ਨਵੀਂ ਦਿੱਲੀ, 29 ਜੂਨ (ਪੋਸਟ ਬਿਊਰੋ)- ਰਿਜ਼ਰਵ ਬੈਂਕ ਆਫ ਇੰਡੀਆ (ਆਰ ਬੀ ਆਈ) ਨੇ ਅੰਕੜੇ ਜਾਰੀ ਕਰ ਕੇ ਦੱਸਿਆ ਹੈ ਕਿ ਇਸ ਸਾਲ ਮਈ ਵਿੱਚ ਕ੍ਰੈਡਿਟ ਕਾਰਡ ਰਾਹੀਂ ਖਰਚ ਰਿਕਾਰਡ ਪੱਧਰ ਉੱਤੇਪੁੱਜ ਗਿਆ ਹੈ। ਖਪਤਕਾਰਾਂ ਨੇ ਸਿਰਫ਼ ਕ੍ਰੈਡਿਟ ਰਾਹੀਂ ਇੱਕ ਲੱਖ ਕਰੋੜ ਰੁਪਏ ਤੋਂ ਵੱਧ ਖਰਚ ਕੀਤਾ ਹੈ।
ਆਰ ਬੀ ਆਈ ਦੇ ਹਵਾਲੇ ਨਾਲ ਦੱਸਿਆ ਗਿਆ ਹੈ ਕਿ ਪਿਛਲੇ ਸਾਲ ਦੀ ਮਈ ਦੇ ਮੁਕਾਬਲੇ ਕ੍ਰੈਡਿਟ ਕਾਰਡ ਦਾ ਖਰਚ ਇਸ ਸਾਲ ਦੁੱਗਣੇ ਤੋਂ ਵੱਧ ਰਿਹਾ ਹੈ। ਮਈ ਵਿੱਚ ਖਪਤਕਾਰਾਂ ਨੇ ਰਿਕਾਰਡ 1.14 ਲੱਖ ਕਰੋੜ ਰੁਪਏ ਕ੍ਰੈਡਿਟ ਕਾਰਡ ਰਾਹੀਂ ਖਰਚ ਕੀਤੇ ਹਨ। ਇਹ ਸਾਲਾਨਾ ਆਧਾਰ ਉੱਤੇ 118 ਫ਼ੀਸਦੀ ਦਾ ਵਾਧਾ ਹੈ, ਜਦ ਕਿ ਮਾਸਿਕ ਆਧਾਰ ਉੱਤੇ ਅੱਠ ਫ਼ੀਸਦੀ ਦਾ ਉਛਾਲ ਦਿੱਸਦਾ ਹੈ।ਮਹਾਮਾਰੀ ਤੇ ਮਹਿੰਗਾਈ ਵਰਗੀਆਂ ਚੁਣੌਤੀਆਂ ਦੇ ਦਬਾਅ ਵਿੱਚ ਵੀ ਕੈ੍ਰਡਿਟ ਕਾਰਡ ਦਾ ਵਧਦਾ ਖਰਚਾ ਅਰਥਵਿਵਸਥਾ ਲਈ ਸ਼ੁੱਭ ਸੰਕੇਤ ਹੈ। ਇਸ ਤੋਂ ਪਤਾ ਲੱਗਦਾ ਹੈ ਕਿ ਰਿਟੇਲ ਅਰਥਵਿਵਸਥਾ ਮਜ਼ਬੂਤੀ ਨਾਲ ਵਧ ਰਹੀ ਹੈ ਤੇ ਖਪਤਕਾਰਾਂ ਦੀ ਖਪਤ ਵਿੱਚ ਤੇਜ਼ੀ ਨਾਲ ਸੁਧਾਰ ਆ ਰਿਹਾ ਹੈ।ਆਰ ਬੀ ਆਈ ਮੁਤਾਬਕ ਇਸ ਸਾਲ ਅਪ੍ਰੈਲ ਵਿੱਚ ਖਪਤਕਾਰਾਂ ਨੇ ਕ੍ਰੈਡਿਟ ਕਾਰਡ ਰਾਹੀਂ 1.05 ਲੱਖ ਕਰੋੜ ਰੁਪਏ ਖਰਚ ਕੀਤੇ ਸਨ, ਜਦ ਕਿ ਪਿਛਲੇ ਸਾਲ ਮਈ ਵਿੱਚ ਇਹ ਖਰਚ ਸਿਰਫ਼ 52,200 ਕਰੋੜ ਰੁਪਏ ਸੀ।ਆਰ ਬੀ ਆਈ ਦੇ ਮੁਤਾਬਕ ਕ੍ਰੈਡਿਟ ਕਾਰਡ ਰਾਹੀਂ ਖਰਚ ਬਾਰੇ ਸਭ ਤੋਂ ਵੱਡਾ ਵਾਧਾ ਨਿੱਜੀ ਬੈਂਕਾਂ ਦਾ ਹੈ। ਇੰਡਸਾਈਡ ਬੈਂਕ ਦੇ ਕੈ੍ਰਡਿਟ ਕਾਰਡ ਖਰਚ ਵਿੱਚ 17 ਫ਼ੀਸਦੀ ਦਾ ਵਾਧਾ ਹੋਇਆ ਹੈ, ਜਦ ਕਿ ਕੋਟਕ ਮਹਿੰਦਰਾ ਬੈਂਕ ਖਰਚੇ ਵਿੱਚ 15 ਫ਼ੀਸਦੀ ਵਾਧਾ ਹੋਇਆ ਹੈ। ਇਨ੍ਹਾਂ ਤੋਂ ਇਲਾਵਾ ਹੋਰ ਬੈਂਕਾਂ ਦੇ ਕ੍ਰੈਡਿਟ ਖਰਚੇ ਵਿੱਚ 4-9 ਫੀਸਦੀ ਦਾ ਵਾਧਾ ਹੋਇਆ ਹੈ। ਅਮਰੀਕਨ ਐਕਸਪ੍ਰੈਸ ਦੇ ਕ੍ਰੈਡਿਟ ਕਾਰਡ ਖਰਚੇ ਵਿੱਚ ਦੋ ਫੀਸਦੀ ਦਾ ਨੁਕਸਾਨ ਦੇਖਿਆ ਗਿਆ ਹੈ।