ਨੇਪਾਲ, 29 ਜੂਨ (ਪੋਸਟ ਬਿਊਰੋ)- ਤਿੱਬਤ ਦੇ ਗਲੇਸ਼ੀਅਰਾਂ ਵਿੱਚ ਬੈਕਟੀਰੀਆ ਦੀਆਂ 1000 ਨਵੀਆਂ ਨਸਲਾਂ ਮਿਲਣ ਦਾ ਪਤਾ ਲੱਗਾ ਹੈ। ਇਨ੍ਹਾਂ ਵਿੱਚੋਂ ਸੈਂਕੜਿਆਂ ਦਾ ਵਿਗਿਆਨੀਆਂ ਨੂੰ ਕੁਝ ਵੀ ਨਹੀਂ ਪਤਾ।
ਜਲਵਾਯੂ ਪਰਿਵਰਤਨ ਕਾਰਨ ਇਹ ਗਲੇਸ਼ੀਅਰ ਤੇਜ਼ੀ ਨਾਲ ਪਿਘਲ ਰਹੇ ਹਨ। ਜਦੋਂ ਇਹ ਪਿਘਲੇ ਤਾਂ ਇਨ੍ਹਾਂ ਦਾ ਪਾਣੀ ਬੈਕਟੀਰੀਆ ਦੇ ਨਾਲ ਚੀਨ ਅਤੇ ਭਾਰਤ ਦੀਆਂ ਨਦੀਆਂ ਵਿੱਚ ਮਿਲੇਗਾ, ਜਿਸ ਨੂੰ ਪੀ ਕੇ ਲੋਕ ਨਵੀਆਂ ਬਿਮਾਰੀਆਂ ਦੀ ਲਪੇਟ ਵਿੱਚ ਆ ਸਕਦੇ ਹਨ। ਉਂਜ ਇਸ ਦੇ ਪਿੱਛੇ ਇਨਸਾਨ ਹੀ ਜ਼ਿੰਮੇਵਾਰ ਹੈ ਕਿਉਂਕਿ ਉਸ ਦੇ ਕਾਰਨ ਹੀ ਜਲਵਾਯੂ ਪਰਿਵਰਤਨ ਹੋ ਰਿਹਾ ਅਤੇ ਤਾਪਮਾਨ ਵਧ ਰਿਹਾ ਹੈ।ਨੇਚਰ ਬਾਇਓਟੈਕਨਾਲੋਜੀ ਵਿੱਚ ਛਪੀ ਇਸ ਨਵੀਂ ਰਿਪੋਰਟ ਵਿੱਚ ਭਾਰਤ ਅਤੇ ਚੀਨ ਲਈ ਇਹ ਚਿੰਤਾ ਦੀ ਗੱਲ ਹੈ। ਚੀਨ ਦੇ ਯੂਨੀਵਰਸਿਟੀ ਆਫ ਚਾਈਨੀਜ਼ ਅਕੈਡਮੀ ਆਫ ਸਾਇੰਸ ਦੇ ਵਿਗਿਆਨੀਆਂ ਨੇ ਤਿੱਬਤੀ ਪਠਾਰਾਂਦੇ 21 ਗਲੇਸ਼ੀਅਰਾਂ ਦੇ ਸੈਂਪਲ ਜਮ੍ਹਾ ਕੀਤੇ ਸਨ। ਇਹ ਸੈਂਪਲ 2016 ਤੋਂ 2020 ਦਰਮਿਆਨ ਇਕੱਠੇ ਕੀਤੇ ਗਏ। ਇਨ੍ਹਾਂ ਵਿੱਚ 968 ਨਸਲਾਂ ਦੇ ਬੈਕਟੀਰੀਆ ਮਿਲੇ, ਜਿਸ ਵਿੱਚ 82 ਫੀਸਦੀ ਬੈਕਟੀਰੀਆ ਇਕਦਮ ਨਵੇਂ ਹਨ, ਜਿਨ੍ਹਾਂ ਦੀ ਦੁਨੀਆ ਭਰ ਦੇ ਵਿਗਿਆਨੀਆਂ ਨੂੰ ਜਾਣਕਾਰੀ ਨਹੀਂ। ਗਲੇਸ਼ੀਅਰ ਅਤੇ ਬਰਫੀਲੀਆਂ ਚਾਦਰਾਂ ਧਰਤੀ ਦੇ 10 ਫੀਸਦੀ ਸਤ੍ਹਾ ਨੂੰ ਕਵਰ ਕਰਦੇ ਹਨ। ਧਰਤੀ ਉੱਤੇ ਸਭ ਤੋਂ ਵੱਧ ਸਾਫ ਪਾਣੀ ਦਾ ਸਰੋਤ ਇਨ੍ਹਾਂ ਦੇ ਕੋਲ ਹੈ। ਦਿੱਕਤ ਇਹ ਹੈ ਕਿ ਹਜ਼ਾਰਾਂ ਸਾਲ ਤੋਂ ਜੰਮੇ ਗਲੇਸ਼ੀਅਰਾਂ ਦੇ ਹੇਠਾਂ ਕੀ ਹੈ, ਕਿੱਦਾਂ ਦਾ ਵਾਤਾਵਰਣ ਅਤੇ ਕਿੱਦਾਂ ਦੇ ਜੀਵ ਤੇ ਸੂਖਮਜੀਵ ਹਨ, ਇਹ ਹਮੇਸ਼ਾ ਤੋਂ ਵਿਗਿਆਨੀਆਂ ਦੀ ਖੋਜ ਲਈ ਪ੍ਰਮੁੱਖ ਵਿਸ਼ਾ ਹੈ। ਵਿਗਿਆਨੀ ਜਾਨਣਾ ਚਾਹੰੁਦੇ ਹਨ ਕਿ ਗਲੇਸ਼ੀਅਰ ਪਿਘਲੇਗਾ ਤਾਂ ਇੱਥੇ ਮੌਜੂਦ ਸੂਖਮਜੀਵ ਇਨਸਾਨਾਂ ਅਤੇ ਹੋਰਨਾਂ ਜੀਵਾਂ ਉੱਤੇ ਕੀ ਅਸਰ ਪਾਉਣਗੇ।