ਨਵੀਂ ਦਿੱਲੀ, 30 ਜੂਨ (ਪੋਸਟ ਬਿਊਰੋ)- ਟਵਿਟਰ ਦੀ ਮੁਸੀਬਤ ਘੱਟ ਹੋਣ ਦਾ ਨਾਮ ਨਹੀਂ ਲੈ ਰਹੀ। ਇੱਕ ਪਾਸੇ ਜਿੱਥੇ ਟਵਿਟਰ ਅਤੇ ਐਲਨ ਮਸਕ ਦੀ ਡੀਲ ਅਟਕੀ ਪਈ ਹੈ, ਉਥੇ ਟਵਿਟਰ ਇੰਡੀਆ ਨੂੰ ਸਰਕਾਰ ਨੇ ਨਵੇਂ ਆਈ ਟੀ ਨਿਯਮਾਂ ਦੇ ਮੁਤਾਬਿਕ ਕੰਮ ਕਰਨ ਦਾ ਆਖਰੀ ਮੌਕਾ ਦਿੱਤਾ ਹੈ।
ਭਾਰਤ ਸਰਕਾਰ ਨੇ ਸਾਫ ਕਿਹਾ ਹੈ ਕਿ ਇਸ ਦੇਸ਼ ਵਿੱਚ ਟਵਿਟਰ ਨੂੰ ਨਵੇਂ ਆਈ ਟੀ ਨਿਯਮਾਂ ਦੇ ਹਿਸਾਬ ਦੇ ਨਾਲ ਕੰਮ ਕਰਨਾ ਹੋਵੇਗਾ।ਇੱਕ ਰਿਪੋਰਟ ਦੇ ਮੁਤਾਬਕ ਕੇਂਦਰ ਸਰਕਾਰ ਨੇ 4 ਜੁਲਾਈ ਤਕ ਦਾ ਸਮਾਂ ਟਵਿਟਰ ਇੰਡੀਆ ਨੂੰ ਦਿੱਤਾ ਹੈ, ਜੇ ਟਵਿਟਰ ਇੰਡੀਆ ਨਵੇਂ ਆਈ ਟੀ ਰੂਲਸ ਦਾ ਪਾਲਣ ਨਹੀਂ ਕਰਦਾ ਤਾਂ ਉਸ ਨੂੰ ਇੰਟਰਮੀਡਿਅਟਰੀ ਵਾਲੇ ਫਾਇਦੇ ਨਹੀਂ ਮਿਲਣਗੇ। ਟਵਿਟਰ ਇੰਡੀਆ ਆਈ ਟੀ ਨਿਯਮਾਂ ਦੇ ਸੈਕਸ਼ਨ 69 ਹੇਠ ਕੰਟੈਂਟ ਹਟਾਉਣ ਦੇ ਭੇਜੇ ਨੋਟਿਸ ਉੱਤੇ ਜਵਾਬ ਨਹੀਂ ਦੇ ਰਿਹਾ। ਇਸਦੇ ਇਲਾਵਾ ਟਵਿਟਰ ਦੇ ਖ਼ਿਲਾਫ਼ ਕੰਟੈਂਟ ਨਾ ਹਟਾਉਣ ਕਾਰਨ ਸਹਿਯੋਗ ਨਾ ਕਰਨ ਦੇ ਲਈ ਨੋਟਿਸ ਜਾਰੀ ਹੋਇਆ ਹੈ। ਕੱਲ੍ਹ ਮੰਤਰਾਲੇ ਨੇ ਇਸ ਸਬੰਧ ਵਿੱਚ ਨੋਟਿਸ ਭੇਜਿਆ ਹੈ। ਇਸ ਵਿੱਚ 6 ਅਤੇ 9 ਜੂਨ ਨੂੰ ਭੇਜੇ ਨੋਟਿਸ ਉੱਤੇ ਮਾਈਕ੍ਰੋਬਲਾਗਿੰਗ ਪਲੇਟਫਾਰਮ ਦੇ ਸਹਿਯੋਗ ਨਾ ਕਰਨ ਦੀ ਗੱਲ ਕਹੀ ਗਈ ਹੈ।