ਸਕੀ। ਕੱਲ੍ਹ ਸਵੇਰੇ ਬੇਹੱਦ ਆਧੁਨਿਕ ਅਤੇ ਤਕਨੀਕੀ ਤੌਰ ਉੱਤੇ ਉਨਤ ਇਹ ਬੇੜਾ ਹੰਬਨਟੋਟਾ ਬੰਦਰਗਾਹ ਜਾ ਪੁੱਜਾ।
ਇਸ ਦੇ ਬਾਅਦ ਭਾਰਤ ਨੇ ਹਾਲੇ ਕੋਈ ਪ੍ਰਤੀਕਿਰਿਆ ਨਹੀਂ ਦਿੱਤੀ। ਇੱਕ ਦਿਨ ਪਹਿਲਾਂ ਸ੍ਰੀਲੰਕਾ ਨੂੰ ਡੋਰਨੀਅਰ ਟੋਹੀ ਜਹਾਜ਼ ਸੌਂਪ ਕੇ ਭਾਰਤ ਨੇ ਜਤਾਇਆ ਸੀ ਕਿ ਉਹ ਕਾਹਲੀ ਵਿੱਚ ਕੋਈ ਕਦਮ ਨਹੀਂ ਉਠਾਵੇ। ਚੀਨ ਬਾਰੇ ਗੁਆਂਢੀ ਦੇਸ਼ ਦਾ ਵਤੀਰਾ ਵੇਖ ਕੇ ਭਾਰਤ ਅਗਲਾ ਕਦਮ ਚੁੱਕੇਗਾ। ਜਾਣਕਾਰਾਂ ਦੇ ਮੁਤਾਬਕ ਸ੍ਰੀਲੰਕਾ ਨੇ ਭਾਰਤ ਦੀਆਂ ਚਿੰਤਾਵਾਂ ਨੂੰ ਨਜ਼ਰ ਅੰਦਾਜ਼ ਕਰ ਕੇ ਇਹ ਸੰਦੇਸ਼ ਦਿੱਤਾ ਹੈ ਕਿ ਉਹ ਆਰਥਿਕ ਹਿੱਤਾਂ ਲਈ ਇਸ ਖੇਤਰ ਦੇ ਦੋਵੇਂ ਵੱਡੇ ਦੇਸ਼ਾਂ ਚੀਨ ਤੇ ਭਾਰਤ ਵਿਚਾਲੇ ਦੁਵੱਲੀ ਸਾਂਝ ਰੱਖਦਾ ਰਹੇਗਾ।
ਚੀਨ ਦੇ ਇਸ ਖੁਫੀਆ ਬੇੜੇ ਨੇ ਪਹਿਲਾਂ 11 ਅਗਸਤ ਨੂੰ ਹੰਬਨਟੋਟਾ ਪਹੁੰਚਣਾ ਸੀ, ਪਰ ਭਾਰਤ ਦੇ ਇਤਰਾਜ਼ਾਂ ਤੋਂ ਬਾਅਦ ਸ੍ਰੀਲੰਕਾ ਨੇ ਪਹਿਲਾਂ ਇਸ ਨੂੰ ਮਨਜ਼ੂਰੀ ਦੇਣ ਤੋਂ ਮਨ੍ਹਾ ਕਰ ਦਿੱਤਾ ਸੀ। ਚਾਰ ਦਿਨ ਇਹ ਸ੍ਰੀਲੰਕਾ ਦੀ ਸਮੁੰਦਰੀ ਹੱਦ ਦੇ ਬਾਹਰ ਖੜ੍ਹਾ ਰਿਹਾ। ਦੱਸਿਆ ਗਿਆ ਹੈ ਕਿ ਸ੍ਰੀਲੰਕਾ ਨੇ ਇਸ ਸ਼ਰਤ ਉੱਤੇ ਮਨਜ਼ੂਰੀ ਦਿੱਤੀ ਕਿ ਇਹ ਬੇੜਾ ਕੋਈ ਖੋਜ ਕਾਰਜ ਉਸ ਦੀ ਬੰਦਰਗਾਹ ਵਿੱਚ ਨਹੀਂ ਕਰੇਗਾ।
ਓਧਰ ਅਮਰੀਕਾ ਦੇ ਰੱਖਿਆ ਮੰਤਰਾਲੇ ਦਾ ਕਹਿਣਾ ਹੈ ਕਿ ਇਹ ਬੇੜਾ ਚੀਨ ਦੀ ਫੌਜ (ਪੀ ਐਲ ਏ) ਅਧੀਨ ਕੰਮ ਕਰਦਾ ਹੈ ਤੇ ਪੂਰੀ ਤਰ੍ਹਾਂ ਸੈਟੇਲਾਈਟ ਤੇ ਮਿਜ਼ਾਈਲੀ ਸਰਗਰਮੀਆਂ ਦੀ ਟੋਹ ਲੈ ਸਕਦਾ ਹੈ। ਦੇਸ਼ ਦੇ ਮੁੱਖ ਕੂਟਨੀਤਕ ਵਿਸ਼ਲੇਸ਼ਕ ਬ੍ਰਹਮਾ ਚੇਲਾਨੀ ਨੇ ਇਸ ਨੂੰ ਗੁਆਂਢੀ ਦੇਸ਼ਾਂ ਵਿੱਚ ਭਾਰਤ ਦੇ ਘਟਦੇ ਦਬਦਬੇ ਦੀ ਗੱਲ ਦੱਸ ਕੇ ਕਿਹਾ ਹੈ ਕਿ ਆਰਥਿਕ ਤੌਰ ਉੱਤੇ ਕੰਗਾਲ ਦੇਸ਼ ਸ੍ਰੀਲੰਕਾ ਨੇ ਚੀਨ ਦੇ ਬੇੜੇ ਨੂੰ ਆਗਿਆ ਦੇ ਕੇ ਭਾਰਤ ਨੂੰ ਕੂਟਨੀਤਕ ਚਪੇੜ ਮਾਰੀ ਹੈ। ਚਾਰ ਸੌ ਚਾਲਕਾਂ ਦੀ ਟੀਮ ਵਾਲਾ ਇਹ ਬੇੜਾ ਵੱਡੇ ਹਾਈਪਰਬੋਲਿਕ ਟਰੈਕਿੰਗ ਐਂਟੀਨਾ ਤੇ ਆਧੁਨਿਕ ਸੈਂਸਰਾਂ ਨਾਲ ਲੈਸ ਹੈ। ਇਹ ਭਾਰਤ ਦੇ ਦੱਖਣੀ ਹਿੱਸੇ ਦੀਆਂ ਵਧੇਰੇ ਫੌਜੀ ਸਰਗਰਮੀਆਂ ਦੇ ਨਾਲ ਬੁਨਿਆਦੀ ਢਾਂਚੇ ਦੀਆਂ ਯੋਜਨਾਵਾਂ ਉੱਤੇ ਨੇੜਿਓਂ ਨਿਗਰਾਨੀ ਰੱਖ ਸਕਦਾ ਹੈ। ਇਹ ਉਪ ਗ੍ਰਹਿ ਤੇ ਮਿਜ਼ਾਈਲਾਂ ਨੂੰ ਵੀ ਟਰੈਕ ਕਰ ਸਕਦਾ ਹੈ।