ਹੁਮਾ ਕੁਰੈਸ਼ੀ ਅਤੇ ਮ੍ਰਿਣਾਲ ਠਾਕੁਰ ਦੀ ਅਗਲੀ ਫਿਲਮ ‘ਪੂਜਾ ਮੇਰੀ ਜਾਨ’ ਦੀ ਸ਼ੂਟਿੰਗ ਪੂਰੀ ਹੋ ਗਈ ਹੈ। ਪਿੱਛੇ ਜਿਹੇ ਮੈਡੋਕ ਫਿਲਮਜ਼ ਨੇ ਸੋਸ਼ਲ ਮੀਡੀਆ ਉੱਤੇ ਇੱਕ ਟੀਜ਼ਰ ਵੀਡੀਓ ਸ਼ੇਅਰ ਕਰ ਕੇ ਇਸ ਗੱਲ ਦੀ ਜਾਣਕਾਰੀ ਦਿੱਤੀ ਹੈ। ਇਸ ਟੀਜ਼ਰ ਦੀ ਸ਼ੁਰੂਆਤ ਇੱਕ ਮੇਲ ਤੋਂ ਹੁੰਦੀ ਹੈ, ਜਿਸ ਵਿੱਚ ਬੋਲ ਹਨ, ‘‘ਡੀਅਰ ਪੂਜਾ, ਅਗਰ ਤੁਮ ਹਾਂ ਬੋਲ ਦੋ ਤਾਂ ਹਮਾਰਾ ਪਿਆਰ ਇਤਿਹਾਸ ਬਣਾਏਗਾ ਔਰ ਅਗਰ ਤੁਮਨੇ ਨਾ ਬੋਲਾ ਤੋ ਮੈਂ ਇਤਿਹਾਸ ਬਣ ਜਾਊਂਗਾ।” ਇਸ ਪਿੱਛੋਂ ਫਿਲਮ ਦੀ ਬਾਕੀ ਜਾਣਕਾਰੀ ਦਿਖਾਈ ਜਾਂਦੀ ਹੈ। ਫਿਲਮ ਵਿੱਚ ਹੁਮਾ ਅਤੇ ਮ੍ਰਿਣਲ ਲੀਡ ਰੋਲ ਵਿੱਚ ਹਨ। ਇਨ੍ਹਾਂ ਦੇ ਨਾਲ ਵਿਕਰਮ ਸਿੰਘ ਚੌਹਾਨ, ਵਿਜੈ ਰਾਜ ਵੀ ਅਹਿਮ ਕਿਰਦਾਰਾਂ ਵਿੱਚ ਹਨ।
ਫਿਲਮ ਦੀ ਕਹਾਣੀ ਦੋ ਲੜਕੀਆਂ ਉੱਤੇ ਆਧਾਰਤ ਹੈ। ਇਸ ਨੂੰ ਕਨਿਸ਼ਕਾ ਅਤੇ ਨਵਜੋਤ ਗੁਲਟੀ ਨੇ ਲਿਖਿਆ ਹੈ। ਫਿਲਮ ਨੂੰ ਨਵਜੋਤ ਨੇ ਨਾ ਕੇਵਲ ਲਿਖਿਆ, ਬਲਕਿ ਇਸ ਦੇ ਡਾਇਰੈਕਟਰ ਵੀ ਹਨ। ਇਸ ਫਿਲਮ ਨੂੰ ਦਿਨੇਸ਼ ਵਿਜਨ ਅਤੇ ਅਮਰ ਕੌਸ਼ਿਕ ਪ੍ਰੋਡਿਊਸ ਕਰ ਰਹੇ ਹਨ। ਉਨ੍ਹਾਂ ਦੇ ਨਾਲ ਸਹਿ ਨਿਰਦੇਸ਼ਕ ਦੇ ਰੂਪ ਵਿਪਾਸ਼ਾ ਅਰਵਿੰਦ ਨੇ ਕੰਮ ਕੀਤਾ ਹੈ। ਵਰਕਫਰੰਟ ਉੱਤੇ ਹੁਮਾ ਇਨ੍ਹੀਂ ਦਿਨੀਂ ਆਪਣੀ ਸੀਰੀਜ਼ ‘ਮਹਾਰਾਣੀ’ ਦੇ ਦੂਸਰੇ ਸੀਜ਼ਨ ਬਾਰੇ ਚਰਚਾ ਵਿੱਚ ਹੈ। ਉਥੇ ਹੀ ਮ੍ਰਿਣਾਲ ਫਿਲਮ ‘ਸੀਤਾ ਰਾਮ’ ਵਿੱਚ ਨਜ਼ਰ ਆਏਗੀ।