ਨਵੀਂ ਦਿੱਲੀ, 11 ਅਗਸਤ (ਪੋਸਟ ਬਿਊਰੋ)- ਪੀਲੀਭੀਤ ਤੋਂ ਭਾਜਪਾ ਦੇ ਪਾਰਲੀਮੈਂਟ ਮੈਂਬਰ ਵਰੁਣ ਗਾਂਧੀ ਨੇ ਕੱਲ੍ਹ ਇੱਥੇ ਕਿਹਾ ਕਿ ਰਾਸ਼ਨ ਕਾਰਡ ਹੋਲਡਰਾਂ ਨੂੰ ਕੌਮੀ ਝੰਡਾ ਖਰੀਦਣ ਨੂੰ ਮਜਬੂਰ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਆਜ਼ਾਦੀ ਦੀ 75ਵੀਂ ਵਰ੍ਹੇਗੰਢ ਦੇ ਜਸ਼ਨ ਜੇ ਗਰੀਬ ਲੋਕਾਂ ਉੱਤੇ ਬੋਝ ਬਣਦੇ ਹਨ ਤਾਂ ਬਹੁਤ ਮੰਦਭਾਗਾ ਹੋਵੇਗਾ।
ਵਰੁਣ ਗਾਂਧੀ ਨੇ ਹਿੰਦੀ ਵਿੱਚ ਕੀਤੇ ਟਵੀਟ ਵਿੱਚ ਕਿਹਾ, ‘‘ਤਿਰੰਗਾ ਹਰ ਭਾਰਤੀ ਦੇ ਦਿੱਲ ਵਿੱਚ ਵਸਦਾ ਹੈ, ਉਸ ਦੀ ਕੀਮਤ ਵਸੂਲਣ ਲਈ ਗਰੀਬ ਦੇ ਮੂੰਹੋਂ ਰੋਟੀ ਦੀ ਬੁਰਕੀ ਖੋਹਣਾ ਸ਼ਰਮਨਾਕ ਹੈ।' ਵਰੁਣ ਨੇ ਟਵੀਟ ਦੇ ਨਾਲ ਵੀਡੀਓ ਵੀ ਪੋਸਟ ਕੀਤੀ ਹੈ, ਜਿਸ ਵਿੱਚ ਰਾਸ਼ਨ ਕਾਰਡ ਹੋਲਡਰ ਤਿਰੰਗਾ ਖਰੀਦਣ ਲਈ ਜਬਰੀ ਰੁਪਏ ਵਸੂਲਣ ਦੀ ਸ਼ਿਕਾਇਤ ਕਰ ਰਹੇ ਹਨ। ਉਸ ਨੇ ਕਿਹਾ, ‘‘ਭਾਰਤ ਦੀ ਆਜ਼ਾਦੀ ਦੀ 75ਵੀਂ ਵਰ੍ਹੇਗੰਢ ਦੇ ਜਸ਼ਨ ਜੇ ਗਰੀਬ ਲੋਕਾਂ ਉੱਤੇ ਬੋਝ ਬਣਦੇ ਹਨ ਤਾਂ ਇਹ ਬਹੁਤ ਮੰਦਭਾਗਾ ਹੈ। ਰਾਸ਼ਨ ਕਾਰਡ ਹੋਲਡਰਾਂ ਨੂੰ ਤਿਰੰਗਾ ਖਰੀਦਣ ਲਈ ਮਜਬੂਰ ਕੀਤਾ ਜਾਂਦੈ ਜਾਂ ਫਿਰ ਰਸ਼ਨ ਦੇਣ ਤੋਂ ਨਾਂਹ ਨੁੱਕਰ ਕੀਤੀ ਜਾ ਰਹੀ ਹੈ।''
ਵਰਨਣ ਯੋਗ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਸੀ ਕਿ ਉਹ ‘ਹਰ ਘਰ ਤਿਰੰਗਾ' ਪ੍ਰੋਗਰਾਮ ਹੇਠ 13 ਤੋਂ 15 ਅਗਸਤ ਦੌਰਾਨ ਆਪਣੇ ਘਰਾਂ ਉੱਤੇ ਕੌਮੀ ਝੰਡਾ ਲਾਉਣ ਜਾਂ ਲਹਿਰਾਉਣ। ਭਾਜਪਾ ਨੇ ਪ੍ਰਧਾਨ ਮੰਤਰੀ ਦੇ ਸੱਦੇ ਨੂੰ ਵੱਡੀ ਪੱਧਰ ਉੱਤੇ ਸਫਲ ਬਣਾਉਣ ਲਈ ਮੁਹਿੰਮ ਚਲਾਈਹੈ। ਵਰੁਣ ਗਾਂਧੀ ਪਹਿਲਾਂ ਵੀ ਵੱਖ-ਵੱਖ ਮੁੱਦਿਆਂ ਬਾਰੇ ਆਪਣੀ ਸਰਕਾਰ ਨੂੰ ਘੇਰਦੇ ਰਹੇ ਹਨ।
ਇਸ ਦੌਰਾਨ ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਕਿਹਾ ਕਿ ਦੁਕਾਨਦਾਰ ਰਾਸ਼ਨ ਕਾਰਡ ਹੋਲਡਰਾਂ ਨੂੰ ਕੌਮੀ ਝੰਡੇ ਖਰੀਦਣ ਨੂੰ ਮਜਬੂਰ ਕਰ ਰਹੇ ਹਨ। ਉਨ੍ਹਾਂ ਦੋਸ਼ ਲਾਇਆ ਕਿ ਭਾਜਪਾ ‘ਰਾਸ਼ਟਰਵਾਦ' ਵੇਚ ਰਹੀ ਹੈ ਤੇ ਉਸ ਨੇ ਗਰੀਬ ਗੁਰਬੇ ਦੇ ਸਵੈਮਾਣ ਨੂੰ ਸੱਟ ਮਾਰੀ ਹੈ। ਸਾਬਕਾ ਕਾਂਗਰਸ ਪ੍ਰਧਾਨ ਨੇ ਫੇਸਬੁੱਕ ਪੋਸਟ ਵਿੱਚ ਕਿਹਾ ਹੈ ਕਿ ਤਿਰੰਗਾ ਸਾਡਾ ਗੌਰਵ ਹੈ ਤੇ ਇਹ ਹਰ ਭਾਰਤੀ ਦੇ ਦਿੱਲ ਵਿੱਚ ਵਸਦਾ ਹੈ। ਗਾਂਧੀ ਨੇ ਕਿਹਾ, ‘‘ਰਾਸ਼ਟਰਵਾਦ ਨੂੰ ਕਦੇ ਵੀ ਵੇਚਿਆ ਨਹੀਂ ਜਾ ਸਕਦਾ। ਰਾਸ਼ਨ ਦੇਣ ਮੌਕੇ ਗਰੀਬ ਤੋਂ ਤਿਰੰਗੇ ਲਈ 20 ਰੁਪਏ ਮੰਗਣੇ ਸ਼ਰਮਨਾਕ ਹੈ।''