ਨਵੀਂ ਦਿੱਲੀ, 16 ਅਗਸਤ, (ਪੋਸਟ ਬਿਊਰੋ)- ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਅੱਜ ਮੰਗਲਵਾਰ ਇੱਕ ਆਨਲਾਈਨ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਕਿ ਭਾਰਤ ਨੂੰ ਦੁਨੀਆ ਦਾ ਨੰਬਰ 1 ਅਮੀਰ ਦੇਸ਼ ਬਣਾਉਣ ਲਈ ਹਰ ਗਰੀਬ ਨੂੰ ਅਮੀਰ ਬਣਾਉਣਾ ਪਵੇਗਾ।ਇਸ ਬਾਰੇਉਨ੍ਹਾਂ ਨੇ ਕੇਂਦਰ ਨੂੰ ਆਪਣੀ ਸੇਵਾ ਦੀ ਪੇਸ਼ਕਸ਼ ਵੀ ਕੀਤੀ ਹੈ।
ਅਰਵਿੰਦ ਕੇਜਰੀਵਾਲ ਨੇ ਪ੍ਰੈੱਸ ਕਾਨਫਰੰਸ ਵਿੱਚ ਕਿਹਾ, “ਮੇਰੀ ਜਿ਼ੰਦਗੀ ਦਾ ਇਹ ਸੁਪਨਾ ਹੈ ਕਿ ਜਿਉਂਦੇ ਜੀਅ ਭਾਰਤ ਨੂੰ ਦੁਨੀਆ ਦਾ ਨੰਬਰ 1 ਦੇਸ਼ ਦੇਖਣਾ ਹੈ।ਦੇਸ਼ ਅਮੀਰ ਬਣਾਉਣ ਲਈ ਹਰ ਭਾਰਤੀ ਅਮੀਰ ਬਣਾਉਣਾ ਪਵੇਗਾ।” ਇਸ ਮੌਕੇਉਨ੍ਹਾ ਕਿਹਾ, “ਤੁਸੀਂ ਸੋਚਦੇ ਹੋ ਕਿ ਗਰੀਬ ਕਿਸਾਨ, ਮਜ਼ਦੂਰ ਆਪਣੇ ਬੱਚੇ ਨੂੰ ਸਰਕਾਰੀ ਸਕੂਲ ਭੇਜਦਾ ਹੈ, ਪਰ ਸਰਕਾਰੀ ਸਕੂਲਾਂ ਦੀ ਹਾਲਤ ਬਹੁਤ ਮਾੜੀ ਹੈ। ਜੇ ਉਹ ਬੱਚਾ ਨਾ ਪੜ੍ਹੇਗਾਤਾਂ ਵੱਡਾ ਹੋ ਕੇ ਛੋਟੇ ਕੰਮ ਕਰੇਗਾ ਅਤੇ ਗਰੀਬ ਰਹੇਗਾ।” ਉਨ੍ਹਾਂ ਕਿਹਾ, ‘ਅਸੀਂ ਸਕੂਲ ਵਿੱਚ ਬਹੁਤ ਵਧੀਆ ਕੰਮ ਕਰਦੇ ਹਾਂ, ਗਰੀਬ ਬੱਚਾ ਚੰਗੀ ਤਰ੍ਹਾਂ ਪੜ੍ਹ ਕੇ ਡਾਕਟਰ, ਇੰਜੀਨੀਅਰ ਬਣ ਜਾਂਦਾ ਹੈ, ਤਾਂ ਪਰਿਵਾਰ ਦੀ ਗਰੀਬੀ ਦੂਰ ਕਰੇਗਾ, ਉਹ ਪਰਿਵਾਰ ਅਮੀਰ ਹੋ ਜਾਵੇਗਾ।’
ਕੇਜਰੀਵਾਲ ਨੇ ਭਾਰਤੀ ਜਨਤਾ ਪਾਰਟੀ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ ਨੂੰ ਅਪੀਲ ਕੀਤੀ ਕਿ ਉਹ ਮੁਫਤ ਸਿੱਖਿਆ ਤੇ ਸਿਹਤ ਸੇਵਾਵਾਂ ਨੂੰ ‘ਮੁਫ਼ਤ ਕੀ ਰੇਵੜੀ’ ਨਾ ਕਹਿਣ।ਉਨ੍ਹਾ ਕਿਹਾ ਕਿ ਬੱਚਿਆਂ ਦੇ ਚੰਗੇ ਭਵਿੱਖ ਲਈ ਵੱਡੀ ਗਿਣਤੀ ਵਿੱਚ ਸਰਕਾਰੀ ਸਕੂਲ ਖੋਲ੍ਹਣ, ਇਨ੍ਹਾਂ ਵਿੱਚ ਸੁਧਾਰ ਕਰਨ, ਗੈਸਟ ਟੀਚਰਾਂ ਨੂੰ ਰੈਗੂਲਰ ਕਰਨ, ਟੀਚਰਾਂ ਨੂੰ ਪੂਰੀ ਟਰੇਨਿੰਗ ਦੇਣ ਦੀ ਲੋੜ ਹੈ, ਤਦੇ ਭਾਰਤ ਖੁਸ਼ਹਾਲ ਦੇਸ਼ ਹੋ ਸਕਦਾ ਹੈ। ਕੇਜਰੀਵਾਲ ਨੇ ਕਿਹਾ ਕਿ ਸਰਕਾਰ ਕੋਲ ਪੈਸੇ ਦੀ ਕਮੀ ਨਹੀਂ, ਇਹਦਿੱਲੀ ਵਿੱਚ ਹੋ ਸਕਦਾ ਹੈ ਤਾਂ ਦੇਸ਼ ਵਿੱਚ ਹੋ ਸਕਦਾ ਹੈ। 5 ਸਾਲਾਂ ਵਿੱਚ ਸਭ ਹੋ ਸਕਦਾ ਹੈ। ਮੈਂ ਕੇਂਦਰ ਨੂੰ ਬੇਨਤੀ ਕਰਦਾ ਹਾਂ ਕਿ ਉਹ ਸਰਕਾਰੀ ਸਕੂਲਾਂ ਅਤੇ ਸਿਹਤ ਕੇਂਦਰਾਂ ਨੂੰ ਬਿਹਤਰ ਬਣਾਉਣ ਲਈ ਸਾਡੀ ਮੁਹਾਰਤ ਦੀ ਵਰਤੋਂ ਕਰੇ। ਸਾਰੀਆਂ ਰਾਜ ਸਰਕਾਰਾਂ ਮਿਲ ਕੇ ਕੰਮ ਕਰ ਸਕਦੀਆਂ ਹਨ।