ਕਰਾਚੀ, 13 ਅਗਸਤ (ਪੋਸਟ ਬਿਊਰੋ)- ਪਾਕਿਸਤਾਨ ਵਿੱਚ ਹਿੰਦੂ ਘੱਟ ਗਿਣਤੀ ਉੱਤੇਜ਼ੁਲਮ ਲਗਾਤਾਰ ਜਾਰੀ ਹੈ। ਉਸ ਦੇ ਦੱਖਣੀ ਸਿੰਧ ਪ੍ਰਾਂਤ ਤੋਂ ਜੂਨ ਵਿੱਚ ਅਗਵਾ ਹੋਈ ਹਿੰਦੂ ਲੜਕੀ ਕਰੀਨਾ ਕੁਮਾਰੀ ਨੇ ਅਦਾਲਤ ਵਿੱਚ ਦੱਸਿਆ ਕਿ ਉਸ ਨੂੰ ਜਬਰਦਸਤੀ ਇਸਲਾਮ ਕਬੂਲ ਕਰਵਾ ਕੇ ਉਸ ਦੀ ਮੁਸਲਮਾਨ ਨਾਲ ਸ਼ਾਦੀ ਕਰਵਾਈ ਗਈ ਹੈ।
ਦੱਖਣੀ ਸਿੰਧ ਪ੍ਰਾਂਤ ਦੇ ਬੇਨਜ਼ੀਰ ਸ਼ਹੀਦਾਬਾਦ ਵਿੱਚ ਛੇ ਜੂਨ ਨੂੰ ਆਪਣੇ ਘਰ ਅੱਗੋਂ ਅਗਵਾ ਹੋਈ ਕਰੀਨਾ ਕੁਮਾਰੀ ਦੇ ਪਿਤਾ ਸੁੰਦਰ ਮੱਲ ਨੇ ਨਵਾਬਸ਼ਾਹ ਕੋਰਟ ਵਿੱਚ ਪੇਸ਼ੀ ਦੌਰਾਨ ਵੀਡੀਓ ਸੰਦੇਸ਼ ਨਾਲ ਹਾਜ਼ਰੀ ਪਾਈ। ਲੜਕੀ ਨੇ ਓਥੇ ਕਿਹਾ ਕਿ ਉਸ ਤੋਂ ਜਬਰਨ ਇਸਲਾਮ ਕਬੁੂਲ ਕਰਾਇਆ ਗਿਆ ਤੇ ਖਲੀਲੀ ਨਾਮ ਦੇ ਆਦਮੀ ਨਾਲ ਸ਼ਾਦੀ ਕਰਾਈ ਗਈ ਹੈ। ਪੀੜਤ ਹਿੰਦੂ ਲੜਕੀ ਨੇ ਉਸ ਨੂੰ ਵਾਪਸ ਆਪਣੇ ਮਾਤਾ-ਪਿਤਾ ਦੇ ਘਰ ਭੇਜਣ ਦੀ ਮੰਗ ਕੀਤੀ ਹੈ। ਉਸ ਨੂੰ ਮਹਿਲਾ ਕੇਂਦਰ ਵਿੱਚ ਭੇਜਿਆ ਗਿਆ ਹੈ। ਉਸ ਦੇ ਪਿਤਾ ਸੁੰਦਰ ਮੱਲ ਨੇ ਕਿਹਾ ਕਿ ਅਸੀਂ ਗਰੀਬ ਲੋਕ ਹਾਂ, ਸਾਡੇ ਕੋਲ ਅਦਾਲਤ ਆਉਣ ਲਈ ਬੱਸ ਦੇ ਕਿਰਾਏ ਤੱਕ ਦੇ ਪੈਸੇ ਨਹੀਂ, ਅੱਜ ਮੇਰੀ ਬੇਟੀ ਨੇ ਸਾਰੀ ਸੱਚਾਈ ਸਾਹਮਣੇ ਰੱਖ ਦਿੱਤੀ ਹੈ। ਕੋਰਟ ਨੂੰ ਉਸਦਾ ਅਗਵਾ ਕਰਨ ਵਾਲੇ, ਸੈਕਸ ਸ਼ੋਸ਼ਣ ਕਰਨ ਵਾਲੇ ਅਤੇ ਉਸ ਨੂੰ ਵੇਚਣ ਵਾਲਿਆਂ ਖ਼ਿਲਾਫ਼ ਕਾਰਵਾਈ ਕਰ ਕੇ ਉਨ੍ਹਾਂ ਨੇ ਸਖ਼ਤ ਸਜ਼ਾ ਦੇਣੀ ਚਾਹੀਦੀ ਹੈ। ਕਰੀਨਾ ਦੇ ਕੇਸ ਵਿੱਚ ਵਕੀਲ ਦਿਲੀਪ ਕੁਮਾਰ ਮੰਗਲਾਨੀ ਨੇ ਕਿਹਾ ਕਿ ਜਬਰਨ ਨਿਕਾਹ ਦੀ ਹਰਕਤ ਨੇ ਹਿੰਦੂ ਲੜਕੀਆਂ ਅਤੇ ਉਨ੍ਹਾਂ ਦੇ ਪਰਵਾਰ ਦੇ ਲੋਕਾਂ ਨੂੰ ਖਤਰੇ ਵਿੱਚ ਪਾ ਦਿੱਤਾ ਹੈ।