ਕੋਲਕਾਤਾ, 16 ਅਗਸਤ (ਪੋਸਟ ਬਿਊਰੋ)- ਪੱਛਮੀ ਬੰਗਾਲ ਵਿੱਚ ਟੀਚਰ ਭਰਤੀ ਘੋਟਾਲੇ ਵਿੱਚ ਸਾਬਕਾ ਮੰਤਰੀ ਪਾਰਥ ਚੈਟਰਜੀ ਅਤੇ ਪਸ਼ੂ ਤਸਕਰੀ ਮਾਮਲੇ ਵਿੱਚ ਬਾਹੂਬਲੀ ਆਗੂ ਅਨੁਬ੍ਰਤ ਮੰਡਲ ਦੀ ਗ੍ਰਿਫਤਾਰੀ ਪਿੱਛੋਂ ਭਾਜਪਾ ਲਗਾਤਾਰ ਸੱਤਾਧਾਰੀ ਪਾਰਟੀ ਟੀ ਐਮ ਸੀ ਅਤੇ ਮਮਤਾ ਸਰਕਾਰ ਖਿਲਾਫ ਹਮਲਾਵਰ ਹੈ। ਵਿਰੋਧੀ ਧਿਰ ਦੀ ਆਲੋਚਨਾ ਤੋਂ ਨਾਰਾਜ਼ ਟੀ ਐਮ ਸੀ ਆਗੂ ਧਮਕੀਆਂ ਦੇ ਰਹੇ ਹਨ ਅਤੇ ਵਿਵਾਦਮਈ ਟਿੱਪਣੀਆਂ ਕਰਨੋਂ ਵੀ ਨਹੀਂ ਝਿਜਕਦੇ।
ਇਸੇ ਲੜੀ ਵਿੱਚ ਟੀ ਐਮ ਸੀ (ਤ੍ਰਿਣਮੂਲ ਕਾਂਗਰਸ) ਦੇ ਪਾਰਲੀਮੈਂਟ ਮੈਂਬਰ ਸੌਗਤ ਰਾਏ ਨੇ ਜਿੱਥੇ ਆਲੋਚਕਾਂ ਦੀ ਚਮੜੀ ਨਾਲ ਜੁੱਤੀਆਂ ਬਣਵਾਉਣ ਦੀ ਗੱਲ ਕਹੀ, ਉਥੇ ਵਿਧਾਇਕ ਮਦਨ ਮਿੱਤਰਾ ਨੇ ਆਲੋਚਕਾਂ ਨੂੰ ਡੰਡੇ ਨਾਲ ਜਵਾਬ ਦੇਣ ਦੀ ਗੱਲ ਕਹੀ ਹੈ। ਸੌਗਤ ਰਾਏ ਨੇ ਉਤਰੀ 24 ਪਰਗਨਾ ਦੇ ਕਮਰਹੱਟੀ ਵਿੱਚ ਪਾਰਟੀ ਪ੍ਰੋਗਰਾਮ ਵਿੱਚ ਵਰਕਰਾਂ ਨੂੰ ਸੰਬੋਧਨ ਕਰਦੇ ਵਕਤ ਵਿਰੋਧੀ ਧਿਰ ਨੂੰ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਆਲੋਚਕਾਂ ਦੇ ਚੰਮ ਦੀਆਂ ਜੁੱਤੀਆਂ ਬਣਵਾਈਆਂ ਜਾਣਗੀਆਂ। ਬਾਅਦ ਵਿੱਚ ਆਪਣੇ ਬਿਆਨ ਦੌ ਸਫਾਈ ਵਿੱਚ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਮੁਹਾਵਰੇ ਦੀ ਵਰਤੋਂ ਕੀਤੀ ਸੀ। ਉਨ੍ਹਾਂ ਮੰਨਿਆ ਕਿ ਉਨ੍ਹਾਂ ਨੂੰ ਇਹ ਨਹੀਂ ਕਹਿਣਾ ਚਾਹੀਦਾ ਸੀ। ਓਧਰ ਕਮਰਹੱਟੀ ਤੋਂ ਤਿ੍ਰਣਮੂਲ ਵਿਧਾਇਕ ਮਦਨ ਮਿੱਤਰਾ ਨੇ ਵਿਰੋਧੀ ਧਿਰ ਨੂੰ ਧਮਕੀ ਦਿੱਤੀ ਤੇ ਤਿ੍ਰਣਮੂਲ ਦੇ ਵਰਕਰਾਂ ਨੂੰ ਆਲੋਚਕਾਂ ਨੂੰ ਡੰਡੇ ਨਾਲ ਜਵਾਬ ਦੇਣ ਲਈ ਕਿਹਾ ਅਤੇ ਇੱਥੋਂ ਤਕ ਕਿਹਾ ਕਿ ਡੰਡੇ ਦੀ ਸਪਲਾਈ ਉਹ ਖੁਦ ਕਰਨਗੇ।
ਵਰਨਣ ਯੋਗ ਹੈ ਕਿ ਇਸ ਤੋਂ ਪਹਿਲਾਂ ਸ੍ਰੀਰਾਮਪੁਰ ਤੋਂ ਪਾਰਟੀ ਦੇ ਐਮ ਪੀ ਕਲਿਆਣ ਬੈਨਰਜੀ ਨੇ ਕਿਹਾ ਸੀ ਕਿ ਪਾਰਟੀ ਦੀ ਪ੍ਰਧਾਨ ਮਮਤਾ ਬੈਨਰਜੀ ਨੇ ‘ਬਦਲਾ ਨਯ, ਬਦਲ ਚਾਈ' (ਬਦਲਾ ਨਹੀਂ, ਬਦਲਾਅ ਚਾਹੀਦਾ ਹੈ) ਦਾ ਨਾਅਰਾ ਦਿੱਤਾ ਸੀ। ਉਨ੍ਹਾਂ ਨੂੰ ਬਦਲਾ ਚਾਈ ਕਹਿਣਾ ਚਾਹੀਦਾ ਸੀ। ਇਸ ਤੋਂ ਇਲਾਵਾ ਚੁੰਚੁੜਾ ਤੋਂ ਤਿ੍ਰਣਮੂਲ ਦੇ ਵਿਧਾਇਕ ਅਸਿਤ ਮਜੂਮਦਾਰ ਨੇ ਵੀ ਕਿਹਾ ਸੀ ਕਿ ਤਿ੍ਰਣਮੂਲ ਦੇ ਕੌਮੀ ਜਨਰਲ ਸੈਕਟਰੀ ਅਭਿਸ਼ੇਕ ਬੈਨਰਜੀ ਬਾਰੇ ਘਟੀਆ ਪ੍ਰਚਾਰ ਕਰਨ ਵਾਲੇ ਲੋਕਾਂ ਨੂੰ ਕੁਟਾਪਾ ਚਾੜ੍ਹਿਆ ਜਾਵੇਗਾ। ਬੀਰਭੂਮ ਦੇ ਇਲਮਬਾਜ਼ਾਰ ਦੇ ਤਿ੍ਰਣਮੂਲ ਆਗੂ ਦੁਲਾਲ ਰਾਏ ਨੇ ਚਿਤਾਵਨੀ ਦਿੱਤੀ ਸੀ ਕਿ ਜੇ ਕੋਈ ਗੁੜ-ਪਤਾਸਾ ਵੰਡੇਗਾ ਤਾਂ ਉਸ ਦੀ ਪਿੱਠ ਉੱਤੇ ਡੰਡੇ ਪੈਣਗੇ।