ਮਿਸੀਸਾਗਾ, 10 ਅਗਸਤ (ਪੋਸਟ ਬਿਊਰੋ) :ਮਿਸੀਸਾਗਾ ਸਥਿਤ ਕੈਪਰਾਜ਼ ਕਿਚਨ ਰੈਸਟੋਰੈਂਟ ਦਾ ਕੰਮ ਸਹੀ ਢੰਗ ਨਾਲ ਚੱਲ ਰਿਹਾ ਸੀ, ਪਰ ਇਸ ਹਫਤੇ ਉੱਥੇ ਹੋਈ ਰੌਬਰੀ ਨਾਲ ਪਰਿਵਾਰ ਬੁਰੀ ਤਰ੍ਹਾਂ ਟੁੱਟ ਗਿਆ।
ਰੈਸਟੋਰੈਂਟ ਦੇ ਮਾਲਕ ਮੈਸਿਮੋ ਕੈਪਰਾ ਨੇ ਦੱਸਿਆ ਕਿ ਮੰਗਲਵਾਰ ਤੜ੍ਹਕੇ 1:30 ਉੱਤੇ ਉਨ੍ਹਾਂ ਨੂੰ ਆਪਣੀ ਸਕਿਊਰਿਟੀ ਕੰਪਨੀ ਤੋਂ ਕਾਲ ਆਇਆ ਕਿ ਉਨ੍ਹਾਂ ਦੇ ਰੈਸਟੋਰੈਂਟ ਵਿੱਚ ਕੁੱਝ ਗੜਬੜ ਚੱਲ ਰਹੀ ਲੱਗਦੀ ਹੈ।ਜਦੋਂ ਕੈਪਰਾ ਰੈਸਟੋਰੈਂਟ ਪਹੁੰਚੇ ਤਾਂ ਉਨ੍ਹਾਂ ਵੇਖਿਆ ਕਿ ਸਾਹਮਣੇ ਵਾਲਾ ਦਰਵਾਜ਼ਾ ਖੁੱਲ੍ਹਾ ਸੀ ਤੇ ਰੈਸਟੋਰੈਂਟ ਦੇ ਆਫਿਸ ਵਿੱਚੋਂ ਨਿੱਕੀ ਸੇਫ ਤੇ ਮਨੀ ਬਾਕਸ ਗਾਇਬ ਸਨ।
ਕੈਪਰਾ ਨੇ ਦੱਸਿਆ ਕਿ ਮਸ਼ਕੂਕ ਵੱਡੀ ਮਾਤਰਾ ਵਿੱਚ ਪੈਸੇ ਲੈ ਗਏ ਹਨ ਕਿਉਂਕਿ ਉਨ੍ਹਾਂ ਆਪਣੇ ਮੁਲਾਜ਼ਮਾਂ ਨੂੰ ਦੇਣ ਲਈ ਉੱਥੇ ਨਕਦੀ ਰੱਖੀ ਹੋਈ ਸੀ।ਪਰ ਉਸ ਤੋਂ ਵੀ ਕੀਮਤੀ ਚੀਜ਼ਾਂ ਉਸ ਸੇਫ ਵਿੱਚ ਸਨ ਜਿਹੜੀਆਂ ਉਹ ਲੈ ਗਏ ਹਨ। ਕੈਪਰਾ ਨੇ ਦੱਸਿਆ ਕਿ ਚਾਰ ਸਾਲ ਪਹਿਲਾਂ ਉਨ੍ਹਾਂ ਦੇ 30 ਸਾਲਾ ਲੜਕੇ ਐਂਡਰਿਊ ਦੀ ਮੌਤ ਹੋਈ ਸੀ।ਉਸ ਦੇ ਮੈਮੋਰੀਅਲ ਵਿੱਚ ਸ਼ਾਮਲ ਲੋਕਾਂ ਵੱਲੋਂ ਉਸ ਲਈ ਨੋਟਸ, ਗਾਣੇ, ਕਹਾਣੀਆਂ ਤੇ ਤਸਵੀਰਾਂ, ਚਿੱਠੀਆਂ ਆਦਿ ਦਿੱਤੀਆਂ ਗਈਆਂ ਸਨ, ਉਹ ਸੱਭ ਵੀ ਉਸ ਸੇਫ ਵਿੱਚ ਸੀ।
ਕੈਪਰਾ ਨੇ ਆਖਿਆ ਕਿ ਪੈਸਾ ਤਾਂ ਆਉਣੀ ਜਾਣੀ ਚੀਜ਼ ਹੈ ਪਰ ਜੇ ਹੋ ਸਕੇ ਤਾਂ ਮਸ਼ਕੂਕਾਂ ਨੂੰ ਗੁਜ਼ਾਰਿਸ਼ ਹੈ ਕਿ ਉਹ ਉਨ੍ਹਾਂ ਦੇ ਬੇਟੇ ਨਾਲ ਸਬੰਧਤ ਚੀਜ਼ਾਂ ਮੋੜ ਦੇਣ।ਉਨ੍ਹਾਂ ਵੱਲੋਂ ਇਸ ਡਾਕੇ ਦੀ ਫੁਟੇਜ ਇਨਸਟਾਗ੍ਰਾਮ ਉੱਤੇ ਸਾਂਝੀ ਕੀਤੀ ਗਈ ਹੈ ਤੇ ਇਹ ਵੀ ਆਖਿਆ ਗਿਆ ਹੈ ਕਿ ਉਨ੍ਹਾਂ ਦੇ ਬੇਟੇ ਨਾਲ ਸਬੰਧਤ ਸਮਾਨ ਮੋੜਨ ਵਾਲੇ ਨੂੰ ਨਕਦ ਇਨਾਮ ਵੀ ਦਿੱਤਾ ਜਾਵੇਗਾ।