ਵਾਸ਼ਿੰਗਟਨ, 30 ਜੂਨ (ਪੋਸਟ ਬਿਊਰੋ)- ਅਮਰੀਕਾ ਵਿੱਚ ਰਾਸ਼ਟਰਪਤੀ ਚੋਣਾਂ ਤੋਂ ਬਾਅਦ ਛੇ ਜਨਵਰੀ 2021 ਨੂੰ ਹੋਈ ਕੈਪੀਟਲ ਹਿੰਸਾ ਦੇ ਕੇਸ ਵਿੱਚ ਹਾਊਸ ਕਮੇਟੀ ਦੀ ਸੁਣਵਾਈੇ ਜਾਰੀ ਹੈ।

ਬੀਤੇ ਮੰਗਲਵਾਰ ਨੂੰ ਛੇਵੀਂ ਲੋਕ ਸੁਣਵਾਈ ਮੌਕੇ ਵ੍ਹਾਈਟ ਹਾਊਸ ਦੇ ਸਾਬਕਾ ਚੀਫ ਆਫ ਸਟਾਫ ਮਾਰਕ ਮੀਡੋਜ਼ ਦੀ ਸਹਿਯੋਗੀ ਕੈਸਿਡੀ ਹਚਿੰਸਨ ਨੇ ਆਪਣੀ ਗਵਾਹੀ ਵਿੱਚ ਕਿਹਾ ਕਿ ਓਦੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਕੈਪੀਟਲ ਹਿੱਲ ਉੱਤੇ ਮਾਰਚ ਕਰਨ ਵਾਲੀ ਭੀੜ ਵਿੱਚ ਸ਼ਾਮਲ ਹੋਣਾ ਚਾਹੁੰਦੇ ਸਨ। ਟਰੰਪ ਨੂੰ ਜਦੋਂ ਇੱਕ ਸੀਕੇ੍ਰਟ ਸਰਵਿਸ ਏਜੰਟ ਨੇ ਉਥੇ ਲਿਜਾਣ ਤੋਂ ਮਨ੍ਹਾ ਕੀਤਾ ਤਾਂ ਉਨ੍ਹਾਂ ਨੇ ਉਸ ਦੇ ਗਲੇ ਉੱਤੇ ਹੱਥ ਤਕ ਪਾਇਆ ਤੇ ਰਾਸ਼ਟਰਪਤੀ ਵਾਹਨ ਦੇ ਡਰਾਈਵਰ ਦੀ ਥਾਂ ਖੁਦ ਸਟੀਅਰਿੰਗ ਵ੍ਹੀਲ ਉੱਤੇ ਕਬਜ਼ਾ ਕਰਨ ਦੀ ਕੋਸ਼ਿਸ਼ ਕੀਤੀ।ਹਚਿੰਸਨ ਨੇ ਕਿਹਾ ਕਿ ਟਰੰਪ ਨੂੰ ਜਦੋਂ ਕਿਹਾ ਗਿਆ ਕਿ ਉਥੇ ਜਾਣ ਦਾ ਖਤਰਾ ਹੈ ਤੇ ਅਸੀਂ ਨਹੀਂ ਜਾ ਸਕਦੇ ਤਾਂ ਉਹ ਗੁੱਸੇ ਵਿੱਚ ਬੋਲੇ, ਮੈਂ ਰਾਸ਼ਟਰਪਤੀ ਹਾਂ, ਮੈਨੂੰ ਕੈਪੀਟਲ ਲੈ ਕੇ ਚੱਲੋ। ਫਿਰ ਵੀ ਟਰੰਪ ਨੂੰ ਇਹ ਕਿਹਾ ਗਿਆ ਕਿ ਇਸ ਤੋਂ ਪਹਿਲਾਂ ਐਲਿਪਸ ਦੀ ਰੈਲੀ ਵਿੱਚ ਵੀ ਭੀੜ ਨੇ ਹਥਿਆਰ ਲਏ ਹੋਏ ਹਨ। ਇਸ ਉੱਤੇ ਉਨ੍ਹਾਂ ਕਿਹਾ ਕਿ ਉਹ ਇਸ ਦੀ ਪ੍ਰਵਾਹ ਨਹੀਂ ਕਰਦੇ।
ਖਬਰ ਮੁਤਾਬਕ ਫਲੋਰੀਡਾ ਦੇ ਇੱਕ ਵਿਅਕਤੀ ਨੇ ਜਨਵਰੀ ਵਿੱਚ ਕੈਪੀਟਲ ਹਿੰਸਾ ਦੌਰਾਨ ਗੁੰਡਾਗਰਦੀ ਦੇ ਤਿੰਨ ਗੰਭੀਰ ਜੁਰਮ ਕਰਨਦਾ ਦੋਸ਼ੀ ਠਹਿਰਾਇਆ ਹੈ। ਫਲੋਰੀਡਾ ਦੇ ਸੈਫਨਰ ਦੇ 34 ਸਾਲਾ ਮਿਸ਼ੇਲ ਟਾਡ ਗਾਰਡਨਰ ਦੂਜੇ ਨੂੰ ਡਿਸਟਿ੍ਰਕਟ ਆਫ ਕੋਲੰਬੀਆ ਦੀ ਫੈਡਰਲ ਅਦਾਲਤ ਨੇ ਸੋਮਵਾਰ ਨੂੰ ਨਾਗਰਿਕ ਬਦਅਮਨੀ, ਸਰਕਾਰੀ ਕਾਰਵਾਈ ਵਿੱਚ ਰੁਕਾਵਟ ਪਾਉਣ ਅਤੇ ਖਤਰਨਾਕ ਹਥਿਆਰ ਨਾਲ ਹਮਲਾ ਕਰਨ, ਵਿਰੋਧ ਕਰਨ ਜਾਂ ਅਧਿਕਾਰੀਆਂ ਨੂੰ ਰੁਕਾਵਟ ਪਾਉਣ ਲਈ ਦੋਸ਼ੀ ਠਹਿਰਾਇਆ। ਛੇ ਜਨਵਰੀ 2021 ਨੂੰ ਕੈਪੀਟਲ ਹਿੰਸਾ ਵਿੱਚ ਵੱਖ-ਵੱਖ ਸੂਬਿਆਂ ਦੇ 840 ਲੋਕ ਗ੍ਰਿਫਤਾਰ ਹੋਏ ਸਨ। ਵਰਨਣ ਯੋਗ ਹੈ ਕਿ ਅਮਰੀਕਾ ਵਿੱਚ ਰਾਸ਼ਟਰਪਤੀ ਚੋਣਾਂ ਪਿੱਛੋਂ ਛੇ ਜਨਵਰੀ 2021 ਨੂੰ ਵੱਡੇ ਪੱਧਰ ਉੱਤੇ ਹਿੰਸਾ ਹੋਈ ਸੀ। ਇਸ ਦੌਰਾਨ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਉੱਤੇ ਹਿੰਸਾ ਭੜਕਾਉਣ ਦੇ ਦੋਸ਼ ਲੱਗੇ ਸਨ।