ਗੋਰਾਇਆ, 30 ਜੂਨ (ਪੋਸਟ ਬਿਊਰੋ)- ਦੋਆਬਾ ਖੇਤਰ ਵਿੱਚ ਇੱਕ ਅਨੋਖੀ ਧੋਖਾਧੜੀ ਦਾ ਕੇਸ ਸਾਹਮਣੇ ਆਇਆ ਹੈ। ਪਿੰਡ ਗੋਹਾਵਰ ਦੇ ਇੱਕ ਵਿਅਕਤੀ ਤੋਂ ਠੱਗਾਂ ਨੇ ਪੌਣੇ ਦੋ ਲੱਖ ਰੁਪਏ ਠੱਗ ਲਏ ਹਨ।
ਇਸ ਬਾਰੇ ਸਤਨਾਮ ਦਾਸ ਪੁੱਤਰ ਮੀਹ ਮਾਲ ਵਾਸੀ ਜੀ ਟੀ ਰੋਡ ਗੋਹਾਵਰ ਨੇ ਦੱਸਿਆ ਕਿ ਉਸ ਨੂੰ ਕੈਨੇਡਾ ਤੋਂ ਫੋਨ ਕਰ ਕੇ ਕਿਸੇ ਨੇ ਕਿਹਾ ਕਿ ਤੁਹਾਡੇ ਭਤੀਜੇ ਨੂੰ ਪੁਲਸ ਨੇ ਕਤਲ ਦੇ ਇੱਕ ਕੇਸ ਵਿੱਚ ਫੜਿਆ ਹੈ, ਜੇ ਤੁਸੀਂ ਉਸ ਨੂੰ ਬਚਾਉਣਾ ਚਾਹੰੁਦੇ ਹੋ ਤਾਂ ਮੈਨੂੰ ਵਕੀਲ ਦੀ ਫੀਸ 45000 ਰੁਪਏ ਭੇਜ ਦਿਓ, ਮੈਂ ਤੁਹਾਡੇ ਬੱਚੇ ਦਾ ਬਚਾਅ ਕਰਵਾ ਸਕਦਾ ਹਾਂ। ਉਹ ਪੂਰੀ ਤਰ੍ਹਾਂ ਘਬਰਾ ਗਿਆ ਅਤੇ ਤੁਰੰਤ ਜਾਅਲਸਾਜ਼ ਵੱਲੋਂ ਦਿੱਤੇ ਖਾਤੇ ਵਿੱਚ ਏਨੇ ਪੈਸੇ ਟਰਾਂਸਫਰ ਕਰ ਦਿੱਤੇ। ਫਿਰ ਉਸ ਨੂੰ ਇੱਕ ਹੋਰ ਫੋਨ ਆਇਆ, ਜਿਸ ਵਿੱਚ ਉਨ੍ਹਾਂ ਨੂੰ 1,30,000 ਰੁਪਏ ਜਮ੍ਹਾਂ ਕਰਨ ਲਈ ਕਿਹਾ ਗਿਆ ਅਤੇ ਸਤਨਾਮ ਸਿੰਘ ਨੇ ਫਿਰ 1,30,000 ਰੁਪਏ ਜਮ੍ਹਾਂ ਕਰਵਾ ਦਿੱਤੇ। ਇਸ ਪਿੱਛੋਂ ਠੱਗ ਨੇ ਫਿਰ ਫੋਨ ਕੀਤਾ ਤਾਂ ਉਨ੍ਹਾਂ ਨੂੰ 21,000 ਰੁਪਏ ਜਮ੍ਹਾਂ ਕਰਨ ਲਈ ਕਿਹਾ। ਸਤਨਾਮ ਦਾਸ ਕੋਲ ਪੈਸੇ ਨਹੀਂ ਸਨ, ਉਨ੍ਹਾਂ ਨੇ ਰਿਸ਼ਤੇਦਾਰਾਂ ਤੋਂ ਪੈਸੇ ਲੈਣ ਲਈ ਸੰਪਰਕ ਕੀਤਾ ਅਤੇ ਪੈਸੇ ਇੱਕਠੇ ਕਰ ਲਏ। ਸ਼ਾਮ ਨੂੰ ਉਹ ਫਿਰ ਬੈਂਕ ਵਿੱਚ ਪੈਸੇ ਜਮ੍ਹਾਂ ਕਰਵਾਉਣ ਗਿਆ, ਪਰ ਬੈਂਕ ਬੰਦ ਸੀ। ਅਚਾਨਕ ਉਨ੍ਹਾਂ ਦੀ ਮੁਲਾਕਾਤ ਬੈਂਕ ਦੇ ਬਾਹਰ ਰਾਕੇਸ਼ ਦੁੱਗਲ (ਪ੍ਰਧਾਨ ਬਲਾਕ ਕਾਂਗਰਸ ਕਮੇਟੀ ਰੁੜਕਾ ਕਲਾਂ) ਨਾਲ ਹੋਈ। ਦੁੱਗਲ ਨੂੰ ਪੂਰੀ ਗੱਲ ਦੱਸੀ ਤਾਂ ਉਨ੍ਹਾਂ ਨੇ ਦੱਸਿਆ ਕਿ ਉਸ ਦੇ ਨਾਲ ਧੋਖਾ ਹੋਇਆ ਹੈ, ਇਹ ਕੇਵਲ ਠੱਗ ਹਨ ਅਤੇ ਉਨ੍ਹਾਂ ਨੇ ਪੈਸੇ ਠੱਗਣ ਦਾ ਤਰੀਕਾ ਅਪਣਾਇਆ ਹੈ, ਉਹ ਬੈਂਕ ਵਿੱਚ ਪੈਸਾ ਨਾ ਜਮ੍ਹਾ ਕਰਵਾਏ।