ਰਾਮਾਂ ਮੰਡੀ, 17 ਅਗਸਤ (ਪੋਸਟ ਬਿਊਰੋ)- ਪੰਜਾਬ ਤੇ ਹਰਿਆਣਾ ਦੀ ਹੱਦ ਉੱਤੇ ਪਿੰਡ ਨੌਰੰਗ ਨੇੜੇ ਸ਼ਰਧਾਲੂਆਂ ਨਾਲ ਭਰੀ ਜੀਪ ਹਾਦਸੇ ਦਾ ਸ਼ਿਕਾਰ ਹੋ ਜਾਣ ਨਾਲ ਇੱਕ ਬੱਚੇ ਸਣੇ ਚਾਰ ਜਣਿਆਂ ਦੀ ਮੌਤ ਹੋ ਗਈ। ਇਹ ਸਾਰੇ ਰਾਜਸਥਾਨ ਵਿੱਚ ਗੁੱਗਾ ਮਾੜੀ ਮੰਦਰ ਦੇ ਦਰਸ਼ਨ ਕਰ ਕੇ ਪਰਤ ਰਹੇ ਸਨ।
ਪਤਾ ਲੱਗਾ ਹੈ ਕਿ ਇਸ ਪਿਕਅਪ ਵਿੱਚ ਆਰਜ਼ੀ ਤੌਰ ਉੱਤੇ ਫੱਟੇ ਲਾ ਕੇ ਦੂਸਰੀ ਛੱਤ ਬਣਾਈ ਅਤੇ ਸਮਰੱਥਾ ਤੋਂ ਵੱਧ ਸਵਾਰੀਆਂ ਬਿਠਾਈਆਂ ਸਨ। ਪਿੰਡ ਨੌਰੰਗ ਕੋਲ ਪਿਕਅਪ ਦੀ ਆਰਜ਼ੀ ਬਣਾਈ ਉਤਲੀ ਛੱਤ ਉੱਤੇ ਬੈਠੇ ਇੱਕ ਬੱਚੇ ਸਣੇ ਤਿੰਨ ਸਵਾਰ ਬੁੜਕ ਕੇ ਸੜਕ ਉੱਤੇ ਡਿੱਗ ਜਾਣ ਕਾਰਨ ਗੰਭੀਰ ਜ਼ਖਮੀ ਹੋ ਗਏ। ਪਿਕਅਪ ਵਿੱਚ ਸਫਰ ਕਰਦੇ ਹੋਰ ਸ਼ਰਧਾਲੂਆਂ ਨੂੰ ਵੀ ਸੱਟਾਂ ਲੱਗੀਆਂ। ਹਾਦਸੇ ਦੇ ਚਾਰ ਗੰਭੀਰ ਜ਼ਖਮੀਆਂ ਨੇ ਰਾਮਾਂ ਮੰਡੀ ਦੇ ਸਿਵਲ ਹਸਪਤਾਲ `ਚ ਇਲਾਜ ਦੌਰਾਨ ਦਮ ਤੋੜ ਦਿੱਤਾ। ਇਨ੍ਹਾਂ ਦੀ ਪਛਾਣ ਭੁਰੂ, ਨਰੇਸ਼, ਮਨਪ੍ਰੀਤ ਤੇ ਅਖਿਲੇਸ਼ ਵਜੋਂ ਹੋਈ ਹੈ। ਹਾਦਸੇ ਮਗਰੋਂ ਪਿਕਅਪ ਚਾਲਕ ਨੇ ਖੁਦ ਹੀ ਸਾਰੇੇ ਜ਼ਖਮੀਆਂ ਨੂੰ ਸਿਵਲ ਹਸਪਤਾਲ ਪੁਚਾਇਆ ਅਤੇ ਫਿਰ ਫਰਾਰ ਹੋ ਗਿਆ।