* ਜਿਪਸੀ ਉੱਤੇ ਲੱਗਾ ਨੰਬਰ ਪਟਿਆਲਾ ਦੇ ਸਕੂਟਰ ਨਿਕਲਿਆ
ਮੁਕੇਰੀਆਂ, 17 ਅਗਸਤ (ਪੋਸਟ ਬਿਊਰੋ)- ਲੋਕਾਂ ਨੂੰ ਨਿਯਮਵਾਲੇ ਮੁਕੇਰੀਆਂ ਦੇ ਐਸ ਡੀ ਐਮ ਲਈ ਆਜ਼ਾਦੀ ਦਿਹਾੜੇ ਮੌਕੇ ਪਰੇਡ ਦੀ ਸਲਾਮੀ ਲੈਣ ਲਈ ਜਾਅਲੀ ਨੰਬਰ ਲੱਗੀ ਜਿਪਸੀ ਦੀ ਵਰਤੀ ਗਈ ਹੈ। ਇਸ ਜਿਪਸੀ ਉੱਤੇ ਲੱਗਾ ਨੰਬਰ ਪਟਿਆਲਾ ਦੇ ਆਰ ਟੀ ਏ ਦਫਤਰ ਵਿੱਚ ਸਤਵਿੰਦਰ ਸਿੰਘ ਬਜਾਜ ਚੇਤਕ ਸਕੂਟਰ ਲਈ ਰਜਿਸਟਰਡ ਹੈ। ਪੁਲਸ ਦੇ ਸੂਤਰਾਂ ਮਤਾਬਕ ਇੱਕ ਸਾਬਕਾ ਪੁਲਸ ਮੁਲਾਜ਼ਮ ਦੀ ਇਹ ਜਿਪਸੀ ਗਣਤੰਤਰ ਦਿਵਸ ਅਤੇ ਆਜ਼ਾਦੀ ਦਿਨ ਮੌਕੇ ਪਿਛਲੇ ਕਈ ਸਮਾਗਮਾਂ ਵਿੱਚ ਪ੍ਰਸ਼ਾਸਨ ਨੇ ਮੁਫਤ ਮਿਲਦੀ ਰਹੀ ਅਤੇ ਕਾਗਜ਼ ਕਿਸੇ ਨੇ ਕਦੀ ਚੈਕ ਹੀ ਨਹੀਂ ਕੀਤੇ।
ਵਰਨਣ ਯੋਗ ਹੈ ਕਿ15 ਅਗਸਤ ਨੂੰ ਪ੍ਰਸ਼ਾਸਨ ਵੱਲੋਂ ਸ਼ਹਿਰ ਦੇ ਆਰੀਆ ਸਕੂਲ ਵਿੱਚ ਕਰਵਾਏ ਆਜ਼ਾਦੀ ਦਿਨ ਸਮਾਗਮ ਵਿੱਚ ਮੁਕੇਰੀਆਂ ਦੇ ਐਸ ਡੀ ਐਮ ਕੰਵਲਜੀਤ ਸਿੰਘ ਨੇ ਪੀ ਬੀ 11ਜੇ-0011 ਨੰਬਰ ਵਾਲੀ ਜਿਪਸੀ ਉੱਤੇ ਚੜ੍ਹ ਕੇਸਲਾਮੀ ਲੈਣ ਤੋਂ ਪਹਿਲਾਂ ਪਰੇਡ ਦਾ ਮੁਆਇਨਾ ਕੀਤਾ ਸੀ। ਰੀਜਨਲ ਟਰਾਂਸਪੋਰਟ ਅਫਸਰ (ਆਰ ਟੀ ਏ)ਪਟਿਆਲਾ ਬਬਨਦੀਪ ਸਿੰਘ ਦੇ ਮੁਤਾਬਕ ਇਹ ਨੰਬਰ ਪਟਿਆਲਾ ਦੇ ਸਤਵਿੰਦਰ ਸਿੰਘ ਦੇ ਬਜਾਜ ਚੇਤਕ ਸਕੂਟਰ ਲਈ ਦਰਜ ਹੈ। ਪਤਾ ਲੱਗਾ ਹੈ ਕਿ ਸਤਵਿੰਦਰ ਸਿੰਘ ਸਕੂਟਰ ਦਾ ਪਹਿਲਾ ਮਾਲਕ ਸੀ ਅਤੇ ਇਹ ਰਜਿਸਟਰੇਸ਼ਨ (ਆਰਸੀ) ਹਾਲੇ ਤੱਕ ਐਕਟਿਵ ਹੈ। ਮੁਕੇਰੀਆਂ ਦੇ ਐਸ ਡੀ ਐਮ ਕੰਵਲਜੀਤ ਸਿੰਘ ਨੇ ਕਿਹਾ ਕਿ ਇਸ ਬਾਰੇ ਉਨ੍ਹਾਂ ਨੂੰ ਕੋਈ ਜਾਣਕਾਰੀ ਨਹੀਂ। ਡੀਐਸ ਪੀ ਕੁਲਵਿੰਦਰ ਸਿੰਘ ਵਿਰਕ ਨੇ ਕਿਹਾ ਕਿ ਸਰਕਾਰ ਵੱਲੋਂ ਅਜਿਹੇ ਸਮਾਗਮਾਂ ਮੌਕੇ ਕੋਈ ਜਿਪਸੀ ਨਹੀਂ ਦਿੱਤੀ ਜਾਂਦੀ, ਇਸ ਲਈ ਇਹ ਜਿਪਸੀ ਕਿਸੇ ਜਾਣਕਾਰ ਤੋਂ ਸਮਾਗਮ ਵਾਸਤੇ ਲਈ ਸੀ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਜਿਪਸੀ ਉੱਤੇ ਜਾਅਲੀ ਨੰਬਰ ਲੱਗਾ ਹੋਣ ਬਾਰੇ ਉਨ੍ਹਾਂ ਨੂੰ ਕੋਈ ਜਾਣਕਾਰੀ ਨਹੀਂ ਅਤੇ ਉਹ ਇਸ ਦੀ ਜਾਂਚ ਕਰਨਗੇ।